ESEKIELI 30 - BIBILLYA Mareiyo Meele a Iruva

Kyiiyyo kya Misri

¹ Irero lya Nndumi Iruva lyikashisheya lyikaamba;

² “Yewe mwana wa nndu, varwaaye ukisuku, kwambe, Nndumi Iruva aamba; Kapeny kyoorongye kya mavavio, ‘Woshiny llwa nkonu yeto!

³ Mashika nkonu yeto ukee kufii, nkonu wa Nndumi Iruva ukee kufii mmbo ushevaa nkonu wa mafishi kyeeri kya urumato lwa masanga.

⁴ Misri ishewoywaa ni ngapo shiniini, na ukyiva uniini lushevaa kulya Isopia, kyeeri vandu veengyi vashekooywa iwaawa kulya Misri, na masaa awo meengyi akooya yiipowa, na masimamba ashewunduwaa.’

⁵ Isopia, na Puti, na Ludi, na Arabia koose kushesanda Libya na vandu va ngyuruka yeto vasasangyi nawo woose mmbo vashewaawa na usu.

⁶ “Nndumi Iruva mmbo aamba: Yewo vashekooya yeekya Misri, mmbo vashewaa, na wiidimi valuvikye nsia mmbo lushanngwaa, kupookya Igdoli kundefika Sevene. Yewo mmbo vashewaawa woose, ni Nndumi Iruva aamba.

⁷ Nawo mmbo vasheva vakyiva nnang'ani ya ngyuruka yeto shikyiva, na miri ya vayo ikee yefo nnang'ani ya miri milyamare.

⁸ Naasa llyo vashemanyaa sheelyi yeny mmbwe Nndumi Iruva; Kyeeri shishekoraa Misri na muro, sanda na valya woose vamweekyaa.

⁹ Nkonu yeto ukamfika, mmbo vasarambuka vandu mbee yakwa wooka yefo merikebuny naambo Vakushi vakooye yeereya, yewo vakusarye sheelyi mmbo vatiri finya, ukyiva mmbo lushevawoyaa, kyimwi sha nkonu ulya wa Misri, mashika nkonu yeto, ukeesha!

¹⁰ “Nndumi Iruva mmbo aamba: Mmbo shishevikkyaa umasi lwa vandu va Misri umando, na woko lwa Nebukadnesa mangyi ya Babilony.

¹¹ We, amwi na vandu vakwe, amwi nawe, vandu va masanga, vaeresye, mmbo vasheendwaa, vaange yefo urukeny yelo, valulyamare, veepo ngyusu teekapana na Vamisri, na uruka lusheishurwa minying'a.

¹² Neeny shisheumisaa mira, na ikumba uruka yelu shiluniingye maakony a vandu vakasha. Shisheallwa uruka luve ukiva, na vandu vakee yefo urukeny yelo woose, vasheshillywa ni vandu veny, ni Yeny Nndumi Iruva sharera.”

¹³ Nndumi Iruva kaamba; “Mmbo shishelyamaraa, maruva a wongo, Memfisi kulakyikaa kulollywa-fo lyingyi mafwanu; neefo Misri kulakyikaa nooke-fo mangyi; na weeresi lusheva yefo urukeny lwa Misri.

¹⁴ Shisheallwa Patrosi ive ukiva, na Soani shiikoraa na muro, shisheutya Tebesi uvingo.

¹⁵ Neefo Sini shishepusuya-fo nyashi yakwa, neefo turuveny ya Misri, shishefwallya kwaasha nsemu yeto wa vandu va Tebes

¹⁶ Shishekora Misri na muro, na Sini isheva ukiva uniini, masimamba a Tebesi ashefikafikaa; na Nofu kushealaluka.

¹⁷ Vakoo va Oni, na Pi-beseti, vashevakapaa misa; na vaka vawo vashekamarwa mifungwa.

¹⁸ Yefo Tapenesi kushevaa ireema nsanyiny, kyeeri shifika iwundwa finya ya Misri yeyo vaivikye nsia; mmbo vashesikywa ni ituu; na vefu vawo mmbo vashekamarwaa mifungwa.

¹⁹ Niindo shishuutya Misri uvingo; nalyo vamanyi sheelyi, yeny mmbwe Nndumi Iruva.”

Ukyisuku lwa Farao

²⁰ Kwiike mwaaka wa ikumi na lyimwi, mwiiri wa mbee, nkonu mfungare, irero lya Nndumi Iruva lyikashisheya lyishaamba;

²¹ “Mwana wa nndu, shamfisha woko lwa Farao mangyi ya Misri, nta nkwiifo nndu aluvikya kirami, ao ilufinga naambo luidimi itira finya ya yiipo-se usu lyingyi-fo.

²² Naasa Nndumi Iruva kaamba indi: kweekyo mmbo shikemfisha maako moose, woko yelo lutiri finya na lulya lulefishwa na usu luuke maakony akwe luwe-si.

²³ Mmbo shinyanyataa Vamisiri yefo masangeny, vashekwaana ulaniny.

²⁴ Shikaarise maako a mangyi ya Babilony, shishemmbikkya usu lwakwa wokony lwakwe; indi we Farao mmbo shimfishaa maako, nawe asheongoraa sha nndu akapwa ifumu nyaminy.

²⁵ Mmbo shikaarisaa maako a mangyi ya Babilony, indi-we Farao maako akwe mmbo ashewaa; llyo vamanyaa sheelyi yeny mmbwe Nndumi Iruva. Kyeeri shishevikaa usu lwakwe wokony lwa mangyi ya Babilony, nawe mmbo ashoorwaa uwe ya uruka lwa Misri;

²⁶ naasa shinyanyate Vamisri yefo masangeny vandekwaana ulaniny koose. Naasa llyo vamanyaa sheelyi yeny mmbwe Nndumi Iruva.”