ESTA 2 - BIBILLYA Mareiyo Meele a Iruva

Esta awa nka va mangyi Ahasuero

¹ Numa ya vayo unyafi lwa mangyi Ahasuero lummaa iwa, kawuya ikumbwase kilya Vashti aletana ando amwi na kilya alekureekywa.

² Nawo vandu valya veendundya vakammbia, “Mangyi nanderuyywa vana va kyeny vesha valaishi womi,”

³ mangyi navike veelola efo urukeny lwakwe loose, vana yewo vesha veendwa ando amwi woose kulya Shushan turuveny, kulya mmba ya vaka, varambikyo Hegai eto mwiisalallya mmba ya mangyi ekee na nringi wa vaka, vakaefo veekwiilyisye deny.

⁴ Nawe mangyi nashelolafo yeto ansenyaa mmwasi nave nka wakwe ando a Vashti. Kindo ekyi kikasenya mangyi, nawe katana indo.

⁵ Nafo efo Shushan turuveny kweefo Myuda umwi eevaangwaa Mordekai, wa Yairi, wa Shimei wa Kishi, wa ufyari lwa Benyaminy.

⁶ Mordekai mmbo ekamarwa mfungwa autwa Yerusalemu ando amwi na Yekonia ulya mangyi ya Yuda, kashefitwa Babilony ni mangyi Nebukadrnesa.

⁷ Na Mordekai yeu mmbwe elela Esta avaangwaa Hadasa, nawe mmwana wa nsero wa kyekuuye, nawe Esta nnyeetiri ndeye nta maye-fo. Na Esta yeu mmbo ekee nsha kasenya deny, na kyeeri maye na ndeye valefwa Mordekai yeu kamwiipoo kava sha mwana wakwe.

⁸ Naasa kyeeri weele lwa mangyi luleitiwa indi, vana va kyika veengi vakandekuumbya kwa Hegai kulya Shushan turuveny. Na Esta nawe kaverambikyo Hegai naambo nambike yeekeniny lya yewo vengyi.

⁹ Esta kasennya nnu, Hegai kanningya findo fyoose fyeekwiilyisa, na shoonga, kambikya na fishinga mfungare fikae nawe. Kookafo kansamisya ando a sau we na fishinga efyo, efo kweni mmba ya vaka, kwa mangyi.

¹⁰ Lyo we Esta nnyaleamba ufyari lwakwe nta kundo ookye-fo, katana indo shaasa Mordekai emmuvia nalaambe.

¹¹ Wo nkonu Mordekai kava ashetiva-tivaa kulya kari ka mmba ilya vaka veekai, naambo namanyi shaasa kisheendaa kya Esta.

¹² Kyeeri kya ikamba lya mwana umwi wa kika yaanga kwa mangyi Ahasuero, mmbo akooyaa ammaa ideesyo ando a miiri ikumi na ivii, llyo ammaa ikwiilyisa shaasa kikee kivavasye, miiri irindaru ekwaambaa mafura a manemane, na miri ingyi irindaru nakutokope na mafura na findo fingyi fifwaamaa fya mbuka ya vaka.

¹³ Na kyeeri mwana wa kyika esheendaa kwa mangyi mmbo aniingwaa wo kindo ekyo asauwaa kyeekutokopa.

¹⁴ Mmbo ashaangaa kwa mangyi nkwaany, na ngama kawuya efo mmba ya vaka, kawaryo ni Shaashkasi ulya mwiisalallya efo kwa mangyi, mmbwe yeto aringaa vaka yewo vakaa efo kwa mangyi. Yeto ammaa yuuka kwa mangyi nkonu umwi nnyakiwuyaafo-fo, kulakooye mmangyi asennyo mmbwe, nansende irina nawuye.

¹⁵ Kyeeri ikamba lya Esta mfu va Abihaili, mmwa va Mordekai lyilefika, we nnyalekutokopa na kindo kyingi kuuta filya fyekeefivavasye ni Hegai yeto mwiisalallya efo kwa mangyi, kaveva nringi wa vaka, mmbo alesennya vandu woose valellollya.

¹⁶ Naasa Esta nawe kaatwa kwa mangyi Ahasuero wikee mwiiri wa ikumi, uvaangwaa Tebeti, nato wekee mwaaka wa mfungare wa ushilyi lwakwe.

¹⁷ Mangyi kakunda Esta ngota vaka woose yevo valeendwa kwakwe, mangyi kankunda na illanga ngota yewo vengyi woose. Nalyo kambika ureto lwa nka mangyi, kava nka va mangyi ando a Vashti.

¹⁸ Kiikeny indo mangyi kavikya vasongoru vakwe sukukuu ando amwi na vashilyi vakwe woose, ikava nsukukuu ya Esta, kavavasya uve nkonu wa yiimuya urukeny lwakwe loose, kaniinga vandu findo fya pya shaasa mangyi alekunda we muni.

Mordekai Aauwa Mangyi rengeny

¹⁹ Kyeeri vana yewo va kyika valekuumbya ando amwi lyingi, Mordekai kava akaa yoo kufii na mwaangony kwa mangyi.

²⁰ Esta nnyemmaamba nta kya ufyari lwakwe-fo, nta kundo ookye-fo, katana shaasa Mordekai alembia, keendya fyoose shaasa alelelwa.

²¹ Kyeeri ekyo Mordekai ekee yoo mwangony kwa mangyi, na veesalallya yoo mwaangony kwa mangyi Bigtana na Tereshi vakasukyo kimaruma kya Mordekai, vakakunda iriingya mangyi Ahasuero.

²² Naasa nawe Mordekai kamanya kindo ekyi, kavia Esta akee ulaalu ni nka mangyi, nawe Esta kavia mangyi ando a Mordekai.

²³ Kyeeri mbony yeyo ya uriingyi ilesunundwa ikamanyika songosiny, Bigtana na Tereshi vakavanikwa nrii-u, vakafwa. Efyo fyoose fikareiyo efo kyitabuny kya mbony ta mangyi.