ESEKIELI 44 - BIBILLYA Mareiyo Meele a Iruva

Mashora a mwaango wa taari ya ngama

¹ Naasa nndu ulya kashiviira numa kulya mwaango wa taari ya ngama afii na alya ando kweele, nato wekee nraye, kashivia;

² “Mwaango yeu mmbo uraywaa; ularuwaa, nta kuleefo nndu ashaanga nato; mashika Nndumi Iruva, Iruva wa Israeli aleanga nato. Kweekyo mmbo uraywaa.

³ Ni nsongoru-nsi ashiidimaa yaanga neelya shoonga mbee ya Nndumi Iruva, ashiidimaa yaanga, nesomuka na yaa mwaangony yeu mweni.”

Ngata yeyaanga efo mmba ya Iruva

⁴ Nndu ulya kasheende mbee ya mmba ya Iruva; ashiita na mwaango wa taari ya ndoo. Shiikilola shalollya itumbe lya Nndumi Iruva lwiishwe yefo mmba ya Nndumi Iruva. Nalyo shawa-si kifulu-fulu.

⁵ Nawe Nndumi Iruva, kashivia, “Yewe mwana wa nndu; tira nisha yefi fyoose kulollya na miso afo, neefyo kushiita na maarwi afo, efyo fyoose shikuvia, fikwaani na uramba elo lukwaani ilatywa, lwa mmba ya Nndumi Iruva, mavavaso moose, kutira nisha yewo vasumani yaanga kunu mmba ya Iruva, na valya woose valakunndywa yaanga-fo.

⁶ Mmbo kuvia vandu yewo valyang'a va mmba ya Israeli Iruva Nndumi mmbo aamba: Yewe, mmba ya Israeli, rumbuyeny ngyulyamari tany, mwantefusa irina lyakwa, mwukawarya na yiinndya vandu veny,

⁷ valakee varini nrima na nyama, mukeetefusa mmba yakwa elyi mwashuutya shoonga yakwa, mafura na samu mukafisha kyaasa kyakwa, na kya mmwasi, ngaa yaany shikasha.

⁸ Mukalema yiinndya yefyo shilemurambikya, mukareeya vandu va masanga engyi.

⁹ Kweekyo, Yeny, Nndumi Iruva shaamba; nkwiifo mwiny, alakee nrini nrima na nyama, veny woose, yewo vakee nnang'ani a vandu va Israeli ashaanga mmba yakwa-fo.”

Valevi vansokwa ukoani

¹⁰ Valevi valya valeshikapa mungo; vakeera kwaasha neeny, velatyaa mafwanu a wongo, a Vaisraeli, ngapo yaawo vasheilolyaa.

¹¹ Vashiidima yaanga na ishifurukannya yefo mmba yeeterevya, naakwaa niindesalala yoo mwaangony wa yaanga yefo ngiriny ya mmba ya iterevya, neerunda-fo mashora engyi, vashiidimaa iniingya naakwa ni firaso fyeekora, efyo fyeendwa ni vandu, neevarundya-deny.

¹² Indi kimmba valevika mwiindye wa mafwanu vakateere Israeli ni kuti vakooye ngapo; ni Yeny Nndumi Iruva shaamba.

¹³ Mmukishaa-se kufii na yeny ishirunndya sha vakoani-fo, nta ishefika kufii na findo fyakwa fikee fyeele na fyeele-fo. Nawo vashesuka-deny kimaruma kya mitannyi yaawo valetana.

¹⁴ Lla yelyi kyava indo, shishevaniinga mashora esalallya yefo mmba ya iterevya, na irunda-fo mashora engyi moose yoo akwaani efo mmba eyo.

Vakoani

¹⁵ “Indi vakoani va ufyari lwa Levi, vana va mmba ya Sadoki valya vekee ishifurukannya kyeeri kilya vana va Israeli valeshikapa mungo, yewo mmbo vasheengyera ishifurukannya ishiniinga mafura na samu; ni Nndumi Iruva aamba;

¹⁶ mmbo vashaanga yoo ando kwakwa kweele, yewo vashaanga yoo masapahuny ishifurukannya.

¹⁷ Kyeeri vashaanga yefo ulaleny nnang'ani mmbo vasheraa soori ta kitani, mmbasheraa soori ta sufu-fo kyeeri vakeerunda efo ulaleny na yefo mmba-fo.

¹⁸ Mmbo vasheraa fitambaa fya kitani mirweny yaawo, na kansu ta fitani fisiny fyawo, ilatiri mikanda, naambo valesheiita nrike nnu.

¹⁹ Kyeeri vashesomukaa yefo ulaleny lwa poo, mmbo vashuuta-fo, soori tilya ta mashora veree vativike yefo mmba kundo kweele. Ni kuti varee soori tingyi naambo vandu valesheeva vatefusu kyeeri elyi vandu vashepaana soori tawo.

²⁰ “Mbakuraa fii-ta mirwe-fo, lyo mmbaraa tive shaasha-fo, mmbashuutaa tive shifii.

²¹ Nkoani nalani mfinyu kyeeri ashaanga yefo ulaleny lwa nnang'ani-fo.

²² Nkoani nnyatiri muumu wa yoora nka wa dingu-fo, nta nka alakanisyo na mmi. Mmbo ashoora mwana wa kyeny wa mmba ya Israeli. Ao nka akeemfiiye ni mmi ekee nkoani.

²³ Mmbo vasheloshaa vandu vakwa kilasha kiiyo nnang'ani a findo fyeele na filakee fyeele. Neewoora ngata ya itambashwa findo fitefusu na filakee fitefusu.

²⁴ Kukasha-fo ngusanu, mmbo valetaa myaandu eyo velatyaa mavavaso na uramba lwakwa. Kyeeri kya mikonu ya suku-kuu mmbo valatya uramba lwa mavavaso na yiinndya mirumbuye yakwa na yuuvika mweele nkonu wa Sabato.

²⁵ Mmbafikaa kufii na nnying'a-fo, naabo valashekutefuse elyi vafika kufii na nndu afiyye, ekee ni ndeeye ao mmaye, ekee mwana wa kyuumi ao mwana wa kyika, ekee mwanamaye ao mfwamaye nalendeorwa mmbo vashiidimaa ikutefusa veni.

²⁶ Na ando a mikonu mfungare ashekwiilyisa lyingyi.

²⁷ Kyeeri nkonu yeto asheenda alya ando kweele efo ulaleny lwa nnang'ani, indefurukannya alya ando kweele, llyo asheniinngya kiraso kya ulyamari, ni Nndumi Iruva aamba.

²⁸ Nkushevaa-fo muyading'u-fo, mmbasheniingwa kindo kunu Israeli-fo yeny mmbwe ding'u yaawo.

²⁹ Mmbo vashelyaa firaso fya nswa, firaso fya yuuta ulyamari, na firaso fya yuuta mwaandu. Wo kindo kyikee kyivike kyeele kwa Iruva efo Israeli mmbo kyivaa kyawo.

³⁰ Na mailullyo any a fimu fya mbee a wo ngata, na firaso fyany fya wo ngata shoose, mmbo musheniingaa vakoani. Mmbo musheniingyaa vakoani shoonga yaany ya mbee, naambo mmba tany tikooye ivikywa mbora.

³¹ Nkwiifo muumu nkoani nalye ndeye ao ifisi lyifiiye lyeni, ao lyaratuwa ni ifisi lya ngoroshony-fo.”