ESEKIELI 19 - BIBILLYA Mareiyo Meele a Iruva

Kyiimbo kya ukyiva

¹ Neewe kwiipo kukape kiiyo kyimaruma kya vasongoru va Israeli,

² kwaambe; Mau, mmbo ekee miiso ya kyika ya ngataki nnang'ani ya miiso! Kakwaara nnang'ani ya vana va miiso eeringaa vana vakwe.

³ Kalela umwi va vana vakwe, kang'ana kava miiso kapooka iruuya kyeelya; karattwa vandu

⁴ Vandu va masanga vakeeta mbony takwe, vakanreiya na uliva vakantira neenkamara na nreiyo vakandemfita urukeny lwa Misri.

⁵ Naasa maye ekilollya ammuvereya kyeeri kyaasha koota-pa immbonisa lyingyi keepoo mwana ungyi nnang'ani a vana vakwe, kamwallwa miiso.

⁶ Nawe mwana ulya eking'ana kapooka irua-rua yefo-neefo kava miiso kapooka iruuya kyeelya, karattwa vandu

⁷ Kararaa wo ando kamanya mmba tawo kalyamara miri yaawo. Na uruka lukasokywa mfyoova na ukyiva kimaruma kya ntiri na idina lyakwe.

⁸ Llyo masanga akavika mireiyyo taari toose akakufinga kirrwa vakandevika nreiyyo nawe katirwa.

⁹ Vakamwaata nguvanuny, vakankamara fika kwa mangyi ya Babilony. Nawe kamfingya turuveny, unyanga lwakwe lulaitiwa-se lyingyi, mafumbuuny a Israeli.

¹⁰ ‘Mau mmbo evakye nsabibu ukee mmbaakye yefo nreminy va misabibu, mbai ya mura, ukatira maramba na ivika ndunda shiingyi kyimaruma kya mura mwiingyi.

¹¹ Iramba lyitiri finya mmwasi lyikaaluwa nsengye wa mangyi, lyikang'ana lyikairya miri ingyi myoose lyikalolywa kwa waasha amwi na wiingyi lwa maramba a wavyo.

¹² Indi nsabibu ulya ukailuwa tushu ukatuulwa-si na unyafi, uraato lwa taari ya ngama lukawumisa; ndunda ta vavyo tikadowuka na firamba fya vayo fitiri finya fikafika fikauma; muro ukafimaa kushu.

¹³ Ulaalu ni yefo kasa koomu ukemmbaaye, urukeny wuumu kundo kulatiri mura.

¹⁴ Na muro ukooka mbindiny ya wayo, ukakora maramba na ndunda ta vayo, kulaseefo kiramba kya ushilyi kitiri finya ya ishillya.’ Yekyi nkyo kiiyo kishiimbwa kya ukyiva. Kyammaaluka kyiyyo”