AMOSI 9 - BIBILLYA Mareiyo Meele a Iruva

Mirumbuye ya Nndumi

¹ Shalollya Nndumi Iruva eesalelyi yoo mbai ya kitara kyeerasya. Kaamba, “Kapa ngo eto tavayo naambo fyeeko fyavayo fyoose firing'ini. Fikamfika fipeete vandu efo mirwe. Neewo vasaa-u vandefiiya fireny. Nta umwi asheturushukaau-fo nta umwi ashekiaa-fo.

² Naakwa vadosha shia efo si kwa vafu, nkuti shiwoondwe-fo, Vakasaama fika iruveeu, mmbo nshevasarambutaa-fo-da.

³ Naakwa vaovya kulya urorony lwa ifumbu lya Karmeli, nkuti shivatakwe-u. Na vakashoovya efo kirembony kya yeeve, mmbo nshevavasya ifisi lya mureny lyivalye.

⁴ Kwakooya vakamarwa ni vakiduva vawo veende ushingeny, mmbo nshevavasyaa vawaawa. Mmbo shikundye ivamamita, nta nshi ivakira-fo.”

⁵ Nndumi Iruva muni matorito mmbo apaana si nayo ikarerema, na woose veefo vakafwa. Ulana loose mmbo lwasaama neesoka sha mura wa Naili.

⁶ Nndumi Iruva mmbo akaa efo iruveeu kukava kwakwe kwekaa, na kunu ulaniny kavika-fo turuve ya ngina. Mmbo avaanga mura wa yeeve kaupusuya ulaniny. We ni Nndumi Iruva!

⁷ Nndumi Iruva kaamba, “Yeni vandu va Israeli, a vandu va Sudan nshikimwi neeni misony akwa yeny, ‘Mmbo shileuta Vafilisti kulya Krete, na Vasirya shawoota Krete, kyimwi-nsi sha llya shemuuta yeni kulya Misri.’

⁸ Yeny Nndumi Iruva muni findo fyoose, mmbo shikelola Israeli deny kya ulyamari lwawo, neeny mmbo nshevamamitaa vauke yaa ulaniny. Lyo vafyari va Yakobo nshishevamamitaa woose-fo.

⁹ Mmbo nshevavasyaa Vaisraeli vasisikwa sheelyi nndu asheshekaa nswa. Mmbo nshevatannya indo naambo shimaa-fo valya valavaa.

¹⁰ Valya varavi nnang'ani ya vandu vakwa mmbo vafiiya fireny woose yewo vakeyaamba, ‘Iruva nnyaraa ukasha lulusheye-fo.’”

Israeli Vasheviirywaa Umangyi

¹¹ Nndumi Iruva kawuya kaamba, “Nkonu wiifo ushaa elyi nshesalesaa-se umangyi lwa Davidi, nalo luvakye mmba ilewa ikarumaka. Mmbo nsheivauwaa-se shiisaleese, ive shaasa yekee elyo mbee.

¹² Nalyo vandu va Israeli vashevingaa uruka lwa Edomu llwa lulesaa-fo, nato ngyumangyi tilya elyo mbee tekee takwa.” Ni Nndumi Iruva aamba yeto asheinutyaa efyo fyoose.

¹³ Mikonu iifo ishaa, nganu isherwa uviny iilanyi vevyaa na misabibu ing'ani uviny yiilanyi vesongosya mfinyo. Mfinyo usheoloka wuuka mafumbu-u na fidooro nafyo fyoolote mfinyo.

¹⁴ Nsheviira vandu vakwa urukeny lwawo veinini Vashetana-se mmba tawo vakukaye-fo. Varemi misabibu neena mfinyo wavayo. Varemi marema neelya fimu fya vayo.

¹⁵ Mmbo nshevikaa-se vandu vakwa kulya urukeny llwa shevaniinga nta valashekiutwaa-se-fo. Ni Nndumi Iruva waany aamba indo.