ESRA 7 - BIBILLYA Mareiyo Meele a Iruva

Esra afika Yerusalemu

¹ Numa ya vayo kyeeri kya ushilyi lwa Artashasta, mangyi ya Uajemi, nawe Esra mwana wa Siraya mwana wa Asaria, mwana wa Hilkia,

² mwana wa Shalumu, mwana wa Sadoki, mwana wa Ahitubu,

³ mwana wa Amaria, mwana wa Azaria mwana wa Merayoti,

⁴ mwana wa Serakia, mwana wa Usi mwana wa Buki,

⁵ mwana wa Abishua, mwana wa Finehasi mwana wa Elisasari, mwana wa Haruni akee nkohani nniini,

⁶ Esra alekwiipoo Babilony. Ekee mwarya wa fitabu eeshi mavavaso a Mose alya Nndumi Iruva, Iruva wa Israeli aleniingya. Mangyi kamwiirikya kaaniinga fyoose alentereva, mashika woko lwa Nndumi Iruva, Iruva wakwe mmbo lwenkaaye.

⁷ Mwaka wa mfungare wa ushilyi lwa mangyi Ahasuero, vandu vengyi va Israeli, vakohani vengyi na Valevi amwi na veembi na vesalala ngiriny na varundi va mmba ya mwiindye valeenda Yerusalemu da.

⁸ Esra mmbo alesha Yerusalemu mwiiri wa karaanu wikee mwiiri mfungare wa mangyi yeto.

⁹ Mashika Esra mmbo aleuka Babilony nkonu wa mbee wa mwiiri wa mbee, llyo kaafukya Yerusalemu nkonu wa mbee wa mwiiri wa karaanu, shaaa Nndumi ekee amwi nawe.

¹⁰ Mashikaa Esra mmbo edesye nrima wakwe indekulosha ivavasyo lya Nndumi Iruva na irunda nalyo naambo naloshe Israeli uvavaso na mavavasyo a Nndumi.

Barrwa ya Esra yuuka kwa Artashasta

¹¹ Yekyi ni kirishe kya barrwa mangyi Ahasuero aleniingya nkohani Esra mwireiya na akuloshye mbony ta mavavasyo a Nndumi Iruva na uvavaso lwakwe kwa Israeli:

¹² “Artashasta, mangyi ya vamangyi, kwa nkohani Esra mwireiya uvavaso lwa Iruva wa iruveu.

¹³ Shaniingya ivavaso sheelyi nndu moose Mwiisraeli ao vakohani vawo ao Valevi vakee kunu umangyiny mmbo vatiri uleke lwa yeenda Yerusalemu, vaniingwa muumu.

¹⁴ Mashika yewe mmbo kwarumwa mmangyi amwi na ngyama takwe mfungare mundesununda mbony Yuda na Yerusalemu shaasa kikwani na ivavaso lya Iruva waany ikee wokony lwafo.

¹⁵ Lyingyi-se kwiipoo fesa na saabu eto mangyi na ngyama takwe vaniingya kwa uleke tiniingyo Iruva wa Israeli yeu marembo akwe ni Yerusalemu.

¹⁶ Amwi na fesa shoose na saabu kushekooya efo koose kyuungony kya uruka lwa Babilony, amwi na firaso fya uleke fya vandu na makohani, ni firaso fya kyasa fya mmba ya Iruva waawo ikee kulya Yerusalemu.

¹⁷ “Amwi na eleri yeti, llyony kuure shau, suva na ngurana, amwi na yuura firaso fya vayo fya nswa na firaso fyeena, mmbo kuufiutyaa uwe ya kitara kyerasya kya mmba ya Iruva waany ikee Yerusalemu.

¹⁸ Kilya kisha kyoose yewe na wooro mulolyaa kisenyi mushiidimaa yuura na fesa na saabu isaa-u kikwaani nsia wa Iruva waany.

¹⁹ Fiiya filya kuleniingyya fya mmba ya Iruva waany, fivikeny mbee ya Iruva wa Yerusalemu.

²⁰ Na kisha kingyi kyoose kyikundika kya mmba ya Iruva waany, kyuutwa efo mbolokony ya mangyi ya kyuunngony ekyo.

²¹ “Na yeny mangyi Artashasta shaniingya ivavaso, mboloko shoose ta nyuungony kikee kwakulya ya mura wa Efrati: Ekyo kyoose nkohani Esra mmwireiya uvavaso lwa Iruva wa iruveu akundye kway, kitanyike kwa sina,

²² fesa akundye tilakilye filo fiku firaru mayanna aana, nganu filo fiku ikumi, mfinyo lita fiku fivii, mafura lita fiku fivii na mmbala moose eto akundaa.

²³ Wo kindo Iruva wa iruveu avavasye kya mmba yakwe, ni kuti kitanyike kwa usaari, naambo unyafi lwakwe urukeny lwa mangyi na kwa vana vakwe.

²⁴ Lwavamanyisya-se sheelyi nkivaa ivesa usanu, ukamba ao udedemi kwa nta umwi wa vakohani, Valevi, weembi, vesalala ngiriiny. Varundi va mmba ya mwiindye ao nta varundi vengyi va mmba yei ya Iruva-fo.

²⁵ “Na yewe Esra, kyuuka na waarya lwa Iruva wafo, elo kulutiri, sauwa verumbwa myaandu na valeti yewo vashiidimaa ileta vandu woose efo kyuungony kya uruka lukee taari ya nkwaany ya mura wa Efrati, na yeto moose nalaishi mavavaso a Iruva wafo na a mangyi lloshe.

²⁶ Yeto moose nalaindyaa ivavaso lya Iruva wafo na ivavasyo lya mangyi narumbuyo mwaandu na yuutywa uvingo kwa ukaari, kwakooya ni iwaawa ao isamirwa ao isokwa masaa akwe moose ao ifingwa nsenyi.”

Esra aarafuma Iruva

²⁷ Esra kaamba, “Naarafumwa Nndumi Iruva, Iruva wa vandeye veru, yeu alevika kindo sha ekyo efo ngoony ya mangyi, ishopa mmba ya Nndumi Iruva yei ikee Yerusalemu.

²⁸ Kwa isaarya lya Iruva shilawoni weekyi kwa ungyi na kwa mgyama taakwe na vashilyi wakwe vaafinya. Shakaarya mashika Nndumi Iruva wakwa eekee neny, nkyo shedima isanyira womi wookye Israeli naambo vavuye amwi neeny.