ESEKIELI 36 - BIBILLYA Mareiyo Meele a Iruva

Mbora ya Israeli

¹ “Neewe mwana wa nndu, avuya kyisuku mafumbu a Israeli, kwaambe, ‘Yeni mafumbu a Israeli arannyiny irero lya Nndumi Iruva.

² Nndumi Iruva mmbo aamba: Kyimaruma kyany, nkiduva mmbo aamba: Ando alya kwa kasha, kukee uwe, mmbo kwammba kweru.’

³ Kweekyo awuya ukyisuku kwaambe; Nndumi Iruva aamba: Kimmba vandu valemwaallwa vakiva, vakamukapa wooka wo taari toose, naambo mukooye iva mifungwa a vandu na masanga engyi, mukasheva kindo kya tangalu neetatalwa nnang'ani a vandu;

⁴ kweekyo yeni, mafumbu a Israeli; aranyiny irero lya Nndumi Iruva; Nndumi Iruva mmbo avia mafumbuu na fidooro, ngyusoka na mamungo, kasa koomu na miri ikee marama, mukakamarwa mifungwa, mukeenyalwa ni masanga moose afiitani neeni.

⁵ Kweekyo, Nndumi Iruva aamba, ni kya dede, mmbo shisuuye kyikailannya, kweekyo mmbo shirikaa ngapo kwa masanga engyi moose, Edomu shoose. Wo mmbo vefurye yefo miriminy yaawo, vakatira kyiila, vakakamara uruka lukee lwakwa luve lwawo.

⁶ “Kwekyo, yewe nndu, awuya ukyisuku, kya uruka lwa Israeli; kuvie mafumbu na fidooro, ngyusoka na mamungo, sheelyi yeny, Nndumi Iruva; mmbo sharera shiisuuye kyikailannya, mashika yelyi muleararwa ni masanga moose; kweekyo Nndumi Iruva aamba;

⁷ Ni kya dede masanga yoo moose afiitani neeni mmbo ashekooyaa ngapo ing'ani;

⁸ “Kyaindi yeni, yee, mafumbu a Israeli, mmbo mushepara maa tany, musheniinga vandu vakwa Israeli ndunda tany, mashika nikufii vashe kyeny.

⁹ Mashika, mmbo shikee taari yafo, shikweekye irema neevaaya;

¹⁰ na vandu vafo veengyereke, va mmba shoose ya Israeli; miri myoose ishekaywa ni vandu, na kundo koose kuwundukye, kushetanwa wiiya.

¹¹ Vandu na findo fya mmba fishefumbukaa, fyeengereke na ifwarika, musheva veni uruka shallya mweifo kasha, shishemutannya kilandelollywa lyingyi. Llyo mumanyaa sheelyi yeny, mmbwe Nndumi Iruva.

¹² Shishemweengye lyingyi vandu vakwa Israeli vashekaase kunu urukeny yelu, lusheva ding'u yaany, nta vana vany valakaa vawaawa lyingyi kupookya inu.

¹³ Nndumi Iruva aamba indi: “Vandu mmbo vakuvyaa, yewe uruka, mmbo kulyee vandu, mmbo kufusaa vandu na isanga lyafo kumuni.

¹⁴ Kyeendi kupookya ulaalu, nkukyivaa mwiiwa vandu-fo, nta mwiifusa vana va isanga lyany-fo, ni Nndumi Iruva aamba;

¹⁵ Nta nshikuraa kwiite fyaararo fya vandu valatiri kikusiryo-fo, nta nkushesutwaa lyingyi mmbandu-fo; nta nkushevaa lyingyi nsindara kwa isanga lyafo-fo, ni Iruva aamba.”

Israeli yatanwa wiiya

¹⁶ Irero lya Nndumi Iruva lyikashisheya: lyikaamba;

¹⁷ “Yewe mwana wa nndu; kyeeri kilya vana va mmba ya Israeli vekee kulya urukeny lwawo veni, mmbo velutefusa na meengye na mitannyi yaawo, meengye yaawo usanguny lwakwa, ikavaka nndu nka akemmbike kyaanya kyeeri kya suku takwe.

¹⁸ Kweekyo, shapuswa nyashi yakwa uwe yaawo, kyimaruma kya ipuswua samu shiingyi urukeny, na utefusu lwa yiinndya maruva a wongo.

¹⁹ Shavanyanyata vakakwaana yefo masangeny na ngyurukeny koose, kyiinani na meengye na mitannyi yaawo niindo shewootya uvingo.

²⁰ Kyaindi kyeeri vefika kulya kundo veenda, yefo masangeny engyi, vakasuta irina lyakwa yeele, mashika vandu mmbo valevarera, vakaamba, ‘Vandu yeva ni vandu va Nndumi Iruva nawo mmbo wookye urukeny lwakwe.’

²¹ Kyaindi shavalilya kyeendwa ni irina lyakwa yeele yelyo mmba ya Israeli vellyitefusa yefo masangeny vemmira.

²² “Kweekyo vieny yewo va mmba ya Israeli; Nndumi Iruva aamba indi: Nshikeetana indi kyimaruma kyany-fo Israeli, ni kyimaruma kya Irina lyakwa yeele, yelyo mulelyitefusa yefo masangeny muleenda.

²³ Neeny shisheilyisaa irina lyakwa iniini, yelyo lyiletefuswa yefo masangeny, mukalyaamba utefusu, nnang'ani yaawo, llyo masanga amanyaa sheelyi yeny mmbwe Nndumi Iruva, ni Nndumi Iruva aamba, kyeeri shisheilyiswaa nnang'ani yaany velollye.

²⁴ Mashika mmbo shishemuutaa nnang'ani ya masanga, neeny shishemusangirya shindemuuta yefo ngyurukeny toose, shindemuviira yefo urukeny lwany muveni.

²⁵ Shishemufwallya mura mmbaramu mwiile pyai, shishemusangya kirinda kyany kyoose na mafwanu any moose.

²⁶ Mmbo shimuniinga nrima mwiiya shishevika mumuyo mwiiya nnang'ani yaany. Shishoota-fo nrima yeto wa iwe ukee nnang'ani ya mwiili wafo, neeny shishemuniinga nrima wa nyama.

²⁷ Neeny shishevika mumuyo wakwa nnang'ani yaany, na imutetera yefo mavavasony akwa, neeni musheindya uleti lwakwa, na ilurunndya mashora.

²⁸ “Neeni mushekaa kulya urukeny shileniinga vande waany, neeni muve vandu vakwa, neeny shive Iruva vany.

²⁹ Neeny mmbo shimukyiraa mulakane na uravi lwany loose, shimweengerye nganu tany tifumbuke nta mmulyiwaa nshaa lyingyi-fo.

³⁰ Shishemweengerya ndunda ta miri na fimu fya mareminy, naambo mulakooye yaararwa lyingyi mmbandu va masanga kyimaruma kya itura shoonga.

³¹ Llyo mushekummbwa shia tany shikasha, na mitannyi yaany ilakee misha, neeni mushesukywaa miriminy yaany na usanguny lwany kyimaruma kya makasha any na iswa lyany.

³² Manyiny sheelyi, nshiketana indi kyimaruma kyany-fo, ni Nndumi Iruva aamba, sukeny mukaalashika kyimaruma kya ngaa yaany shikasha, yeni va mmba ya Israeli.

³³ “Nndumi Iruva aamba indi: “Nkonu yeto shishemwiilyisaa, muuke yefo makasheny any moose, mmbo shishaallwa miri ikaywa ni vandu, neefo kuwundukye kutanwa lyingyi.

³⁴ Uruka lwekee nrapu lusheremwa, lla neelyi lwekee ukyiva, usanguny lwa vandu woose vekee yiira.

³⁵ Llyo vashambaa, “Uruka yelu, lwekee ukyiva lwammbaka nnda wa Edeny, na miri yekee sama, na ukyiva, na marama, ulaalu yantanwa wiiya na vandu vakasammya-fo.

³⁶ Llyo masanga afiitani neeni taari toose, vamanya sheelyi, yeny, Nndumi Iruva, mmbwe shiletana wiiya ando kweelyamarikkye, shavaya mbeu ando uruka lwekee ukyiva; ni yeny, Nndumi Iruva shaamba: neeny niindo shitanaa.

³⁷ Nndumi Iruva aamba indi: Kyimaruma kya mbony yei, mmbo shiveswaa ni vandu va mmba ya Israeli shivatannyi. Neeny shisheveengyera vandu vavake ironda lya moonri.

³⁸ Lyivake ironda lyammaideesywa sha ironda lya Yerusalemu kyeeri kya sukukuu tawo niindo miri yaany ishevaa, iishurwa vandu kulya kwemmba sama, ni yeny Nndumi Iruva, shaamba, neeny niindo shitanaa.”