ESEKIELI 2 - BIBILLYA Mareiyo Meele a Iruva

Esekieli Avaangwa Nave Nkisuku

¹ Nawe kashivia, “Mwana wa nndu salala oroka shumu shikunndye irera neewe.”

² Kyeeri ekerera neeny, Mumuyo wa Iruva ukashaanga, ukashisaleesa shooroka shumu; na sheeta arera neeny.

³ Kashivia, “Mwana wa nndu, mmbo shikeekuruma kwa vandu, va Israeli, kwa isanga lya vamini, valeshimina yeny, wo na vandeeye vaawo yewo valeshiila, mmbo kilasha kyakwa kutani kwafika inu.

⁴ Vandu yewo ni mbafu na vakaidi, mmbo yewo shikeekuruma kwawo, kundevavia sheelyi, ‘Yeny Nndumi Iruva, mmbo shaamba ule na ule!’

⁵ Kwakooya vaarannya ao valema yaarannya, mashika mmbo vakee vandu vaniini, indi vamanyaa sheelyi eefo nkisuku nnang'ani yaawo.

⁶ Kya indi, yewe mwana wa nndu, kulavaereye nta kulasheyereya marero awo-fo. Naakwa kwaringitywa miinga, na kwakaya nguluva, kulaereye marero awo nta kulasheyereswa ni miso awo-fo. Mashika yewo ni vandu valyang'a.

⁷ Yewe mmbo kuvavia marero akwa vakaita ao vakalema iita, mashika ni vandu valyang'a.

⁸ Lyo yewe mwana wa nndu, arannya kindo shikeekuvia, kulave nnlang'a shawo-fo, ambira kana kwalya yekyi shikekuniinga,”

⁹ Naasa shavelollya shooroywa woko lutiri mareiyo akeemoososye kiraaweny.

¹⁰ Kalyoororwa mbee yakwa, llyekelyireyye taari toose mbee na numa, na mareiyyo ekee ni marero a ting'wa, fiyyo na oshi.