ESEKIELI 18 - BIBILLYA Mareiyo Meele a Iruva

Ngapo kwa wo nndu

¹ Irero lya Nndumi Iruva lyikashisheya lyingyi lyikaamba:

² “A nkyikyi yelyi mwawuyya-se kyaaso yekyi kunu urukeny lwa Israeli? Mwishaambaa vandeye vallya ndunda tiwawaa, mayoo a vana akeenda saafu!”

³ Yeny Nndumi, Nndumi Iruva eefo na muu; nkukyikaa-fo kyimaruma kya iwuuyya-se kyaaso yekyi kunu Israeli-fo.

⁴ Lola mirima myoose nnyakwa, nrima wa ndeye ni wakwa; ni kiwo na nrima wa mwana ni wakwa, ni kya dede nrima llyamari ni kuti ufwe.

⁵ Nndumi Iruva aamba, “Indi kwakooya nndu ni nsumanu, nawe akeetana yefyo fya usumanu,

⁶ nnyakeelyiyya mafumbuu, nnyeepo miso nalole mafwanu a mmba ya Israeli, nalatuusa nka wa amrasa wakwe, nalandekaa na nka kyeeri kya suku takwe

⁷ nalalamyaa masaa a nndu, nnyaviiraa sye atiri, we nyinndu alasokaa nndu ungyi masaa akwe kwa finya, nawe kavaniinga kyelya valya vatirwa nshaa, na ivavika isara valya vakee mbereto;

⁸ alaakuyaa nndu naambo nakooye-fo mbusha, nalawaryaa kindo kya ntambo ao kya mmwasi, kakwiisa makasha, karumbuya kya usumanu ando a nndu na nndu ungyi;

⁹ na kwakooya alatya na yiinndya mikaaye na mavavaso akwa, ni kya dede nndu yeu ni nsumanu mmbo ashekaa na muu.

¹⁰ “Indi kwakooya eera mwana mwalashya na mwiwoo, mwitana kimwi kya mbony yeto

¹¹ nta nalakunde itana kimwi kya findo yefyo fikwaani; indi kalya uve mafumbu, na ituusa nka wa amurasa wakwe,

¹² na ilammya vafwafwa na vaturi, na isoka vandu masaa awo kwa finya, nta nalataa sye, keepoyya mafwanu miso, na itana fya kinyala,

¹³ nawe kaakuya vandu naambo akooye-fo mbusha; na iwarya fya mmwasi; a-ndesa ashekaa na muu? Nnyakaa na muu! Antana findo fikasha fifye indi-fo, ni kuti nafwe; na samu yakwe naveswa muni.

¹⁴ “Indi kwakooya nndu yeu eera mwana, nawe kalollya ngyulyamari toose yeto ndeye aletana, kaereya, nalatane lyimwi lyavayo,

¹⁵ nalallye uwe ya mafumbu, iipoyya mafwanu a mmba ya Israeli miso, nalatefuse nka wa amurasa wakwe,

¹⁶ nalyamarye nndu, nalalange kindo akeemwaarye, nalalamyaa masaa a nndu, mmbo aniinga shoonga takwe yewo vatirwa nshaa, na ivavika isara yewo vakee mbereto;

¹⁷ na lyingyi kwakooya alefiisa woko lwakwe lulatane fya utefusu, nalavaryaa mbusha ao findo fya mmwasi, kalatya mirummbuye ya usumanu na yiindya mavavaso akwa, yeu nnyashefwaa kyimaruma kya ukasha lwa ndeye-fo, ni kya dede mmbo ashekaa na muu.

¹⁸ Mbony ta nde-wakwe, kimmba aleva nndu wa isisa vandu, na ivatannya findo fivavaa kava, mwiisoka mwanamaye masaa akwe na finya, na itana findo filakee fisha nnang'ani a vandu vakwe, lola ni kuti nafwe kya mitannyi yakwe.

¹⁹ “Indi yeni mmbo mwaamba, ‘A nkyikyi mwana nalakurika ulyamari lwa ndeye?’ Kyeeri mwana ulya atana fya usumanu na yiinndya mavavaso akwa, ni kya dede mmbo ashekaa na muu.

²⁰ Nrima ulyamaraa nto ushefwaa. Mwana nnyashipoo ulyamari lwa ndeye-fo, nta nde nnyashepoo ulyamari lwa mwana wakwe-fo, usumanu lwa nsumanu llwakwemuni; na uravi lwa nravi llwakwe muni.

²¹ Indi nndu nkasha kakurya na ira ngyulyamari takwe toose atannyi, na yiinndya mavavaso akwa moose, na itana yefyo fya dede na usumanu ni kya dede mmbo akaa na muu nnyafwaa-fo.

²² Ngyulyamari takwe toose atannyi ntikumbuwa tara-fo, kyimaruma kya usumanu atana mmbo akaa na muu.”

²³ Nndumi Iruva avesa, “A ndesa, mmbo shifurye kya nndu afiyya ulyamariny? A nshi-kyeeshia-se mmwasi nalashike nayiisitou shia yakwe shikasha nakkye.

²⁴ Indi kyeeri nndu nsumanu ashealashika, kava mwiitana makasha, na itana utefusu sha vatefusu vatanaa, nndu yeu ashekaa na muu? Kya mitannyi yakwe misha myoose atannyi, nta lyimwi lya-vayo lyikumbuwa-fo. Kya ulyamari lwakwe yelo atana, na utefusu we mmbo ashefwaa.”

²⁵ Indi yeni mmbo mwaamba: “Shia ya Nndumi, nshi ya usumanu-fo.” Ulaalu arannyiny shimmuvie, Yeni Israeli: A ndesa! Shia yakwa nshi-yo ikee ya usumanu-se? Shia tany, nshito tiwuuye usumanu-se?

²⁶ Nndu nsumanu kara itana fya usumanu katana fya ukasha na ifwa, mmbo afiyya yefo makasheny akwe aletana. Kya makasha yo atannyi mmbo afwaa.

²⁷ Lyingyi, nndu nkasha kyeeri ashealashikaa, katana yefyo fya usha na usumanu, mmbo akiraa nrima wakwe, usheva na muu.

²⁸ Mashika mmbo ammalashika, akisoongya kaisityou makasha akwe moose, kya dede nnyashefwa-fo mmbo ashekaa na muu.

²⁹ Indi, mmba ya Israeli mmbo yaamba, “Shia ya Nndumi Iruva nshi-ya usumanu-fo. Yee, yeni va mmba ya Israeli; shia takwa nshi-to tikee ta usumanu-se? Nshi shia tany tilakee ta usumanu-se?

³⁰ “Naasany mmbo shishemuutya uvingo yeni va mmba ya Israeli, wo umwi kikwaani na mitannyi yakwe, ni Nndumi Iruva aamba. Kuryeny na yaalashika mure-fo mitannyi yaany mikasha myoose naambo mulasheimamitwa.

³¹ Ereny kwaasha ngyulyamari tany toose yeto mulellyamara, muree ngoo shiiyya na mirima miiyya: nkyikyi mukunndye ifwa, yeni va mmba ya Israeli?

³² Mashika yeny, nshifurye kya nndu afwa-fo, ni Nndumi Iruva aamba: kweekyo alashikeny mukye.”