DANIELI 7 - BIBILLYA Mareiyo Meele a Iruva

Danieli aamba Ukisuku lwakwe

¹ Danieli mmbo alelollya mafisi aana maniini. Kwikee mwaaka wa mbee, kyeeri Belishasa ekee mangyi ya Babilony, Danieli elyi kio mmbo esheywa ni yoorya, koorwa findo elele kitareny kyakwe. Naasa kakwipoo kareiya fyoose.

² Yefo yoorye lyakwa elyi kio mmbo shelollya ngyuraato yiinya ta nginiiu tiivivita yeeve shiniini.

³ Na mafisi aana maniini, akasaama ooka efo yeeveny eyo shiniini, wo lyimwi na fwana ya kilasha.

⁴ Lya mbee lyikavaka miiso, itiri maaru a ngoru, ndesa sheekelola indo maaru alya akarutuwa-fo, na ifisi llya lyikaipowa uwe, lyikaseleeswa na marende avii sha nndu, na iniingwa makusaro avakye a nndu.

⁵ Ifisi lya kavii lyevakye ngare na taari yekupoiyo nauwe. Nayo mmbo lyeerye mbari isaru efo kaniny kyavayo, nnang'ani a mayoo. Lukasha unyanga lushaamba, “Kwiipo kwalya nyama ngata kushiidimaa!”

⁶ Kyeeri shiifo shiilolaa na isongololo, lyikasha ifisi lyingyi, lyivakye nyamandu, yoo mungo wa-vayo maaru aana avakye a ndeye. Nalyo mmbo lyeetiri mirwe iina. Kaniingwa ushilyi.

⁷ Numa ya-vayo lyikasha ifisi lya kaana, lyeeresye lyitiri finya. Lyitiri mayoo a minya ashiidimaa ilya, neekarakasha vakiduva va-vayo; neevakakashya yoo-si. Lyo llyeevakye mafisi alya engyi araru-fo; mashika mmbo lyeetiri mbembe ikumi.

⁸ Kyeeri shekeelola mbembe tilya shalollya wombe lungyi udu lwiimyaa nnang'ani ya tilya tingyi ikumi. Elu udu lukafuna-u mbembe isaru. Wombe elu udu mmbo lweetiri miso a nndu na kana kyekeerera marero a ikushopa na ikurosa.

Ukisuku lwa nndu umwi alekaa na muu llung'anu

⁹ Kyeeri shekelola, firi fya ushilyi fikavikwa ando a-vayo. Nawe ulya alenkaa na muu llung'anu na llung'anu kasha kakaya kiri kyakwe. Soori takwe mmbo teekee shaa pyai, na fii takwe tikavaka “sufu.” Kyiri kyakwe kya umangyi mmbo kyekee sha kipala-pala kya muro, na fireto fya vayo fikee fya muro ukeyaaka.

¹⁰ Kikooka-fo kipalapala kya usoka lwa muro lusheekaa mbee yakwe. Nang'u kukakaa-u vandu fiku mafiku vendundyaa, na vengyi ka-fiku maata vakasalala yoo mbee yakwe. Nalyo ikwaanu lya irummbwa mwaandu lyikapooka, na fitabu fikaaluwany.

¹¹ Kimaruma kya marero eekushopa neekurosa eekeyambawa wombe llwa shalola. Kyeeri shekeelola, ifisi llya lyikawaawa, na nnying'a wa vayo ukalyamarwa, ukaniingywa undeerwa murony.

¹² Mafisi alya engyi akasokwa ushilyi, lyo akaniingwa mwaanya wa ikaa na muu ando a kyeeri kyifii.

¹³ Efo yooryeny lya kio, mmbo shilelollya umwi aringityo ni mafishi a nginiiu avakye mwana wa nndu eeshaa. Kasora ulya akee na muu llung'anu na llung'anu kanrammbikywa

¹⁴ We, kaniingywa ushilyi, na itumbe, na umangyi, naambo vandu va masanga moose, na fishomu vanndunndye. Ushilyi lwakwe, ni ushilyi lwa llung'anu, ushilyi lulatiri umando na umangyi lwakwe llukaa lulyamarwa-fo.

Ukisuku lwasukuwa

¹⁵ Moorya yaa, aleshisheya yeny Danieli, mmbo aleshirovya nrima na makusaro akwa akasaukwa.

¹⁶ Shasora umwi wa valya veselelyi alya nashitambashuye urango lwa mbony eti shoose. Nawe kairikya itana indo, kashimanyisya mbony shoose ndesa tikai.

¹⁷ Mafisi yaa aana, maniini, mmbamangyi vaana vasheshaa urukeny.

¹⁸ Indi vandu veele va Iruva yeu muni finya shoose mmbo vashewaryaa umangyi yelo vakee nalo llung'anu na llung'anu.

¹⁹ Naasa shakunda imanya kya ifisi llya lya kaana llya lyikee kilasha deny na alya engyi, lyo lyeeresye nnu lyikafishafisha vakiduva vavayo, na mayoo a vayo mminya, na ngyala ta arera na nsasaaro kaikakasha na ngyayo takwe.

²⁰ Shakunda imanya kya mbembe tilya ikumi teemiiye nrwen mbwavayo, na lulya lungyi-udu lulemmya kulare tilya tingyi isaru tammiluka, wombe lulya lweetiri miso na kana, kyakarera marero eekung'anisa, elyi llyo lyeeresye lyikailannya alya engyi.

²¹ Kyeeri shiifo shiilola, wombe elo lukakapana fira na veele va Iruva lukavavinga.

²² Fika elyi mmiku ulya va llung'anu na llung'anu esherummbwa mwaandu nkonu yeto wekee n-ndesye wiikifika, veele va Iruva yeto muni finya vakaniingywa umangyi.

²³ Kya ifisi lya kaana shavywa: “Ni umangyi lwa kaana, lusheshaa urukeny nalo mmbo lushevaa kilasha na ngyumangyi tilya tingyi toose, na ilyamara uruka loose neelukakasha, neetifisha-fisha.

²⁴ Kya mbembe ikumi kunu umangyiny elu, ni vamangyi ikumi vasheshillyaa, numa asalale ungyi avashillye, nawe mmbo ashevaa kilasha deny ya valya vengyi, nawe ashetuula vamangyi vararu.

²⁵ Nawe mmbo ashetatalaa Iruva yeu wa uwe, neesisya veele va Iruva yeu wa uwe, nawe ashewaanaa yaalasha mavavaso a miindye yaawo, mavavaso na fyeeri fya sukukuu tawo, nawo vashevikwa ushilyiny lwakwe ando a-fyeeri firaru na kyenga.

²⁶ Nalyo ikwaanu lya iruveeu lyishekaa rembo lyishevikwa kirembo, nainsoka umangyi yelo, na ushilyi atiri lumamitwa deny.

²⁷ Wiidimi na finya ya ngyumangyi eti ta ulaniny mmbo tisheningywaa vandu va Iruva yeu wa uwe. Ushilyi lwawo lwa kimangyi llushemandaa-fo, Nawo veeshillya va ulana elu mmbo vashevarundyaa na iveendya.”

²⁸ Yaa nng'u mbony timandi, yeny Danieli, makusaro akaalashika, fwana yakwa ikapaluka, indi shavika efyo fyoose nriminy wakwa.