ESEKIELI 3 - BIBILLYA Mareiyo Meele a Iruva

¹ Kashivia, “Mwana wa nndu, lya yekyo kwaniingwa, lya moososyo yeu, kweenda irera na mmba ya Israeli.”

² Nalyo shatarammbwa kana kakwa, kashiniinngya moososyo ulya shilye.

³ Naasa kashivia, “Mwana wa nndu, lya moososyo yeu shikekuniingya kuwuutise nato ndeu yafo.” Naasany shaulya nato weetiri nrolo sha wa ukyi kaniny kyakwa.

⁴ Naasa kashivia, “Mwana wa nndu, kwiipoo kwanderera na vana va mmba ya Israeli, kundevavia marero yoo akwa.

⁵ Mashika nkwarumwa kwa vandu kuleeshi kishomu kyawo-fo, nta marero nshimoomu-fo, kya indi mmbo kusheendaa yefo mmba ya Israeli.

⁶ Nshi kwa mamwiingyi a vandu veny va fishomu fyuumu-fo. Indi kukooye shilekuruma kwa vandu va ngata yeyo, ni kya dede vekwaarannya.

⁷ Indi mmba ya Israeli mmbakwaarannya-fo. Mashika mmbakunndye ishaarannya-fo, mmba ta vana va Israeli toose mmbo tikee ta kiila na nrima muumu.

⁸ Lola shaallwa usangu lwafo numa lweerese ngyusangu tawo.

⁹ Ngata alumasi ikee shuumu, ikailannya iwe lya nkamakoti niindo shammekwallwa kuve nkaari! Kulaveereye nta kulaereswa ni fisangu fyawo-fo, mashika yewo ni mmba ya kinyala.”

¹⁰ Kya mmwasi kashivia, “Mwana wa nndu, marero shikekuvia moose, mmbo kushaarannya kwaavike yefo nriminy wafo, kwaarannye na maarwi afo.

¹¹ Naasa kweende kwa vandu vafo efo ushingeny, kundevavia sheelyi, ‘Yeny Nndumi Iruva shikeyaamba uve na uve!’ Vavie vakaarannya ao vakalema yaarannya.”

¹² Nalyo Mumuyo ukashirosa na-uwe. Lyaarafumwa itumbe lya Nndumi Iruva uka ando akwe! Sheeta unyanga numa yakwa luvakye kidina-si kiniini.

¹³ Llweekee unyanga lwa maru a fyuumbe filya fiifo na muu, ekupaanaa, amwi na unyanga lwa fireto filya fyekee kulya mbai ya vayo sha kidina-si.

¹⁴ Naasa mumuyo ukashisaamisa uwe ukashirwaa kwaasha. Sheenda shiisuuye neevaywa nriminy wakwa, na woko lwa Nndumi Iruva lwetiri finya nnang'ani yakwa.

¹⁵ Shandefika Tel-Abibu, kufii na mura ulya wa Kebari, ushingeny kundo vandu valya veekai. Shandekaa nawo ando a mikonu mfungare shiisongololoo.

Esekieli avaangwa nave nringyi

¹⁶ Masiyony a mikonu mfungare, irero lya Nndumi Iruva lyikashisheya iyaamba,

¹⁷ “Mwana wa nndu, mmbo shakwallwa nringyi wa mmba ya Israeli, naambo kyeeri kyoose kushiita irero lyuuka kaniny kwakwa, kuwaniinge mavavaso akwa.

¹⁸ Naambo yelyi shivia nndu llyamari, ‘Ni kya dede kufwaa,’ neewe kulankangayaa; ao immbya are ngaa yakwe shikasha, naambo nakire muu wakwe, nndu yeto mmbo afiyya yefo ulyamari llwakwe; indi lyo ni kuti shikuvesaa yeve samu ya muu wakwe.

¹⁹ Kya indi kwakooya kwavavasa nndu yeto nkasha nawe alakunde ira ulyamari lwakwe, ao ngaa yakwe shiravi, nndu yeto kafiyya yefo ulyamariny lwakwe; indi yewe kushekiraa muu wafo.

²⁰ Na lyingyi, kwakooya nndu nsumanu ateere katana uravi, na yeny shindemmbikya nsindara, nndu yeto mmbo afwaa. Kwakooya kulaore kulemmbavasa, mmbo afwaa kimaruma kya ulyamari lwakwe, indi mashora alya akwe mesha nnyakumbuwaa-fo. Indi-lyo samu yakwe ni kuti shikuvese yewe.

²¹ Indi-lyo kwavavasa nndu nsaari alasheetana ulyamari, nawe kara alalyamara ni kya dede yeto ashekkyaa, mashika alewarya mavavaso afo, na yewe mmbo kushekiraa muu wafo.”

Esekieli ava mbimbi

²² Woko lwa Nndumi Iruva lukakaa uwe yakwa; nawe karera na yeny, kashivia, “Kwipoo kweende kasa kundo kurambalalyi shisherera neewe.”

²³ Na yeny shakwipoo sheenda yefo kundo kulele, pari-pari shikee kulya shalollya itumbe lya Nndumi Iruva lyiselelyi sha itumbe llya shelollya shikee mbai ya mura wa Kebari, na yeny shawa-si kifulu-fulu.

²⁴ Indi Mumuyo ukashaanga ukashiseleesa shu, Nawe karera neeny, kashivia, “Enda kwandekuraya mmba kwafo.

²⁵ Indi yewe mwana wa nndu, lola kushevikwaa mise ya minya kushefingwa nayo naambo kulaidimi isomukya nnang'ani a vandu.

²⁶ Mmbo shishallwa ulumi lwafo tamba, kuve mbimbi naambo kulaidimi ivakangaya mashika ni va mmba ya ilang'a.

²⁷ Indi, kyeeri shishereraa neewe, mmbo shishetarammbwa kana kyafo, kushevavia, ‘Nndumi Iruva mmbo amuvia uve na uve!’ Na yeto ashaarannya, naarannye na yeto alemaa yaarannya navelema yaarannya mashika wo ni va mmba ya ilyang'a.”