DANIELI 4 - BIBILLYA Mareiyo Meele a Iruva

Yoorya lya kavii lya Nebukadnesa

¹ Nalyo mangyi Nebukadnesa karuma rumi yei kulya kwa vandu woose, va masanga moose, na fwana na fishomu fyoose, urukeny koose kaamba “Shamwiidikira moose piny!

² Aranyiny shimuvie findo fya wende Iruva yeto wa uwe aleshoora.

³ Apaa shaasa ngyende takwe aloora ting'ani! Apaa shaasa atana ngyende ting'ani. Iruva ni mangyi llung'anu, na mmbo ashillyaa fyeeri fyoose.

⁴ “Mmbo shekukaye mmba yakwa ya kimangyi ando kufoo sau, shavesyo deny.

⁵ Naasa shaorya yoorya lyeeresye nnu, shalollya findo fimattwaa elyi sheelele.

⁶ Shavavasya vasongoru woose va Babilony vashitambashuye yoorya lyakwa.

⁷ Naasa vaawuya, na vasavi, na vaanga na varango vakasha, shavavya yoorya llya, lyo valaidimi ishirambuya.

⁸ Numa Danieli kasha. (Irina lyakwe lyingyi ni Belteshasa, irina lyuukye kwa iruva lyakwa). Mimuyo ya maruva meele mmbo inkaaye. Naasa shammbia shaasa shileorya. Shammbia,

⁹ Belteshasa yewe kukee mweele nniini wa veawuya fisuku woose, shiishi shamanya sheelyi mumuyo mweele wa maruva mmbo ukukaaye, neewe kwamanya moorya moose nkwiifo lyimwi lyikulemmyi-fo. Elyi llyo yoorya lyakwa, kushivie kutambashwe kyavayo.

¹⁰ “Kindo kileshisheya kyeeri sheelele yoo kitaren ni ekyi; mmbo shilelollya nri umwi nniini nnu, ukee mmbaakye yoo nnangani ya uruka,

¹¹ Nri yeto ukamya ukang'ana ukaengera ing'ana neeng'ana kutani wakooya ngini-u, ukalollyo mmbandu va ulana woose.

¹² Maru avayo mmbo esennyi, nato ukarovywa nndunda shisha tishiidima iwuutisa vandu va masanga moose. Yoo nruven wa vayo, mafisi a ngoroshony akashekooya iimuya-u na ndeye tikashookya fifuri efo marambeny avayo. Na wo kyuumbe kikashelya-u ndunda.

¹³ “Shiimuye yoo kitareny kyakwa shiikusara kya yoorya elyi, shalollya sha yoorya indi nsu wa Iruva, akwiisye ashooloka ooka iruveeu kalola swaa.

¹⁴ Karera na unyanga waasha kaamba, “Manya nri yeto kurumbwe-fo maramba avayo. Numa kudove-fo maru, na ndunda tavayo kutinyanyate. Mafisi alya eimuyi-u na ndeye tilya teokye-fo fifuri kutiumbute.

¹⁵ Lyo isinde lya nri yeto kulyire-u, kulyifinge na minya, kulyire-u lyiiringityo mmamburu, nreny nndu yeto aniswa ni laura yuuka iruveeu, reny nakee na mafisi a ngoroshony na mooro wa ngorosho.

¹⁶ Kumwalashe makusaro a nndu wa vandu kunninge makusaro a mafisi a ngoroshony. Ando a myaaka mfungare,

¹⁷ niindo nsu ulya akwiisye avavasya. Naasany, wo nndu namanyi sheelyi Nndumi Iruva yeto wa uwe mmbo atiri ushilyi uwe ya ngyumangyi ta vandu, na lyingyi atiri wiidimi lwa irambikya kwa nndu moose shaasa akunda we muni, naakwa ava n-du wa vengyi woose.

¹⁸ “Elyi llyo yoorya lyakwa. Mangyi Nebukadnesa kamanda-u. Kooka-fo kaamba, ‘Belteshasa ulaalu shiviany kitambashyo kyavayo. Vasongoru vakwa woose mmbo valelemwa ishitambashuya. Lyo yewe kushidimaa, mashika ni mumuyo wa maruva ukukaaye.’”

Danieli Atambasshwa Yoorya

¹⁹ Kifika yoo, Danieli ulya Belteshasa, kafulukywa deny nalaidimi irera. Kutani mangyi ammbia, “Belteshasa kulafulukywa kya yoorya elyi na kitambashyo kyavayo-fo.” Nawe Belteshasa karouwa kaamba, “Woi Mangyi nndumi mmbe, ankyema yoorya elyi na kitambasho kyavayo kyeepana vakiduva vafo lyikure-u yewe.

²⁰ Nri yeto kwelollya ukeemmbakye ukang'ana ukeengera ing'ana kutani wafika ngini-u iruveeu nato ukandelollywa ulaniny koose.

²¹ Maru a vayo akasennya, nato ukatira ndunda tikwaanaa vandu woose ulaniny. Mafisi a ngoroshony akasheovyau, na ndeye ta nginii-u tikasheokya fifuri efo marambeny avayo.

²² Nri yeto ni yewe mangyi mmbee, kwava mwaasha kwatira wiidimi. Mmbo kung'ani kwafika uwe nginii-u, na finya tafo ta ushilyi tikakwaana urukeny koose.

²³ Kyeeri kwekeelola mangyi nndumi mbee mmbo kulelollya nsu ulya eshoolokaa auka iruveeu, kaamba, ‘manya nri yeu kuulyamare, lyo kureu isinde elyo lyavayo ando lyimiiye.’Kulyifinge na nse va minya na arera, kulyire yoo mbateny na mamburu engyi a mooro. Kure laura yoolokye nndu yeu ando a myaaka mfungare ekee amwi na mafisi a ngoroshony.

²⁴ “Ekyi nkyo kitambashwe kya vayo mangyi nndumi mmbe, na ekyi nkyo kindo Iruva wa Uwe anrummbwa kyafo.

²⁵ Mmbo kusheumbutwaa kunu vanduny kundesandwa ando amwi na mafisi a ngoroshony. Ando a myaaka mfungare kulye mare sha ngashe, kulale mbateny, kukapwa ni laura, llyo kushirikyaany sheelyi Iruva yeu wa Uwe Mmbwe yeto ashillye ngyumangyi ta vandu toose nawe ashidimaa iniingya ushilyi yelo moose ankunda.

²⁶ Nsu ulya mmbo alevavasya isinde llya lyirewa-u. Nkyo kyaamba kyishiidimikaa kuve-se mangyi kwamiirikya sheelyi Iruva mmbwe ashillye ulana loose.

²⁷ Naasany, Mangyi nndumi mmbe, shaarannya nisha, kulakyeengere ilyamara-fo tana fya usumanu. Kuve mwiilyillya vakiva. Llyo kusheengeraa ivikyo mbora.”

Yuutika lya yoorya lya Nebukadnesa

²⁸ Efyo mfyo fileutikya Mangyi Nebukadnesa.

²⁹ Kwikyiirau ando a miiri ikumi na ivii-nsi, kyeeri ekerua-rua efo kai ka mmba yakwe ya kimangyi kulya Babilony,

³⁰ llyo aleamba, “A paa shaasa Babilony utiri itumbe! Mmbo shileutana uve muri wakwa nniini woore wiidimi lwakwa na itumbe na umangyi.”

³¹ Llya aleamba indo kulaore ansyado, unyanga lukauka iruveeu lukammbia, “Mangyi Nebukadnesa, arannya! Ulaalu kwansokwa ulaalu wiidimi lwafo lwa kimangyi.

³² Mmbo kushesamiswaa, kulakaniswa na vandu, kundekaa na mafisi, kulye mare sha ngashe ando a myaaka mfungare. Kutani kwamanya sheelyi Iruva yeu wa uwe mmbo atiri finya na wiidimi uwe ya ngyumangyi toose, nawe mmbo atiri wiidimi lwa ivikau yewo ankukunndya.”

³³ Nakyo marero alya mangyi Nebukadnesa alevyo akainukya. Mmbo aleumbutwa, kautwa nnang'ani a vandu, kapooka ilya mare sha ng'umbe, koolokywa ni laura ya nginii-u kutani fii ta nrwe tava shaasha sha ngywaa ta-ngoru, na ngyala ta maako tikavaka ngyala ta ndeye.

Nebukadnesa arumisha Iruva

³⁴ Kwiikyisya myaaka yeyo mfungare Nebukadnesa kaamba, “Mmbo shilelola uwe nginii-u, shamarukya shatira-se urango. Shaarafuma Iruva yeu wa uwe, shaniinga wiindi na nnduma yeu akee na muu llung'anu. ‘Mmbo ashillyaa llung'anu, umangyi lwakwe lulatiraa umando

³⁵ Yewo vakee kunu si kwakwe nsheelyi nshi kindo-fo, Vasu iruveeu na vandu kunu si ni maakony akwe vakai. Nkwiifo aidima ilema ekyo ankunda, ao ekyo atana-fo.’

³⁶ “Kyeeri shilemarukya shawuywa ni urango, umangyi lwakwa na itumbe lyakwa mmbo shileviirywa. Vasongoru na veshillya vakwa vakashiwarya-se. Na finya yakwa ya kimangyi ikashiwuuya, shatira nnduma shailannya llya mbee.

³⁷ Ulaalu yeny Nebukadnesa, mmbo shikeerumisha na yiindya na yiitikisa Mangyi yei ya Iruveeu. Ekyo kyoose atana mmbo kyikee kisha na kya usumanu, nawe mmbwe atiri wiidimi lwa inyiisa yewo vekurosa woose.”