ESRA 3 - BIBILLYA Mareiyo Meele a Iruva

Mwiindye vapooka lyingyi

¹ Wiikifika mwiiri wa mfungare vana va Israeli vemmaa iwuya miriny yaawo, nawo vakakusanyirya na nrima umwi nsi efo Yerusalemu.

² Naasa Yosua mwana wa Yosadaki kasalala, we na vana va maye vakee vakohani, na Serubabeli mwana wa Shealtieli na vana va maye, vakasanga woose itana kitara kyeerasya Nndumi Iruva wa Israeli, naambo wootyeu firaso fyeekora na muro, shaasa nndu ulya wa Iruva Mose avavasye.

³ Vakavika kitara ekyo kirembony kya vayo, kya kasha lla elyi veereya vandu va uruka llwa, vakootyau Nndumi Iruva firaso fya ikora na muro ngama na nkwaany.

⁴ Vakavika Sukukuu ya Matengo, shaasa kyekee kireiye, vakoota firaso fyeekora na muro wo nkonu shaasa veishivye shaasa kyekundikye.

⁵ Numa vakaniingya firaso filya fya miishivye, na fya mwiiri mwiiya, na Sukukuu ta Nndumi Iruva na firaso fya pya shaasa wo nndu alekunda iniingya Nndumi Iruva.

⁶ Uka nkonu wa mbee wa mwiiri wa mfungare llyo valepooka yuuta firaso kwa Nndumi Iruva fyeekora na muro, lyo uvassha lwa mmba ya Nndumi Iruva llwemmbeiywa-fo.

Vapooka itana Mmba ya Iruva

⁷ Vandu vakaniingya fesa teetaa vepasha firi na vepasha mawe, vandu va Tiro na Sidon vakavaniiga shoonga, fyeena na mafura, naambo vaveengye mieresi yuuka Lebanon fika Yafa kwa shia ya mureny shaasa Mangyi Koreshi wa Uajemi alevaniinga weekyi.

⁸ Mwiiri wa kavii mwaaka yeto wa kavii uka llya valefika mmba ya Iruva kulya Yerusalemu, Serubabeli mwana wa Shealtieli na Yosua mwana wa Yosadaki na vana va maye vawo, vakohani na Valevi, sanda na vandu woose valya valeuka usamirony Babilony vakafika Yerusalemu. Vakasauwa Valevi yewo-uka vatiri myaaka makumi avii enda na mbee, naambo vasalallye mashora a mmba ya Nndumi Iruva.

⁹ Yosua na vana vakwe na vana va maye, Kadmieli na vana vakwe, na va mmba ya Yuda, vakasalallya yewo varundaa efo mmba ya Iruva, ni vana va Henadadi Valevi, na vana vawo.

¹⁰ Kyeeri veetana mmba valemaa iveiya uvasha lwa vayo, na vakohani veeree soori tawo, veerye tarumbeta, na Valevi na vana va Asafu, vengyi veerye matoasi naambo varumishe Nndumi Iruva shaasa mangyi Davidi wa Israeli alevavasya.

¹¹ Vakeemba vewaryianaa verumishaa Nndumi Iruva neemwaana, veeshaambaa, “Kimmba akee nsha na isarya lyakwe llya llung'anu kwa vandu vakwe va Israeli.” Vandu woose vakakapa ukoru na yoonisa unyanga llya vekeeirumisha Nndumi Iruva mashika valelollya uvasha lwa mmba ya Nndumi Iruva lwemmaa iveiyo.

¹² Vakohani veengyi na Valevi na vasongoru va ngyufyari ta vakuu valya veeyiishi mmba ilya ya mbee, llya valelollya uvasha elu, wo vakaffwa na unyanga uniini. Naakwa niindo vandu veengyi vakakapa ukoru vefuraa.

¹³ Nta nkilekiva itambashwa neemanya ukoru lwa ifura na kiiyo-fo, mashika elyi woose valeonisa nnu ngyunyanga tawo tikaitiwa kwaasha deny.