DANIELI 5 - BIBILLYA Mareiyo Meele a Iruva

Sukukuu ya Belishasa

¹ Naasa nkonu umwi nkwaany Belishasa kavika sukukuu vasongoru vakwe kyiku, vakana mfinyu ando amwi.

² Kyeeri vekeena mfinyu Belshasa kavavasya kundeendwa fikombe fya mmba ya Iruva filya fya saabu ndeye Nebukadresa alefyuuta-fo. Findeendwa, naambo we na vasongoru ewo vakwe, na vaka vakwe na fitonga vakwe vashe iniiya-fo mfinyu.

³ Llya yeni fikombe filya fya saabu na arera filya fyeipowa kulya mmba ya Iruva Yerusalemu fikeendwa, mangyi amwi na vasongoru vakwe, na vaka vakwe, na fitonga vakwe vakaniiya-fo.

⁴ Vakana mfinyu vakawuya irumisha maruva awo a saabu, a fesa, a minya, a firi, na a mawe.

Fireiyo isimambeny

⁵ Llya yeni vetanaa indo lukasha woko lwa nndu lukapooka ireiya alya isimambeny lya mmba ya mangyi usumanu na alya sa ya taa yekeemikya. Na mangyi Belshasa kalollya deny shaasa woko llwa lwekereiya.

⁶ Nalyo yeni fwana yakwe ikaalashika, kaawukwa neesaukwa nnu malungo akava mura na ndi tikarerema.

⁷ Naasa kaffwa na unyanga waasha kavavasya vaanga vandevaangwa vasavi, na veelafya na veawuya fisuku vashentambashuya mbony yei. Nawo vekyisha mangyi kavavia, “Nndu yeto ashidimaa isoma fireiyo efyo na ishivia na kindo fyaamba, mmbo ashevikwaa soori ta kimangyi na nse wa saabu, na mmwasi asheva wa kararu kunu umangyiny lwa Babilony.”

⁸ Vandu vakwe woose, valya varango vakaanga, indi kuleonikau nta umwi aidima isoma fireiyo filya, nta imanya kindo fyaamba-fo.

⁹ Naasa mangyi keengera yereve na isavaa nnu, fwana yakwe ikeengera yaalashika, na vasongoru vakwe valamanyi kyeetana.

¹⁰ Nkaa-mangyi ekyiita kyoorongye kya mangyi na vandu valya vakwe kulya kundo veekai, kaanga kaamba, “Wara finya Mangyi mmbe. Wuiyo mmuu nta kulaereye nta isaukwa-fo.

¹¹ Kunu umangyiny lwafo kwiifo nndu atiri mumuyo wa maruva meele. Kyeeri ndoo etiri umangyi, nndu yeu mmbo aleora urango na imanya lyakwe kava sha maruva. Nawe ndoo, mangyi Nebukadresa, kammbika nsongoru wa varango woose, vasavi, na velafya; na Vakaldayo, vengyi woose.

¹² Mmbo aishwe mumuuyo mweele, atiri urango lulava yaamba, lwa itambashwa moorya na findo fyuumu, na findo fya ngyende. Naasany, mmbaange nashe, nndu yeu avaangwa ni Danieli, ulya mangyi Nebukadresa enfishya Belteshasa we ni kuti aidimi ikutambashuya mbony yei.”

Danieli atambashwa Fireiyo

¹³ Danieli keendwa mbee ya mangyi, Mangyi kammbia, “Yewe mmbwe Danieli ulya Myuda akee kyifingyony? Ulya nde-wakwa amweende amuuta Uyuda

¹⁴ Mmbo shiitye mbony tafo sheelyi, mumuyo wa maruva meele mmbo akukaye kwava na urango na waarya na wiidimi uniini.

¹⁵ Ulaalu vandu varango na vasavi, mmbo valeendwa yaandi naambo vashesoma fireiyo yefi na kitambashwa kyavayo, lyo valaidimi.

¹⁶ Lyo sheeta sheelyi yewe kushiidimaa itambashwa fireiyo na imanya mbony tiifo. Ulaalu kwakooya kwaidima isoma fireiyo yefi na ishimaanyisya mbony ta-vayo, mmbo kundevikwaa soori ta ki-mangyi na nse wa saabu singony na lyingyi kusheva mwiishillya wa kararu kunu umangyiny.”

¹⁷ Danieli, karouwa mangyi Belshasa, “Masaa kutiri na umasi lwafo, kushiidima ikaa nafyo ao iniingya nndu ungyi. Yewe mangyi; ni kuti shikusommyi fireiyo na ikuvia kindo fyaamba.

¹⁸ Kyafo yewe mangyi, Iruva yeu wa uwe mmbo aleniinga ndoo Nebukadresa umangyi, na uniini na usuri na itumbe.

¹⁹ Na kyeendwa ni itumbe llya alenniinga, vandu va masanga woose na fwana na fishomu vakeereya na irerema mbee yakwe. Nakunde iwaa nndu mmbo emmbwaa. Nakunde ikira nndu, naasa mmbo enraa. Mmbo aleng'anisa eto alenkunda ao yiipala yeto alekunda intannya indo.

²⁰ Kimmba alekurosa we muni, makusaro akwe akallemba na nrima wakwe ukava muumu, kaposha urundi lwakwe, llyo alesokwa kyiri kya umangyi na itumbe lya-vayo.

²¹ Llyo aleumbutwa yefo nnang'ani a vandu, nawe kava sha ifisi lya ngoroshony. Kandekaa na mafisi kavelya na mare sha ng'umbe. Kakaa efo mbateny nalaoni nta kyenringa laura kio; Kutani lya alesukukyo, sheelyi Iruva yeu wa uwe mmbwe yeto avikye-u ngyumangyi toose ta ulana, kaveva mmbwe asaleesa yewo akunda we muni.

²² “Indi yewe Belshasa kwikee mwana wakwe, mbony yeti mmbo kutiishi nnu, lyo nkulekunda ikunyiisa-fo.

²³ Mmbo kulelema na ikurosa mbee ya Iruva wa iruveeu kwandeende fiiya filya fileutwa mmba ya Iruva. Kwandeniiya-fo mfinyu yewe na vasongoru vafo na nka vafo, fitonga fyafo, kwarumisha maruva a saabu na fesa na minya na a firi na a mawe maruva nalashidimaa ilola, nta irera, nta yiita ao imanya, indi we Iruva yeto muu wafo ukee wokony lwakwe, na mitannyi yafo myoose ikee mbee ya usangu lwakwe kulakunde imwiindya.

²⁴ Ekyo nkyo kimaruma Iruva aleruma woko lukareiya marero yaa.

²⁵ “Yaa nng'u marero alereiywa-u ‘MENE, MENE, TEKELI NA PERESI.’

²⁶ MENE: Nkyeyaamba, ‘Iruva mmbo ammekena suku ta umangyi lwafo, tamfika ufishony.’

²⁷ TEKELI: ‘Kweeswa na kyeeso kya mawe kwava mwaangu nnu.’

²⁸ PERESI: ‘Umangyi lwafo lwammaawa lukaniingywa Vaamedi na Vaperesi.’”

²⁹ Llya yeni Belshasa kavavasya Danieli navikwa isara lya kimangyi lyidodorye, na nse wa saabu singony. Kavevikwa mwiishillya wa kararu efo umangyiny lwa Babilony.

³⁰ Nalyo kio kilya kyeni Belshasa wa mangyi ya vakaldayo kawaawa,

³¹ Nalyo Dario Mmedi kavarya umangyi ando akwe etiri myaaka makumi arindaru na ivii.