ESEKIELI 46 - BIBILLYA Mareiyo Meele a Iruva

Mangyi kyeeri kya sukukuu

¹ Yeny Nndumi Iruva, mmbo shaamba indi: Mwaango yeto wa nnang'ani wa ulale, yeto ulollye taari ya ngama mmbo ushevaa nraye, mikonu myoose irindaru ya mashora. Mikonu ya Sabato na mikonu ya ukombe lwa mwiiri mmbo ishevaa mirue.

² Mangyi mmbo ashaanga efo ulaleny lwa nnang'ani eera na yoo mwaango wa ulale yelo. Nawe mmbo ashesalala kufii na kyeeko kya mwaango, kyeeri vakoani veefo vaniinngyaa firaso fyeemamitwa, na firaso fya urilalyi. Nawe mangyi ashefiirya ndi alya mwaangony; Nawe mmbo ashesomuka poo, lyo ngiri nkonu piti nnyisheraywaa-fo; kupookya ngama kufike nkwaany.

³ Vandu va uruka woose, mmbo vasheshiindyaa yeny Nndumi Iruva alya mwaango we-yaanga ulaleny ukai kyeeri kya nkonu wa Sabato na kyeeri kya ukombe lwa mwiiri.

⁴ Kiraso kyeekora yekyo mangyi ashekooya iniingya kwa Nndumi Iruva, nkonu wa Sabato ni ngurana ta moonri irindaru na suva imwi, filatiri mfere.

⁵ Amwi na suva imwi, mmbo asheende kiraso kya nswa kilo ikumi na mfungare na kyenga, amwi na ngurana ya yoonri, mmbo asheengera-u kiraso kyingyi kyoose ngata ashiidimaa. Na wo kiraso kya nswa, mmbo asheende lita isaru ta mafura.

Ukombe lwa mwiiri

⁶ Kyeeri kya sukukuu ya ukombe lwa mwiiri mmbo asheniingya ngashe ya shau na ngurana ta moonri irindaru na suva, filatiri mfere.

⁷ Ngoleta yeyo isheniingyo amwi na suva imwi ya kiraso ni kuti kuve-u kilo ikumi na mfungare na kyenga ta mafura amwi na wo ngurana ya yoonri kuve-u na kindo kyingyi kyoose mangyi asheniingya. Na wo kiraso kya fimu mmbo asheniingya lita isaru ta fimu.

⁸ Kyeeri mangyi ashaanga mmbo ashiiraa mwaango ulya weyaanga ulaleny, na kyeeri kya isomuka mmbo ashiiraa mwaango ulya mweni.

⁹ Kyeeri vandu va uruka vashaa kwa mangyi, nkonu wa sukukuu imwiindya, ulya ashaanga na mwaango wa taari ya ndoo ni kuti asomuke na mwaango wa taari ya sinde, na ulya ashaanga na mwaango wa taari ya sinde, mmbo ashesomuka na mwaango wa taari ya ndoo; nkwiifo nndu ashesomuka na mwaango ulya aanga nato-fo, mmbo ashesomukaa poo, na kulya akeelola.

¹⁰ Kyeeri vashaanga mmba mangyi mmbo ashaanga kimwi nawo; na kyeeri vashesomukaa poo, nawe mmbo asomukaa poo.

¹¹ Kyeeri kya mikonu ya sukukuu eyo ikee mideesye ya iniingya firaso fya fimu ni lita ikumi na mfungare amwi mafura na ngashe ya shau ao suva amwi na kindo kyingyi kyoose ekyo ashiidimaa iniingya. Wo kiraso kya nswa, mmbo aniinngya lita isaru ta mafura.

¹² Kyeeri mangyi akunda, yuutya Nndumi Iruva kiraso, ao kive kiraso kya imamitwa ao kiraso kya urilalyi mwaango wa taari ya ngama mmbo uvaa nrue; nawe eedimii iniinngya kiraso kyakwe kyeemamitwa ao kya urilalyi ndesa atanaa nkonu wa Sabato. Naasa llyo asomukaa poo, nawe kamma isomuka, llyo mwaango uraywaa.

Firaso fya wo nkonu

¹³ “Wo nkonu ngama mmbo aniinngyaa ngurana ya yoonri ya mwaaka umwi, ilatiri mfere, ive kiraso kyeemamitwa.

¹⁴ Nalyo mmbo asheniinngya kiraso kya fimu wo nkonu ngama kyenga kyimwi kya firindaru kya fimu, na kyenga kyimwi kya firaru kya mafura akee masasande na nswa kive kiraso kya fimu kwa Nndumi Iruva. Elyi ni ivavaso lya llung'anu kwa kiraso kya Nndumi Iruva.

¹⁵ Kiraso kya ngurana ya yoonri, nswa na mafura, ni kuti finiinngywa wo nkonu ngama kwa Nndumi Iruva llung'anu.”

Mangyi na uruka

¹⁶ “Nndumi Iruva aamba indi: Kwakooya mangyi aniinngya umwi wa vana vakwe kyaamba kyuuka efo maseeny akwe, mmbo kyishevaa kya vana vakwe, mmbo ashevaa masaa awo vakee vaniinge.

¹⁷ Indi kwakooya mmbo aniinngya masaa yoo ooka efo maseeny akwe kwa umwi wa mashinga akwe, kyaamba ekyo mmbo kyivaa kyakwe kutani mwaaka ulya wa iva lleke wafika. Llyo kishewuyaa kwa mangyi asheviirya vana vakwe ekee ni ding'u yaawo.

¹⁸ Mangyi naleepo kyaamba kya nndu tere-fo. Kyaawu kyoose ekyo aniinga vana vakwe ni kuti kyuuke efo kyaambeny kyakwe muni. Naambo kulasheeva-fo nndu, nta umwi asokwa kyaawu kyakwe.”

Mariko a mmba ya Iruva

¹⁹ Naasa nndu ulya kandeshiita ando kutiri mwaanya, shandaanga kulya firieny fyeele fya vakoani, fya taari ya ndoo, kufii na mwaango wa taari ya sinde wa ulale lwa nnang'ani. Kandeshoora ando taari ya ngama ya firia filya.

²⁰ Kashivia: “Yaandi nng'u ando vakoani vakorya nyama ta firaso fyeyuuta mwaandu, firaso fyeyuuta ulyamari, neekora firaso fya fimu. Kweekyo mmbasomukaa poo ya ulale veerye kindo kimwi-fo, naambo vandu valasheeva vatefusu kweepaana kindo kyeele.”

²¹ Naasa kandeshifita kulya uvasheny lwa poo, kandeshiita kufii na ndumba tilya yiinya ta ulale. Wo ndumba ya ulale kweiyo uvasha.

²² Kweekyo ndumba yeto yiinya, mmbo teetiri fivasha vidu fiina, fitiri waasha lwa mita makumi avii na ivari lya mita ikumi na isaanu.

²³ Wo kyivasha kimwi, mmbo kyekee kiringyitye ni isimamba, na ando kweyaatya muro usumanu na isimamba.

²⁴ Nndu ulya kashivia: “Yaandi mmariko ando varundi va mmba ya Nndumi Iruva, vashekoryaa firaso efyo fisheendwa mmbandu.”