ESRA 5 - BIBILLYA Mareiyo Meele a Iruva

¹ Nalyo vakisuku Hagai na Sekaria mwana wa Ido vakaauya fisuku kya Vayuda valya vekee Yerusalemu na Yuda, kwa irina lya Iruva wa Israeli yeto ekee uwe yaawo.

² Llyo Serubabeli mwana wa Shealtieli na Yosua mwana wa Yosadaki vakapooka itana mmba ya Iruva kulya Yerusalemu, ando amwi nawo veefo na vakisuku va Nndumi Iruva vekeeiveekya.

³ Kyeeri ekyo Tatenai ulya ekee nshilyi kulya urukeny lwa taari ya nkwaany ya mura wa Efrati na Sheta-Bosena, na vengyi-se, vakasha vakarera nawo indi, “A ni vi alemuniinga ivavasyo mutani mmba na imarisyaa?”

⁴ Nawo vakavavesa indi, “A marina a vandu yewo vakeetana mmba yei ni vi na vi?”

⁵ Lyo iriso lya Iruva lyikavakaya vamiku va Vayuda, kulakaefo nndu aidima ivapaaya, kutani rumi yafikya mangyi Dario, llyony kirouwo kiwuye kwa barrwa ikwaanu-u.

⁶ Na yeki nkyo kirishe kya barrwa valereiywa kwa mangyi Dario yuuka kwa Tatenai, nshilyi ulya wa kwakulya ya mura wa Efrati na Sheta-Bosena na wooroye vawo va kwakulya ya mura wa Efrati,

⁷ valereiya rumi ikee shireiye indi: Woi mangyi Dario, lwakwiidikira, mbe.

⁸ Mmbo lukundye imanyisya mangyi shaasa lulefika urukeny lwa Yuda, lukaenda efo mmba ya Iruva Nniini ikeeitanwa, na mawe maniini, na masimamba a vayo atiri myaamba ya miri, mashora mmbo akeeirundwa na sina na ikeetanyika kwa usha deny.

⁹ Nalyo yese lukavesa vasongoru vawo lukarera nawo indi, “A ni vi alemuvavasya mutani mmba yei kutani mwaimarisya?

¹⁰ Lukavavesa-se na marina awo, naambo lwiidimi ikumanyisya, vasongoru yewo vawo.

¹¹ “Na ekyi nkyo kirouwo kyawo kweru, ‘Yese mmbo lukee varundi va Iruva wa iruveeu na ulana, neese mmbo lukeetana-se mmba yei yentanwa elyo kasha myaaka miingyi yammiira-u, ni mangyi nniini wa Israeli eitana kaimaa piny.

¹² Kyeendi kyeeri vande veru valerosya Iruva yeto wa iruveeu na ulana unyafi, llyo alevavika maakony a Nebukadresa Mkalikayo mangyi ya Babilony nawe kalyamara mmba yeyo ya Iruva, kakamara vandu kulya Babilony.

¹³ Lyo mangyi Koreshi wa Babilony, wikee mwaaka wa mbee wa ushinlyi lwakwe, kauta ivavaso sheelyi mmba yei ya Iruva itanwa lyingyi.

¹⁴ Na fiiya filya fya mmba ya Iruva fya saabu na fesa, efyo Nebukadrsa alefyuuta efo mmba ya mwiindye wa Babilony kulya Yerusalemu kashefyeende mmba ya mwiindye ya maruva a Babilony. Mangyi Koreshi keepoo fiiya efyo uka Babilony fikarambikyo nndu umwi irina lyakwe ni Sheshbasa, ekee nshilyi,

¹⁵ kammbia, Ipoo fiiya yefi kundefiviira mmba ya mwiindye ikee kulya Yerusalemu, nayo mmba ya Iruva itannyo-se alya uvasheny yeekai.’

¹⁶ Naasany llyo Sheshbasa alesha kasheveiya uvasha lwa mmba ya Iruva ikee Yerusalemu na kupookya-u, fika inu mmba yei mmbo yiifo itanwaa, nayo nta nnyalesia-fo.

¹⁷ Naasany, kwakooya kyakusenya, mangyi kuruuywa efo mmba yakwe, efo Babilony, kwakooya mangyi Koreshi alevavasya mmba yei ya Iruva efo Yerusalemu itanwa-se. Llyony, mangyi naluvye shaasa ifura lyakwe lyikai lya mbony yei.”