ESTA 3 - BIBILLYA Mareiyo Meele a Iruva

Hamani na kyama kyeemamita Vayuda

¹ Naasa numa mangyi Ahasuero keengerya Hamani wa Hamedata Mwakakyi, kambika nasalallye vashilyi vakwe va uruka loose.

² Na vasero va mangyi woose, valya veekaa kwakwe vakeendya Hamani nnu mashika niindo mangyi eevavasye. Lyo we Mordekai nnyaleindya Haman nta lyimwi-fo.

³ Varundi va mangyi yewo vakaa yoo mwaangony va mmba ya mangyi vakavia Mordekai, “Nkiki elyi yewe kukeyiimbwa ivavasyo lya mangyi kulashiindyaa Hamani?”

⁴ Vakambesa wo nkonu kyeendi we nalasare. Vakookafo vakavia Hamani, naambo valole kwakooya Mordekai arewaau mashika Mordekai avaviyye sheelyi we ni Myuda.

⁵ Nawe Hamani eekilollya Mordekai nnyakemwiindya karooyo nngoo deny,

⁶ Naasa Kalollya nkimaa iwaa Mordekai muni-fo, kimmba ammeemanya ufyari lwakwe, nkyo Hamani kakunda nawaa na Vayuda woose vakee Siria ushilyiny lwa mangyi Ahasuero.

⁷ Nalyo llya wekee mwiiri wa mbee, nto wa Nisan mwaaka wa ikumi na kavii wa mangyi Ahasuero, vandu vakakapa kura (yeevangwa “Puri”) ya yoora nkonu na mwiiri yeto usumani iwaa Vayuda. Nkonu ikumi na kararu wa mwiiri wa ikumi na kavii uvaangwaa Adari ukava nto.

⁸ Llyo Hamani aleenda kavia mangyi Ahasuero, “Mangyi, kwiifo vandu vanyanyakye wo ando kunu urukeny lwafo koose. Na mikaaye yavo mmbo ikee kilasha na mikaaye ya vandu vengyi woose, nta mmbakeesora mavavasyo a mangyi-fo, kweekyo nkivaa mangyi navasisirye indo-fo.”

⁹ Nalyo kikansennya mangyi, naambe kireiyo naambo vandemamitwa, neeny nsheningya talanta fiku ikumi ta fesa tivikwa mbolokony ya mangyi.

¹⁰ Nalyo mangyi koota-fo pete yakwe kainingya Hamani wa Hamedata, Mwagati yeto akee nkiduva wa Vayuda.

¹¹ Naasa mangyi kavia Hamani, “Ileri ekato kwanningyo, na vandu-da. Tanany shaasa kikusenyaa yewe.”

¹² Naasa veereiya mbony va mangyi vakavaangwa, wikee mwiiri wa mbee nkonu ikumi na kararu. Barrwa tikareiyo shaasa Hamani alevavasya, kwa vasongoru va mangyi veeshillya, na vaniini woose va wo uruka na barrwa yakwe na kishomu kyakwe, tikavikwa irina lya Ahasuero na muuri wa pete yakwe.

¹³ Tikakamarwa mmatarishi efo myuungony myoose tivavasye Vayuda woose vawaawa, womi, vaka, na vana vakoo, vawaawa woose nkonu umwi, nkonu wa ikumi na kavii nto mwiiri va Adari, na masaa awo akurikwa moose.

¹⁴ Barrwa yeyo ikakapyo weele kundo koose efo urukeny, vakudeesye itana indo nkonu yeto mweni.

¹⁵ Matarishi vakarisha shaasa mangyi alevavasya, na kulya Shushan nafo kukabwa iranda. Kyeeri ekyi Mangyi na Haman vekeerembo veekuniyyaa mfinyu wawo, llyo muri moose wa Shushan ukasavaa.