ESEKIELI 34 - BIBILLYA Mareiyo Meele a Iruva

Veesi va Israeli

¹ Irero lya Nndumi Iruva lyikashisheya lyikaamba:

² “Yewe mwana wa nndu, niingya ukisuku kwa veesi va Israeli, kuniingye ukyisuku kuvavie, yee, kuvie veesi yewo, sheelyi Nndumi Iruva aamba; Woshiny llwa veesi va Israeli, yewo vakeelya veni, A nshi kyikwaani veesi veese moonri?

³ Mukalya alya avanndye mukaraa mafwaa a vayo, mukashisha alya avanndye, lyo mmukeiisa moonri-fo.

⁴ Mmukee ivavara alya mafwafwak, nta ishiisa alya atirwa nndwari, nta alya afikye marende mmulaafingya firami, nta mmuleviira alya aleumbutwa, nta mmuleruuya alya arekye, indi ni kwa finya na unyaasi mukeeashillya.

⁵ Nang'u akanyanyaka kyimaruma kya itura mwiisi; akaaluka shoonga ya mafisi a ngoroshony akanyanyaka.

⁶ Moonri akwa akaraa-raa mafumbuny moose, na uwe ya wo ando kutiri kyidooro kyaasha, yee moonri akwa, akanyanyaka wo ando urukyeny koose; nta kulakeefo nndu avesa mbony tawayo, nta iyaruuya.

⁷ “Naasany, yeni veesi, aranyiny irero lya Nndumi Iruva,

⁸ Nndumi Iruva aamba; Yeny, Iruva shiifo na muu, kimmba moonri akwa aleva nrapu, moonri akwa akava shoonga ta mafisi a ngoroshony moose, kyimaruma kuleifo mwiisi, nta veesi vakwa valaruuye moonri akwa, indi veesi vakakwiisa veni, valakunde yiisa moonri akwa;

⁹ kimmba niindo, yeni veesi aranyiny irero lya Nndumi Iruva.”

Ishora lya wo nndu

¹⁰ Nndumi Iruva mmbo aamba indi; Yeny, mmbwe muni veesi; neeny mmbo shivavesa moonri akwa maakony awo, na mashora yoo eeisa moonri shivasoke; nta veesi yewo, mmbakyikwiisa wo veni lyingyi-fo mmbo shisheturunyaa moonri akwa yefo kaniny kawo, alave lyingyi shoonga yaawo.

Mwiisi nsaari

¹¹ Yee; mashika Nndumi Iruva mmbo aamba indi; Lola yeny shimuni, yee, yeny mmbo shiruuya moonri akwa shiavavare shimuni.

¹² Ngata ya mwiisi akeruuya moonri akwe, ekee yefo nnang'ani a moonri alya anyanyakkye, niindo shisheruuya moonri akwa, yefo koose shikooya anyanyakye kyeeri kya mafishi a ireema.

¹³ Neeny shishewoota yefo nnang'ani a masanga shishevasangirya wooka ngyurukeny toose; shishevaviira yefo urukeny lwawo weni; neeny shisheveesa uwe ya mafumbu a Israeli, mbaambaa ya mifongo ya mira, na yefo urukeny koose kundo kutiri vandu.

¹⁴ Neeny shisheveesa mareny manuru, ando kwa uwe yefo Israeli nng'u kushevaa muriny wawo; yefo mmbo vashewonisaa muri nsha wa ilala yefo mafumbuu a Israeli.

¹⁵ Yeny mmbo shisheesa moonri akwa shimuni, neeny shishevaallya ando kusha kweelala, ni Nndumi Iruva aamba.

¹⁶ Neeny shisheruuya yewo varekkye, shisheviira valya vakeeranga-ranga yefo, shishevavara yewo vakee vafishefishe, shishevaniinga finya yewo valwee, neewo vavanndye na yewo vatiri finya, shishewootya uvingo.

¹⁷ “Neeni loleny kya mbony tany. Yeni va ironda lakwe, Nndumi Iruva, mmbo aamba indi; Loleny, mmbo shishesauwa nnang'ani yaany, mesha na makasha, suva na woro kyiwo.

¹⁸ A ndesa mmbo mwaallwa kindo kyaangu deny yeni ilya mare manuru kutani mwavavara na marende any alya asaau? Neena mura ukee nsha, neeni kutani mwalollya ni kindo kisha deny ifwalangya na marende any mura ulya wasaa-u?

¹⁹ Nkyo ni kuti moonri akwa alye mare yoo kwamma ivavara na marende afo; na ina mura yeto kwammeefwalangya na marende afo?

²⁰ “Kweekyo, Nndumi Iruva mmbo amuvia indi; Mmbo shisherummbwa mwaandu nnang'ani yaany, kya moonri atiri finya, na moonri yoo mafwafwa.

²¹ Mashika mmbo muleakunnya mbai kwa umbafu lwany na meeva na yeera alya alwee na mbembe tany, neengyi mukaanyanyatya yefo kwaasha.

²² Mmbo shisheasangiryaa yeny shimuni, nta nnyakivaa lyingyi shoonga yaany-fo, shisherummbwa mwaandu nnang'ani a yoonri na yoonri.

²³ Shishesauwa nndundi wakwa Davidi, nave mwiisi waawo, ashevaniinga mare manuru.

²⁴ Neeny Nndumi Iruva, shisheva Iruva waawo nawe Davidi nndundi wakwa, asheva mwiisi mwishillya waawo, Ni yeny Nndumi Iruva shaamba.

²⁵ Shishevikyana nawo kyaasa kya ilyilya, neyaantafo mafisi manyaasi nnang'ani yaawo, ashelala yefo ngoroshony, nta alapaanwa ni kindo.

²⁶ “Mmbo shishevaallwa vashekaa mbaa-mbaa ya ifumbu lyakwa yeele shivavikye mbora, shivaniinge mmbwa kwa fyeeri fya vayo, nato tishevaa mmbwa titiri mbora.

²⁷ Miri ya ngoroshony ishekooya ivika ndunda ta vayo, uruka nalo lushevevika fimu fya vayo, vashekaa na urilalyi yefo urukeny lwawo, llyo vashemanya sheelyi yeny mmbwe Nndumi Iruva, yelyi shisherummbwa mise yeyo ivafingye, neevaturunya yefo maakony a valya veevatuuro.

²⁸ Mmbakyivaa-se lyingyi mifungwa vandu va masanga, nta ilyiwa mmafisi a ngoroshony-fo, mmbo vashekaa kippwa-deny, nta kuleefo nndu asheveerevese.

²⁹ Shishevaniinga uteri, lutiri shoonga, valakaa valyiwa nshaa yefo urukeny lwawo, nta valakaa vateendwa lyingyi ni vandu va masanga.

³⁰ Nawo llyo vashemanyaa, sheelyi yeny mmbwe Nndumi Iruva, Iruva waawo, mmbo shikee amwi nawo, vamanye sheelyi, wo mmba ya Israeli ni vandu vakwa, ni Nndumi, Nndumi Iruva aamba.

³¹ Neeni, moonri akwa, moonri a ureny lwakwa ni vandu wakwa na yeny ni Iruva waany, ni Nndumi Iruva aamba.”