ESEKIELI 35 - BIBILLYA Mareiyo Meele a Iruva

Ngapo ya Iruva ya Edomu

¹ Irero lya Nndumi Iruva lyikashisheya lyishaamba:

² “Yewe mwana wa nndu, enda kwafika ifumbuu lya Seiri,

³ kwaambe, Nndumi Iruva aamba indi: Yewe ifumbu lya Seiri, mmbo shishoorwa woko lwa ngapo uwe yafo, kushelolya ukyiva na ngapo niini.

⁴ Mmbo shilyamaraa miri yafo myoose, neewe kushelollya ukyiva, llyo kushemanyaa sheelyi yeny mmbwe Nndumi Iruva.

⁵ Mashika yewe mmbwe nkiduva wa mikonu myoose va vana va Israeli, kwashevasuya mwaandu, vakakooya ngapo shiniini kyeeri vekee ukyiveny, kyeendwa ni ulyamari lwawo.

⁶ Shaamba, yeny Iruva shiifo na muu ni kuti ufu lukukooye, ni kuti kufwe, nkushiidima ikutirisha ufu-fo, mashika yewe mmwiiwaa neewe ni kuti kufwe. Ufu mmbo lukekuruuya.

⁷ Niindo shishaallwa ifumbu lya Seiri lyive weeresi na ukyiva. Mmbo ashewaawa wo nndu ashiiraa kunu urukeny yelu.

⁸ Mmbo shishekwaanisa minying'a yefo mafumbuny afo, na yefo mamungony, neefo mireny yafo, mmbo isheeshwaa-fo minying'a yeyo ishewaawa na usu.

⁹ Mmbo shishekwaallwa ukyiva llung'anu, na miri yafo ilakaa ikaywa lyingyi ni vandu llung'anu. Llyo kumanyaa sheelyi yeny mmbwe Nndumi Iruva.

¹⁰ “Mashika mmbo kulaamba, Masanga yaa avii, na ngyuruka yeti ivii, mmbo tishevaa takwa; nato shishetishillya, lla neelyi Nndumi Iruva ekee nawo.

¹¹ Kweekyo mmbo shaamba indi, yeny Iruva shiifo na muu, mmbo shishekutannya kikwaani na nyashi yafo, amwi na nkuushu yeto kuleloora paa, woose mmbo vashelollya kyeeri shishekuutya uvingo.

¹² Neewe llyo kumanyaa sheelyi yeny Nndumi Iruva shammiita fyaararo fyafo fyoose kulaamba kya mafumb u a Israeli, kwishaamba, vamboywa ni ukyiva, vakarambikywa maakony eru luvalye.

¹³ Neeni mukakurosa uwe yakwa kwa kana kyany muveni, na yeengera marero meengyi uwe yakwa neeny shimuni sheeta.

¹⁴ Nndumi Iruva aamba indi: Mmbo shishekutannya kitere kuve ukyiva, na uruka loose lukooye ifura kyeeri shishekweengye ngapo.

¹⁵ Ngata ilya sheni kulekooya ifura kya ding'u ya mmba ya Israeli kyeeri valekooywa ni ngapo, niindo shishekutannya, kuwoywa ni ngapo, mafumbu a Seiri, na Edomu koose piny. Llyo kyeeri vamanyaa sheelyi yeny mmbwe Nndumi Iruva.”