DANIELI 9 - BIBILLYA Mareiyo Meele a Iruva

Danieli aterevya Vandu vakwe

¹ Kwikee mwaaka wa mbee, kyeeri Dario mwana wa Ahasuero mwamedi alepooka ishillya uruka lwa Vakaldayo.

² Mwaaka wa mbee wa ushilyi lwakwe, yeny Danieli mmbo shekekulosha neesoongya mbony tikeeshireiye efo fitabuny fyeele, shamanya mbony tilya Nndumi Iruva evya nkisuku Yeremia, sheelyi Yerusalemu ishewunduwaa ando a myaaka makumi mfungare ishaa.

³ Neeny sheendukya Nndumi Iruva, shantereva na imweererya shakwaamba ifu, sharaa makunnya, neekootoya shinterevaa,

⁴ Shetereva Nndumi Iruva, Iruva wakwa, shaamba, “Woi Nndumi, Iruva kutiri finya, Iruva kweeresye. Mmbo kukee nsaari na yiinutya fyaasa fyafo, koora na ikunda lyafo lya dede kwa ewo vekukunda vakatana ekyo kuvavasye.

⁵ Mmbo lulekulyamarya, lukava varavi lukatana makasha mmbo lulelema filya kuvavasye lukaindukya mbai na usumanu lwafo.

⁶ Nta llulearanya varundi vafo na vakisiku-fo, ewo valerera na vamangyi veru, veeshillya, vakuu veru, na vandu veru woose.

⁷ “Ewe Nndumi Iruva kwatana fya usumanu kyeeri kyoose. Lyo yese kyeeri kyoose mmbo lwatana fya usutu. Kwa yese lukee kunu Yudaya na Yerusalemu niindo kileva, neewe kwanyanyata Vaisraeli woose efo masangeny a kwaasha na a kufii kimaruma kya elyi valekumina yewe.

⁸ Vamangyi veru, vashilyi na vakuu veru mmbo valetana findo fya usutu lukakulyamarya yewe.

⁹ Lyo yewe mmbo kukee mwiisarya na mwiilyillya, lla elyi lulekukapa mungo.

¹⁰ Woi Nndumi Iruva weeru, nta llulekwaaranya-fo, kyeeri kuleluniinga mavavaso afo na woko lwa varundi vafo na vakisuku naambo lukee shaasa kuleloora.

¹¹ Israeli woose mmbo valefisha mavavaso afo, neelema yaaranya kilya kulaamba. Mmbo lulekulyamarya, llyo kulelurikya ngapo tilya tikeeshireiye efo mavavasony a nndundi wafo Mose.

¹² Mmbo kuleinutya kilya kulerera kya ilutannya yese, na vasongoru veru yewo valelushillya, kweende ngapo ing'ani ilandelollywa ngapo ing'ani indo ulaniny koose sha ngapo ya Yerusalemu.

¹³ Kwalurikya ngapo yeto shoose, ndesa ikeeshireiye efo Uvavasony lwa Mose. Na kufike ulaalu, woi Nndumi Iruva weeru, nta llwalelanga luuke efo ngyulyamariny teru na itana fya usumanu-fo.

¹⁴ Neewe Nndumi Iruva, mmbo kuledeesya ngapo uwe yeeru, neewe kwavetana indo, kimaruma lya elyi kukee mwiitana kya usumanu kyeeri kyoose, yewe Nndumi Iruva weeru, neese nta lulakunde ikwaarannya.

¹⁵ “Ulaalu woi Nndumi Iruva weeru, mmbo lwalollya wiidimi lwafo, llya kuloota vandu vafo kulya urukeny lwa Misri, kwa woko lwafo lutiri finya, nayo ikalollywa fika inu, mmbo lulelyamara itana makasha.

¹⁶ Ni yewe Nndumi kuleva mwiluringa efo koose luukye. Kulakirooywa-se nngoo kimaruma kya Yerusalemu-fo; nta kimaruma kya ngyulyamari teru na uravi luletanwa ni vakuu veru-fo. Yerusalemu muri wafo na ifumbu lyafo yeele. Vandu va masanga valuringyitye mmbo vakeemina Yerusalemu na vandu vafo kimaruma kya ulyamari lweru na kya uravi lwa vakuu veru.

¹⁷ Woi Iruva arannya kiterewo kyakwa na kyeerero kyakwa; kimaruma kya ilyillya lyafo kuvauwe-se mmba yafo sheele ilelyamarwa; naambo vandu woose vamanyi sheelyi yewe mmbwe Iruva.

¹⁸ Woi Iruva wakwa shilootya maarwi neetarambwa miso afo kulole ukiva lweeru na ngata muri ukeesisywa, yeto ukeesendwa na irina lyafo. Fiterewo efi lwakeengye nshi kimaruma kya mesha eru-fo, ni kimaruma elyi yewe kukee wa isarya lying'ani.

¹⁹ Woi Nndumi Iruva lwaaranyi kulufwaaye woi mmbe. Nndumi Iruva angusya kwalukira kwaisarya lyafo kumuni, woi Iruva wakwa mashika muri yeu na vandu yeva woose mmbo vakee vasende na irina lyafo.”

Gabrieli atambashwa Ukisuku

²⁰ Kyeeri shiifo shireraa neetereva, neekurya ulyamari lwakwa, na ulyamari lwa vandu vakwa Israeli, na yeererya Iruva wakwa navauwe mmba yakwe sheele.

²¹ Shiiterevaa indo, nsu Gabrieli, ulya shellollya myooryeny alya, kasha erumbukaa kafika alya shikai, nakyo kyekee ni kyeeri kya yuuta firaso fya nkwaany.

²² Karera neeny kashivia, “Danieli, mmbo shasha, shishekuniinga wiidimi na urango lweemanya.

²³ Kyeeri kulepooka yeererya Iruva mmbo alekurouwa kiterewo kyafo, mashika mmbo kukunndwa nnu, neeny mmbo shasha naambo shikooye ikuvia marero yoo, kusoongye, neemanya myoorya yoo.

²⁴ “Myaaka Mfungare ka makumi mfungare nkyo kyeeri Iruva avikye kyaasa kya iporomwa vandu vafo na muri wafo mweele, wooke efo ulyamariny nefwaaywa uravi lwawo, na usumanu lwa llung'anu lushevangiswa, naambo myoorya yoo na ukisuku lwiinutywa, na imwaamba mafura yeto akee mweele nnu.

²⁵ Manya nsongoru yeto Iruva ansauwaa mbwe asheshaa, myaaka mfungare ka mfungare mmbo ishiiraa-u. Yerusalemu mmbo ushetanwaa utire shia tivangyi na mindishe, nato ukee-u ando a myaaka mfungare ka makumi arindaru na ivii. Kyeendi ekyi mmbo kishevaa kyeeri kya ngatara shiroo.

²⁶ Kyeeri ekyo yoo mafurumyony a nsauwe yeto wa Iruva mmbo ashewaawa kuleefo usumanu. Muri wa Yerusalemu na mmba ya Iruva fishemamitwa ni itorito lya mangyi atiri finya. Masiiyony akyeeri mmbo asheshaa sha iwala lya mura, fira ishe na urumato lukee udeesye ni Iruva.

²⁷ Mwiishillya yeto mmbo ashevikyana kyaasa na vandu veengyi ando a myaaka mfungare, na yoo nnang'ani a kyeeri ekyo, iniingya firaso mmbo fishemandaa. Urumato lulavaa yaamba mmbo lushekaa-rembo yoo mmba ya Iruva, lukeeu kutani asha yeto akee ndeesye ashelollyaa umando elo Iruva an-deesye.”