ESEKIELI 8 - BIBILLYA Mareiyo Meele a Iruva

Mwiindye wa maruva a wongo Yerusalemu

¹ Kwikee mwaaka wa karindaru, nkonu karaanu wa mwiiri wa karindaru, shikee kyeny kwakwa amwi na vasongoru va Yuda, paripari shaolokywa ni finya ta Nndumi Iruva.

² Llya shalola, shalollya kindo kivakye nndu. Kupookya kisi kuwuye si mmbo kyeevakye muro, na kupookya kisi kuwuye uwe, kyikavaka arera shisangye ikavarama.

³ Kaorrwa kindo sha woko kashitira iputu lya fii takwa, Mumuyo wa Iruva ukashiipoiyo uwe, nnang'ani ya uruka na nginii-u, ukandeshifita Yerusalemu yooryeny lya Iruva. Shandefitwa ando kutiri mwaango we yaanga neefo kisafu nnang'ani ulollye taari ya ndoo ando kukee kuvike mafwanu alya Iruva asuuye.

⁴ Itumbe lya Iruva wa Israeli lyeiiyo; lyivakye llya shelollya yooryeny kulya imungony.

⁵ Naasa nawe kashivia, “Yewe mwana wa nndu, lola taari ya ndoo.” Neeny shalola taari ya ndoo, neefo taari ya ndoo ya mwaango ulya wa kitara ando kweerasya, shalollya-u ifwanu llya Iruva alyisuuye.

⁶ Naasa, Iruva kashivia, “Yewe nndu, ndesa, kulollye mbony yeti vakeetana, utefusu uniini indi lukeetanwa ni mmba-Israeli, naambo vakooye ishaanta kunu kundo kwakwa kweekaa? Nalyo irisha kulollya utefusu lungyi uniini mmwasi.”

⁷ Naasa kashirwaa kashifita alya mwaangony wa ndala. Shikilola, shalollya ando kudoshe isimambeny.

⁸ Nawe kashivia, “Yewe mwana wa nndu, dosha isimamba yelyi.” Neeny shadosha, shalollya kweiyo mwaango.

⁹ Nawe kashivia, “Anga-fo kulollye makasha maniini yoo vaketana yefo mmba.”

¹⁰ Naasa, shaanga shalollya mafwanu a makuru na a mafisi a wo ngata makasha, na mafwanu epasha moose a maruva a wongo a Vaisraeli aringitye isimamba lyoose.

¹¹ Mbee ya mafwanu yoo kukasalala-u vamiku vasongoru makumi mfungare va Israeli amwi na Yaasania mwana wa Shafani. Wo umwi mmbo etiri sheteso wokony, na nsu wa ubani ukasaama ulella uwe.

¹² Naasa Iruva kashivia, “Yewe mwana wa nndu, kwalollya yekyo vamiku va Israeli vakeetana yefo ireeminy, wo nndu yefo kirieny kyakwe kya mafwanu? Veshaamba wai Nndumi Iruva nnyalulollye-fo. Nndumi Iruva ammisityo-u uruka.”

¹³ Nalyo kashivia, “Irisha kulollya makasha maniini mmwasi vakeetana.”

¹⁴ Naasa kashiipo fika mwaango wa taari ya ndoo wa mmba ya Nndumi Iruva. Kulya lukakooya-fo vaka vakeerembo veiyyaa Tamusi.

¹⁵ Iruva kashivia, “Yewe mwana wa nndu, kwalollya mbony yeto? Irisha kulollyaa makasha engyi maniini mmwasi.”

¹⁶ Lyingyi kashirwaa fika ndaleny ya mmba ya Nndumi Iruva. Kulya mwaangony wa mmba ya iterevya, nnang'ani ya mwaangony na alya kitareny kyeerasya kweiyo ando a vomi makumi avii na varaanu, vekapye mungo mmba ya iterevya, na fisangu fyawo fiilollye taari ya ngama. Mmbo vekeyiindya mwi veelollye taari ya ngama.

¹⁷ Iruva kashivia, Yewe mwana wa nndu, ndesa kwallollya mbony yeto? Naakwa nnyendo, vandu va Yuda mmbo valollye sheelyi makasha yoondo ni kindo kya tangalu. Mmbo vakeishura ilama urukeny na ishifuluta ngoo yakwa. Lola ndesa vakee yoondo, mmbo vanshifuluta ngoo kikailannya.

¹⁸ Kyeendwa ni mbony yeto, mmbo vashiita irio lya ngapo ishuuka kwakwa. Nshilekeyaa nta umwi naturunye nta insarya-fo. Naakwa vashifuuya na unyanga waasha kyi-kwi, yeny nshivaarannyaa-fo.