ESEKIELI 24 - BIBILLYA Mareiyo Meele a Iruva

Nungu ikeekukuna rukony

¹ Kwikee mwaaka wa kyeenda, mwiiri wa ikumi na nkonu ikumi, irero lya Nndumi Iruva lyikashisheya lyishambaa;

² “Yewe mwana wa nndu, reiya irina lya nkonu yeu, inu mangyi ya Babilony amma illyingya Yerusalemu nkonu yeu wa inu.

³ Enda rera kwa fyaaso mmba ya kilemi kuvavie Nndumi Iruva aamba indi ‘Temira nungu rukony, itemire kwavika-fo na mura,

⁴ vika-fo nyama ta maveto yeti shisha, kisouwa na masingiri; kuishure-fo maffwa atiri nshesha.

⁵ Sauwa suva shisha yefo irondeny lya moonri, kundetemira nungu ya maffwa, kundeaparya muro kutani ya kukuma, na maffwa aseruke nisha.’

⁶ “Kweekyo, Nndumi Iruva aamba indi; Woshi llwa muri wa samu, kya nungu yeyo itiri korere kaniny, kulaore korere ilensambika. Yuute-fo kipereshu, kwi-kipereshu kuleefo isauwa.

⁷ Mashika samu ilya ilepusuwa mmbo ikee nnang'ani yakwe; nnyikee shiletye sumbai naambo isikywa nkilulyi-fo.

⁸ Naambo irose ngoo ya itaiya kiduva, shammbika samu yeyo ilepusswa uwe ya iwe ando ilashiidima isikywa.

⁹ “Kweekyo Nndumi Iruva mmbo aamba indi; Woshiny llwa muri wa samu! Mmbo shiparya muro mmwasi.

¹⁰ Ummbya makongo, kwaate muro kukore nyama tiye nisha, kusongosye kivela kiroo na maffwa amamye.

¹¹ Naasa kuvike nungu yeyo ilatiri kindo uwe ya makaa kutani yeeta muro deny, na arera yiifo imamike shoose kirinda kyavayo kisambike na korere yiifo imamike.

¹² Shankuuta-deny ruu, nta korere yintiri nnyishuutwa muro-fo.

¹³ Korere ya wayo ni ya uravi lwa utuusi lwafo. Mashika mmbo shankusangya nkukeesambika-fo. Nkukyisangwaa lyingyi kutani nkonu yeto shishefwerisaa ngoo yakwa.

¹⁴ Ni yeny Nndumi Iruva sharera irero yelyi, nalyo lyisheutikaa indo, niindo shitanaa, shishaalashikaa-fo, nta nshisaryaa-fo, nta nshikuryaa-fo, kyiinani na meengye na mitannyi yafo, niindo shishekuutyaa uvingo, ni Nndumi Iruva aamba.”

Esekieli afiyyo

¹⁵ Irero lya nndumi Iruva lyikashisheya-se lyingyi lyishaamba;

¹⁶ “Lola, yewe mwana wa nndu, mmbo shikusoka yekyo kukyivikye nsia na lyimwi, indi kulashiidima iiya nta ifiira, nta misoru yafo ilasheolokaa.

¹⁷ Rosya uuwo sau, kulasheekaa rembo kyimaruma kya nndu ufu-fo; kufinngye kitambaa nrweny, kwanderaa fyaaru fyafo, kulasikye firomu fyafo nta kulasheelya shoonga ya veeffwa-fo.”

¹⁸ Indo sharera na vandu elyi lya ngama na nkwaany nka wakwa keenutwa. Neeny ndesi ya vayo ngama shatana shaasa shevavasyo.

¹⁹ Vandu yewo vakashivia, “A ndesa kuluviyaa-se findo yefi kwatana nfirye iluvia-ki?”

²⁰ Naasa shavavia, “Ni irero lya Nndumi Iruva lyileshisheya lyishaamba;

²¹ Via vandu va mmba ya Israeli, Nndumi Iruva mmbo aamba indi: Lola shiketefusa ando akwa kweele yo mwivikye nsia va finya na ifura lya miso any na ikunda lya mirima yaany, na vana vany va kyuumi na va kyika, yewo mulevara numa mmbo vashewaawa ni usu.

²² Neeni mmbo mushetana ngata shiletana, mmushesikyaa firomu fyany nta ilya shoonga ta veeffwa-fo.

²³ Na fitambaa fyany mmbo fishekaa yefo mirweny yaany, na fyaaru fyany marendeny any; mmusheiyya nta ifiira-fo, indi-lyo mmbo mushevaa vafwafwa kimaruma meesi any, na ikurya wo nndu na urooye.

²⁴ Naasa ni yendo Esekieli ashevaa wende kwany; findo filya fyoose alekooya itana, ni indo mushekooya itana shawe; nkonu mbony yei iutikaa, llyo mumanyaa sheelyi yeny mmbwe Nndumi Iruva.

²⁵ “Neewe mwana wa nndu, nkonu yeto shishevasokaa finya tawo, ifura lyawo, itumbe lyawo, kilya vekeekyivereya vakilollye na miso na mirima yaawo vakaipoiyo-u miso awo, amwi na vana vawo va womi na va kyika.

²⁶ Sheelyi yeto asheturunyaa nkonu yeto mmbo ashaa kwafo akweengye mbony.

²⁷ Nkonu yeto kana kyafo mmbo kishetarambuywaa yeto alewarya ukyiro, llyo kusheambaa nkukivaa lyingyi mbimbi-fo. Ni indo kushevaa wende kwawo; llyo vamanyaa sheelyi yeny mmbwe Nndumi Iruva.”