ESEKIELI 9 - BIBILLYA Mareiyo Meele a Iruva

Ngapo ya Yerusalemu

¹ Nalyo sheeta Nndumi Iruva eshaamba na unyanga waasha, “Oshony kufii yeni mulyamaraa muri yeu. Oshony wo nndu na fisha fyakwe wokony.”

² Llya yeni vomi varindaru vakasha wooka na mwaango wa uwe ulya usumani na taari ya ndoo wo umwi eerye kisha kya imamita wokony lwakwe. Amwi nawo kweifo nndu umwi eree soori shimamiri, na wokony lwakwe erye kidao kitiri wiinu. Vakaanga kulya mmba ya iterevya, vakasalala mbai ya kitara kya arera kyeerasya.

³ Nalyo itumbe lya Iruva wa Israeli lyikooka alya uwe ya kerubi lyitiri maru, lyikasaama uwe fika kyeekony kya mmba ya Nndumi Iruva. Nndumi Iruva kavaanga nndu ulya eree soori shimamiri na kidau kya wiinu wokony,

⁴ kammbia, “Ira kunu nnang'ani ya muri wa Yerusalemu, kundevika kiring'isyo yefo kipala kya fisangu fya vandu vatinnywa na ifiira kimaruma kya makasha moose yaa aketanyika kunu muriny yeu.”

⁵ Naasa kavia valya vengyi yeny shiitye, “Ireny kunu muriny mwillatyaa mundewaa vandu; mulasari-se nta ilillya nndu umwi-fo.

⁶ Weeny vamiku yoo kweni, vakoo vakyuumi na vakyika vana vadu na vaka; indi valya woose vatiri kiring'isyo, mulavapaani-fo.” Mmbo mupooka alya kwakwa. “Naasa vakapooka na vamiku valya vekee mbee ya mmba ya Nndumi Iruva.”

⁷ Kawavia, tefuseny mmba yeeterevya na ishureny minyinga efo ndaleny “Endeny na mbee.” Naasa vekeendaa na mbee iwaa vandu yefo muriny.

⁸ Kyeeri vekewaa vandu sharewa-fo yeny shimuni, shawa-si kifulufulu shaiya shaamba. “Ale Nndumi Iruva, mmbo kumamita nsasaro va vandu va Israeli kyayiinutya ngapo yafo kunu Yerusalemu?”

⁹ Nawe kashivia, “Mitannyi ya vandu va Israeli na vandu va Yuda mmbo yammillannya kyeeso deny. Uruka mmbo lwammishwa samu na muri ukaishwa ilama, mashika mmbo vakeyaamba, ‘Nndumi Iruva amiisityo-u uruka; Nndumi Iruva nnyalollye-fo.’

¹⁰ Kyakwa yeny, nshilekeyaa nta ilillya-fo; mmbo shivatannya kyikwaani na mitannyi yaawo.”

¹¹ Naasa nndu ulya eree soori shimamiri atiri na kidao kya wiinu, kawuya kaamba, “Shammairunda ngata kuleshivavasya.”