ESTA 5 - BIBILLYA Mareiyo Meele a Iruva

Esta Avaangya Mangyi Ahasuero na Hamani Shoonga

¹ Naasa elyi lya nkonu wa kararu Esta karaa soori takwe ta kimangyi kandeanga efo kari ka nnang'ani ka mmba ya mangyi, taari ilya kiri kya umangyi kikai.

² Mangyi eekilollya Esta eesalelyi alya kari indo, kasennywa kakunda namanyi ekyo kyamweende nang'u, kamoolonngya nsengye wakwe wa saabu. Naasa Esta kaserikya kufii, kapaana nsengye ulya.

³ Llyo mangyi alembesa, “Nka-mangyi Esta, niinda? Nkyoki kyakuting'a? Kwaammbaye naakwa kyava nkyenga kya umangyi lwakwa nkuniingwaa.”

⁴ Esta kammbia, “Kwakooya kisennyaa mangyi, mangyi na Hamani vashe vashelya sukukuu shambadeesya inu.”

⁵ Na mangyi kaamba Hamani nandevaangwa uviny naambo vandelya shoonga na Esta shaasa akunndye, kikava indo.

⁶ Naasa llyo mangyi alevia Esta llya veefo veenaa mfinyu, “A nkyoki kukundye itereva? Ekyo kukundye ikitereva mmbo kuwonisaa, naako kyava nkyenga kya umangyi lwakwa.”

⁷ Esta kammbia, “Kiterewo kyakwa nnyeki,”

⁸ Kwakooya mangyi asennyo ni yeny nashiirikye eki shiifoo shinterevaa, mmbo sheeterevaa mangyi na Haman vashe lyingi shoongeny yakwa ndesi, llyo neeny nsherouwaa ekyo mangyi ashivesa.

Haman avika kyama kyewaa Modekai

⁹ Nalyo Haman Kooka yoo shoongeny eefurye kyuumu. Lyo kyeeri alesomuka kakooya Mordekai yoo mwaangony kwa mangyi, nawe nnyemwiindya nta inreremya-fo, karwaayo ni unyafi kimaruma kya Mordekai.

¹⁰ Hamani kasisirya-da kakweengya kyeny. Karumya nkaakwe Sereshi na vambuya vakwe vandevaangwa.

¹¹ Llyo Haman alevavia mbony ta masaa akwe na uniini lwakwe na wiingi lwa vana atiri, na shaasa mangyi ankundye kallyimya findo fiingi, kavembika uwe ya vasero va mangyi woose.

¹² Kya mmwasi Hamani kaamba, “Na nka-mangyi Esta mmbo alesongosya sukukuu yakwe nta nnalavaangeu nndu ungyi kuuta mangyi na yeny shimuni nsi. Na ndesi-da yeny na mangyi mmbo lukee vavaange.”

¹³ Lyo mbusha yeefi fyoose nnyoki shiilollyaa Mordekai Muyuda yoo mwaangony kwa mangyi wo nkonu?

¹⁴ Naasa nkaakwe we Sereshi kammbia, ando amwi na vambuya vakwe woose, “Usongosyo nri mwaasha wa meta makumi araanu, utiri maako kurere na mangyi ndesi ngama Mordekai nandevanikwau, numa ya vayo llyo kusheendaa sukukuuny yeyo yewe na mangyi kwiitirwa ni nsia.” Kindo ekyi kikasenya Hamani, kandesongosya nri yeto.