DANIELI 3 - BIBILLYA Mareiyo Meele a Iruva

Nebukadnesa asaleesa ifwanu lyiindywa

¹ Naasa Nebukadresa eetiri ifwanu lya nndu lya saabu, waasha lwavayo ni mita makumi avii na nyanya, uvari mita isaru. Nawe kalyireiya kulya Dura ando kulele nisha, kulya kweni Babilony.

² Naasa mangyi Nebukadresa kavavasya vandu vakwe vasongoru woose vakusanyirye valya va mmba ya kimangyi, vashilyi, veesalallya itorito, vamiku va barasa, na vasongoru va ngata toose. Yewo woose mmbo valevaangwa naambo vashewouwa ifwanu elyo lya mangyi

³ Kyeeri vandu ewo woose valemaa isiiya-u neesalala alya mbee ya ifwanu elyo lya mangyi,

⁴ llyo mwiikapa weele kavambisa na unyanga waasha, kaamba, “Yeni vandu va masanga moose, fwana toose, na va fishomu fyoose,

⁵ Kyeeri mushiita unyanga lwa mbembe, na fivale, na finubi, na finanda fya ngyura fya ngata shiingyi na ngoma, mukammiita, ni kuti muwe-si kifulu-fulu mwiinndye ifwanu elyi lya saabu mufiirye-ndi, mbee ya-vayo elyi mangyi Nebukadresa alelyivika-u.

⁶ Nalyo nndu eto araa nalawa-si kifulu-fulu neelyifiirya ndi, naalyo yeni mmbo asheerwaa irininy lya muro ularumikaa.”

⁷ Naasa kyeeri vandu yewo valeeta unyanga lwa mmbembe na fivale na finubi na finanda fya ngyura fya ngata shiingyi na ngoma, vandu va masanga na fishomu fyoose vakawa-si kifulu-fulu vakainndya ifwanuny llya lya saabu mangyi Nebukadresa alelyireiya kulya Dura.

Vambuya vararu va Danieli vafinngywa Mwaandu

⁸ Llya yeni vakasha Vakalidayo maata, irera kyikasha kya Vayuda.

⁹ Vakavia mangyi Nebukadresa, “Yee mangyi mbee, Wara finya, llung'anu!

¹⁰ Yewe mangyi nndumi, mmbo kuleniingya ishingo kwaamba, elyi kyeeri fiiya fyakwa fishekapaa fiimbo llyo wo nndu ashewaa-si kifulu-fulu, nainndye ifwanu llya lya saabu.

¹¹ Na nndu eto araa nalatana indo mmbo andeerwaa irininy lya kipala-pala kya muro.

¹² Lyo kwiifo vandu valya kulevavika fisongoru kulya urukeny lwa Babilony, nawo ni Shadraki na Meshaki na Abedneko. Yeva mmbo vakeyiimmbwa mavavaso afo Mangyi Nndumi. Mmbakeiindya iruva lyafo nta ifiirya-ndi ifwanu llya lya saabu-fo.”

¹³ Kyikeeny indo, mangyi karooywa nngoo. Kavavasya vandu ewo vararu veendwa mbee yakwe.

¹⁴ Naasa kavavia, “Yeni Shadraki na Meshaki na Abedneko, ndesa ni kindo kya dede mmbo mulelema yiindya iruva lyakwa na ifiirya-ndi ifwanu llya lya saabu shilesaleesa alya?

¹⁵ Ulaalu mmbo shamuvia lyingyi, kwakooya mweeta unyanga lwa mbembe na finanda fya ngyura na ngoma, na fingyi, mukara mulawa-si na yiindya ifwanu llya, mmbo musheerwa na lyimwi-nsi efo irininy lya kipala-pala kya muro ularumikaa. Lulole ni iruva ungau ashemwaauwaa maakony akwa.”

¹⁶ Shadraki, Meshaki na Abedneko vakavia mangyi, “Yee Mangyi nndumi, llutiri kyimaruma ikurouwa yewe kya mbony yei-fo.

¹⁷ Kwakooya Iruva yeu lunndunndyaa ashidimaa ilukira efo murony yeto neefo finyiny yafo, ankye ra lulole-te Mangyi, we ashelukiraa.

¹⁸ lyo naakwa ara nalatana indo lyo manya yese llushidimaa yiinndya iruva lyafo nta ifiirya-ndi ifwanu elyo lyafo-fo Mangyi nndumi mmbe.”

Mbuya Isaaru ta Danieli tautyo Uvingo lwa iwaawo

¹⁹ Naasa mangyi ekyiita indo, karooywa nngoo nnu, na fwana ya kisangu kyakwe ikalashika kyeendwa ni Shadraki na Meshaki na Abedneko. Nkyo kavavasya muro ulya undeengerwa ngwi ka-mfungare ngota mikonu ingyi.

²⁰ Kavavasya itorito lyakwe, ewo vatiri finya mmwasi vafinge Shadraki, Meshaki na Abedneko vavainive deny, wooke-fo vaveere efo irininy lya kipala-pala kya muro.

²¹ Naasa vakoo yewo vakafingwa, veree soori tawo nisha deny, suruali, mashati, makoti awo, kofia na masara engyi veree vakeerwa alya nnang'ani kavii ya muro ulya.

²² Kimmba mangyi embavavasya muro ulya undeengerwa ka-mfungare, kipala-pala kilya kya muro ulya mmbo kilekomba vaskari valya valeveera-fo.

²³ Nawo Shadraki na Meshaki na Abedneko mmbo valewo kulya nnang'ani, kipala-paleny kya muro ulya shaasa vekee veenive.

²⁴ Nawe Nebukadnesa kaawukwa kakyilya kafulukywa-deny. Kavesa vandu valya vakwe, “A nshi vandu vararu nsi lwavafinga lukaveera murony?” Vakammbia, “Yee Mangyi nndumi. Ni vararu-nsi.”

²⁵ “A mmbo kyava inda ulaalu elyi shilollye vandu vaana vakeekurwa-rwa efo nnang'ani murony? Nta mmbakikee vafinge-fo, nta mmborye ivaviswa ni kindo-fo. Na wa kaana avakye nsu wa maruva.”

Uleke na ing'aniswa lya vakoo vararu

²⁶ Nalyo Nebukadnesa kaserikya kufii alya mwaangony wa irina llya lya kipala-pala kya muro, kavaanga na unyanga waasha, kaamba, “Woo Shadraki, Meshaki, Abedneko! Yeni vasero va Nndumi Iruva yeto wa uwe! Ukeny efo mukai mukasha yaa!” Vakasomuka wooka kulya murony ulya.

²⁷ Naasa vandu valya va mmba ya mangyi, vashilyi na vasongoru va itorito na vasongoru woose va mangyi, vakakusangirya vashelola valya vararu kuloore muro ulevapaana. Nta ufii lwa nrwe llulepaanwa-fo, na soori nnyileya-fo, nta mmbalefwaama nsu sha vandu vekee murony-fo.

²⁸ Naasa mangyi Nebukadnesa kaamba, “Naarafumwa Iruva wa Shadraki, Meshaki na Abedneko! Mmbwe aleruma nsu wakwe nashekira varundi eva vakwe vankusirye. Llya valelema ilatya ivavasyo lyakwa mmbo valekaa nrengeny ngota elyi veefiryaandi veendye iruva lyakwa vare Iruva waawo.

²⁹ Ulaalu mmbo shaamba paa, nndu moose wa kundo koose, ao fwana ao kishomu karera kikasha kya Iruva wa Shadraki, Meshaki na Abedneko mmbo arumbuwaa ilungo lyimwi lyimwi na mmba yakwe imamitwa deny. Nkwiifo iruva ungyi ashidimaa ikira sha yeto waawo-fo.”

³⁰ Llyo mangyi Nebukadnesa kang'anisa Shadraki na Meshaki na Abedneko kavasaamisa kitere kya uniini kulya urukeny luringitye muri wa Babilony.