ESEKIELI 25 - BIBILLYA Mareiyo Meele a Iruva

Mirumbuye ya myaandu ya masanga

¹ Irero lya Nndumi Iruva lyikashisheya lyishaamba:

² “Yewe mwana wa nndu, indukya vana va Amoni kuvaavuya ukisuku kilasha kyawo.

³ Kuvie vana yewo va Amoni: Arannyiny irero lya Nndumi Iruva; Nndumi Iruva mmbo aamba indi; Kimmba kwaamba, a, kya ando kweele kwakwa, llya kuleambwa utefusu; na kya uruka lwa Israeli llya ulealuwa sama, na kya mmba ya Yadu llya valekamarwa mifungwa;

⁴ mmbo shikurambikya maakony a vana va taari ya ngama, kuve masaa awo. Vashetana-fo turuve kuve kundo kwawo kwekaa nnang'ani yafo; valye ndunda tafo, na ina malela afo.

⁵ Neeny shishallwa Raba kuve kundo kweyiisa ngamula na miri ya vana va Amoni kuve kundo kweyaara findo; llyo mumanyaa sheelyi yeny, mmbwe Nndumi Iruva.

⁶ “Mashika Nndumi Iruva mmbo aamba indi; Kimmba kwakakapa maako, na ikapa ntiri na marende afo, na ifura kya uruka lwa Israeli na umbafu loose lwa nrima wafo;

⁷ lolaany shammoorwa woko lwakwa kilasha kyafo, mmbo shikuniinngya kukamarwa mifungwa ni masanga, neeny shishekweera kwaasha na masanga a vandu; neeny shishekumamita kulakaa yefo ngyurukeny, shikumamite kushu. Llyo kumanyaa yeny, mmbwe Nndumi Iruva.”

Ukyisuku lwa Moabu

⁸ “Nndumi Iruva aamba; kimmba Moabu na Seiri vaamba, Lola, mmba ya Yuda ni kimwi sha mmba ta masanga engyi moose;

⁹ Naasany mmbo shisheniingya mwaanya kwa vana yewo va taari ya ngama vakee minyanuny na Moabu amwi na miri yeyo ifiitani nawo na itumbe lyoose lwa uruka yelo; Beti-yeshimoti, na Baal-meon, na Kiriataimu.

¹⁰ Nshisheniingyaa vandu va taari ya ngama sanda na vana va Amoni, vave masaa awo, vana va Amoni valakyikaa vakumbuwa-se nnang'ani a masanga.

¹¹ Neeny shisheutya Moabu uvingo, llyo vamanyaa shelyi yeny, mmbwe Nndumi Iruva.”

Ukyisuku lwa Edomu

¹² Nndumi Iruva aamba indi, “Kimmba Vaedomu vantana kilasha na mmba ya Yuda, vakataiya kiduva, mmbo vallyamara kikailannya, kya itaiya vandu yeva kiduva;

¹³ Kimmba niindo, Nndumi Iruva mmbo aamba indi, ‘Nshishoorrwa woko lwakwa uwe ya Edomu, shimamite-fo nndu na ifisi, nafo kushevaa kiiyo kupookya Temani kundefika Dedani woose vawaawa na usu.

¹⁴ Neeny shishevika kiduva uwe ya vandu va Edomu, kwa finya ya vandu vakwa Israeli yewo mmbo vasheshikapannya ando akwa yefo Edomu kwa ngata shitirwa nngoo na nyashi, nawo llyo vamanyaa itaiyya kiduva kyakwa, ni Nndumi Iruva aamba.’”

Ukyisuku lwa Filistia

¹⁵ Nndumi Iruva aamba indi: “Kimmba Vafilisti vatana mbony yei, kimaruma kya itaiya kiduva, nawo vakakutaiyya kiduva na nrima wa umbafu imamita na ukyiduva lwa llung'anu;

¹⁶ kweekyo nndumi Iruva mmbo aamba indi, Shakuvia mmbo nshoorrwa woko lwakwa uwe ya Vafilisti, neeny shivarumate Vakereti na ilyamara valya washesaa mbaambaa ya yeeve.

¹⁷ Mmbo shishevataiya kiduva king'ani, shishevakyeemya na unyaasi; llyo vamanyaa sheelyi yeny mmbwe Nndumi Iruva, kyeeri shishevataiyya kiduva.”