ESEKIELI 6 - BIBILLYA Mareiyo Meele a Iruva

Kya vaiinndya maruva a wongo

¹ Irero lya Nndumi Iruva lyikashisheya lyikaamba,

² “Yewe mwana wa nndu, ipoo miso kulole mafumbu a Israeli, kwaawuye ukisuku.”

³ Kwaambe: Aranyiny irero lya Nndumi Iruva, yeni mafumbu a Israeli. Ni indi Nndumi Iruva aamba kyaany yeni mafumbu na fidooro, kundo mukuumbye na yefo mamungony, lola mmbo shishaa na usu yeny shimuni shishelyamara kundo koose kwa uwe yefo mutannyi fitara fyany fyeerasya.

⁴ Fitara yefyo fyany fyeyiindya maruva a wongo mmbo fishefishwafishwa, na minying'a isheerwa mbee ya mafwanu a maruva any.

⁵ Minying'a ya vandu va Israeli shisheyaara mbee ya mafwanu awo na maffwa any shisheanyanyata nringityeny wa fitara fyany fyeerasya.

⁶ Wo ando mukai yefo miriny yaany mmbo kushevaa ukiva, na ando any a uwe kwa yiinndya kushewunduwaa, fitara fyany fyeerasya five ulyamaro na urumato, mafwanu any a wongo mmbo afishwaa na ilyamarwa. Ando kwany kweefumbirya ubani kushewunduwa na wo kindo mutannye kirumatwa.

⁷ Minying'a ya valya vashewaawa mmbo vashewaa nnang'ani yaany llyo mushemanyaa sheelyi yeny mmbwe Nndumi Iruva.

⁸ “Kya indi-lyo, shishesaarisaa-fo maata na muu, nnang'ani yaany yewo vasheturunyaa muu iwaawa mmbo vashekwaana urukeny koose.

⁹ Wo mmbo vasheshikummbwa yeny nnang'ani ya vandu yewo va masanga kundo vanyanyakye veriywa mifungwa. Vakummbwaa ngata shilevakapa kyeendwa ni mirima yaawo ilatiri kikusiryo ikashaaluka, ikalema ishivika nsia, vakandevika nsia mafwanu a wongo. Kweekyo mmbo vashekuswaa wo veni kyeendwa ni weesi lwawo vatannye.

¹⁰ Llyo vashemanyaa sheelyi yeny mmbwe Nndumi Iruva, na nshileuta ukisuku lwakwa kya ruu sheelyi shiwawoyaa na ngapo-fo.”

¹¹ Nndumi Iruva kashivia indi, “Kakapa maako, kapa ntiri na urende kwishaamba, woshi lwany Vaisraeli! Kimaruma kya makasha any moose, mashika mmbo muwaawa na usu, shaa na ndwari shikasha.

¹² Yeto akee kwaasha deny mmbo awaawa ni ndwari. Na yeto akee kufii, mmbo awaawa na usu, Yeto asaafo na iturunya yoo moose avii mmbo awaawa ni nshaa. Ni indo nshoora unyafi lwakwa yefo kwany.

¹³ Kyeeri minying'a yaawo ishekooywa ilele nnang'ani ya mafwanu a maruva awo a wongo, yefo kundo kwawo kwa uwe kweerasya, uwe ya wo kidooro na ifumbu, kwasi ya wo nri mbisi, si ya iraringa lyitiri maru, na wo ando valemmuutya kiraso kitiri nrungo nsha ukasennya mafwanu yoo awo a maruva a wongo, llyo meendi mushemanyaa sheelyi yeny mmbwe Nndumi Iruva.

¹⁴ Mmbo shishoorwa woko lwakwa uwe yaawo, na ilyamara uruka lwawo. Kupookya taari ya sinde yefo kasa koomu kundefika muri wa Ripla taari ya ndoo, mmbo shisheallwa uruka lwawo luve irama, valalollya ando kweekapa mungo, llyo vamanyaa sheelyi yeny mmbwe Nndumi Iruva.”