ESEKIELI 29 - BIBILLYA Mareiyo Meele a Iruva

Ukyisuku kya Misri

¹ Kwikee mwaaka wa ikumi, mwiiri wa ikumi, nkonu ikumi na kavii, irero lya Nndumi Iruva lyikashisheya lyikaamba:

² “Yewe mwana wa nndu, enda kwa Farao mangyi ya Misri, kundemmbya kya ukyisuku yelu uwe ya Farao na Misri shoose;

³ rera kwaambe, Nndumi Iruva, mmbo aamba indi; Yeny, mmbo shikee kilasha neewe. Yewe Farao mangyi ya Misri, ishoka lying'ani; lyikwallye yefo mireny lyikaamba mura ni wakwa shimuni, ni yeny shisongosye,

⁴ mmbo shishekuvikya nreiyo yefo yuunduny lyawo, na makunga yoo akee yefo ngyusokeny tafo ashetirwa, na makunga moose yoo akee yefo ngyusokeny yeto mmbo ashetirwaa moose.

⁵ Neeny shikure nkiva kundeerwa kundo kwaasha, kasa koomu, yewe na makunga a mira yafo, kundewa kundo kulamiiye kindo, kulasangirywa, nta ivikwa ando amwi kurikwa, shikweere yefo, kundeva kyelya kya mafisi a ngoroshony na ndeye ta ng'iniiu.

⁶ “Llyo vandu va Misri vashemanyaa sheelyi yeny mmbwe Nndumi Iruva. Mashika yewe mmbwe vandu va Israeli vakuvikkye nsia, lyo nta kindo kushiidimaa ivaekya-fo.

⁷ Llya valekutira woko neewe llyo kulefika na meeva awo kwaranndwa moose, llya vekwaamira neewe kwafika kwareremisa fisi fyawo fyoose.

⁸ kweekyo Nndumi Iruva, mmbo aamba indi: Shisheende ngapo ya usu, vandu na mafisi ashewaawa

⁹ nalyo uruka lwa Misri, lusheva nrapu na kasa koomu kulamiiye kindo. Naasa llyo vamanyayeny mmbwe Nndumi Iruva. Mashika mmbo kwaamba, ‘Mura wa Naili mmbwakwa, ni yeny shiusongosye.’

¹⁰ Ulaalu yeny, mmbo shitiri mwaandu na yewe, na ngyusoka tafo, neeny mmbo shishallwa uruka yelu lwa Misri, luve ukiva na kasa koomu, kupookya Migdoli kundefika Sevene na nnyanuny wa Esopia.

¹¹ Kulasheekaa kwiiriwa, ni nndu nta ifisi lya ngoroshony nta kulasheekaywa ni vandu ando a myaaka makumi aana.

¹² Neeny nshishaallwa uruka lwa Misri luve ukiva, nnang'ani a ngyuruka tikee shikiva, na miri yavayo, mmbo ishevaa marama ando a myaaka makumi aana. Neeny mmbo shishekwaanisa Vamisri masangeny koose, neeny shishevararataa vakwaani yefo ngyurukeny shive na shive.”

¹³ Mashika mmbo Nndumi Iruva aamba indi, “Ando a myaaka makumi aana mmbo shishesangiryaa Vamisri shindewoota yefo nnang'ani a masanga a vandu kulya kundo vanyanyakkye.

¹⁴ Neeny shisheviiraa iviiri lyawo na Vamisri yewo vakee kyifingyony shishevaviira Patrosi, kundo vawonikye urukeny lwawo nafo mmbo vashevaa umangyi ufwafwa.

¹⁵ Mmbo vashevaa vafwafwa vailannyi mangyi toose, nta mmbakaa vasalale lyingyi uwe ya masanga-fo; mmbo shivasisaa naambo valaidimi-se ishillya uwe ya masanga.

¹⁶ Nta valakyivikwaa nsia ni vandu va mmba ya Israeli mmbo kyiveengye makasha yoo vatannyi akumbuwa, kyeeri vasheindukaa na illa numa yaawo; llyo vashemanyaa sheelyi yeny, mmbwe Nndumi Iruva.”

Babilony vatira Misri

¹⁷ Kwikee mwaaka wa makumi avii na mfungare, mwiiri wa mbee, nkonu wa mbee wa mwiiri, irero lya Nndumi Iruva lyikashisheya lyikaamba;

¹⁸ “Mwana wa nndu Nebukadnesa, mangyi ya Babilony mmbo aleniinga itorito lyakwe lya fira mashora moomu eekapana na Tiro, vakoota mirwe na weembe ikeela peru, meeva awo, akapushuka shonyi, kuleefo weesi lulooka Tiro, nshi wakwe nta wa itorito lyakwe, kya mashora alya valerunda-fo.

¹⁹ Naasa Nndumi Iruva kaamba indi: Mmbo shiniinga Nebukadnesa mangyi ya Babilony, uruka yelu lwa Misri, na vandu veefo woose, navakamare mifungwa, na umasi lwiifo loose, yekyo kishevaa ni weesi lwa itorito lwakwe.

²⁰ Shinninga uruka lwa Misri, kyikee ni weesi lwa mashora alya alerunda, mashika mmbo valerunda mashora kimaruma kyakwa; ni Nndumi Iruva aamba.

²¹ Nkonu yeto mmbo shishemiisya mmba ya Israeli wombe, neeny shishekuniinga finya ya irera nnang'ani yaawo, nawo llyo vamanyaa sheelyi yeny, mmbwe Nndumi Iruva.”