DANIELI 10 - BIBILLYA Mareiyo Meele a Iruva

Ukisuku lwa Danieli mbai ya Mura wa Tigrisi

¹ Kwiikee mwaaka wa kararu wa ushilyi lwa Koreshi mangyi ya Persia, nrumi ikasheya Danieli, ulya evaangwa Belteshasa. Yekee nrumi ya dede ikava shuumu imanyika, nkyo kaimanya neetambashwa ukisuku lwavayo.

² Kyeeri yekyo mmbo shekee kiiyon ando a fimaa firaru.

³ Kuloore shakomba nta kindo nta nyama, nta ina kindo sha mfinyu, nta nshilesongosya fii ta nrwe-fo, ando a fimaa firaru sele.

⁴ Wikee nkonu wa makumi avii na kaana wa mwiiri wa mbee, wa mwaaka ulya, mmbo sheselellyi yoo mbai ya mura ulya, mura nniini wa Tigrisi.

⁵ Shaipoo miso shalollya nndu aree soori shimamiri na nkanda wa saabu.

⁶ Mwiili wakwe ukamika sha yaambo, kisangu kyakwe kivaka kimwii kya stimu; miso akaaka sha kipalapala kya muro. Maako na marende akwe akavaka minya ya arera, unyanga lwa marero akwe lukaitiwa sha irunduma lya nsemu wa vandu.

⁷ Nyeny shimuni shilelollya kindo ekyo, mashika vandu valya vengyi, shekee nawo mmbalelollya-fo. Lyo ngata valeaukwa na irerema mmbo valerisha vakandekusuruma.

⁸ Sharewa alya shimuni shiilolaa kindo ekyi. Shasiiywa mfinya, na fwana yakwa ikaalashika shava nndu ungyi deny.

⁹ Kyeeri shileeta unyanga lwakwe na unyanga lwa marero akwe mmbo shilewa-si kifulu-fulu sharekya rony.

¹⁰ Naasa woko lukashitira kashiipoo kashiseleesa shireremaa.

¹¹ Nalyo nsu wa Iruva kashivia. “Danieli, Iruva akukundye nnu, Salala kushaarannyi nisha kindo shiifo nkuviaa, mmbo nkee nrumi kwafo.” Llya ekeyaamba marero yoo shasalala shu, lyo shiireremaa.

¹² Naasa kashivia, “Kulaereye-fo, Danieli, Iruva mmbo aleita fiterewo fyafo kupookya nkonu ulya kulekunyiisa mbee ya Iruva wafo. Mmbo sharumwa nshekurouwa fiterewo fyafo.

¹³ Nrumi wa umangyi lwa Umedi mmbo alesalala neeny ando a mikonu makumi avii na umwi. Indilyo, nniini wa vasu, we Mikaeli kashesheekya mashika mmbo shenrewa shimuni kulya Umedi.

¹⁴ Ulaalu mmbo shisheye ikuvia findo fikaa fishe elyi numa. Eti ni mmbony ta mikonu eyo ishekaa ishe.”

¹⁵ Kyeeri aleshivia marero yoo, shalola yoo sumbai shava mbimbi.

¹⁶ Nawe nsu yeu evakye mwana wa nndu, kashipaana firomu fyakwa neeny shatarammbwa kana sharera nawe shammbia, “Nndumi wakwa, kindo ekyi shalollya mmbo kyamaa finya yakwa deny,

¹⁷ Neeny shavaka ishinga lyiselelyi mbee ya Nndumi wakwe. Niinda ishinga lyishidimaa isalala lyirere mbee ya Nndumi wakwe? Nshitiri finya nta nshikiidimaa irosya muu shirere neewe-fo”

¹⁸ Kasha ungyi avakye mwana wa nndu kashipaana neeny shawuiywa mfinya.

¹⁹ Kashivia, “Kimmba Iruva akukundye indo kulaereye-fo wuiywa mmuu, nta kindo kyimwi kilakuniinge usau nta ikweerese-fo.” Ekyaamba indo, shawuiywa mfinya mmwasi, shammbia, “Woi Nndumi shiviany ekyo kushiriye kwanshiviirya muu deny.”

²⁰ Naasa kashivia, “Kwammanya kindo kyasheende kwafo? Mmbo shiwuyaa ikapana fira na nsu nringyi wa Persia. Shamma itana indo nsu nringyi wa umangyi lwa Ugriki nawe mmbo asheshaa

²¹ Llyo shishaany ikuvia, filya fikee fireiye efo fitabuny fya usumanu. Nta nshitiri ungyi ashiidimaa isheekya kuuta nsu Mikaeli nringyi waany.”