AMOSI 8 - BIBILLYA Mareiyo Meele a Iruva

Ukisuku na Nkusha wa Madala

¹ Nndumi Iruva wa matorito kashoora kindo kingyi, “Mmbo aleshoora kikabu kitiri ndunda ta ngata shiingi.

² Nndumi Iruva kavesa Amosi, Nkyokyi ekyi kulollye?” Kammbia, “Nkikapu kitiri ndunda.” Nndumi Iruvan kashivia, “Kwa vandu vakwa va Israeli ekyi nkyo kyeeri kyeefurummya. Nshikialashaa-se kilya kyeevakapa-fo.

³ Elyi nkonu yeto wiishaa, fiimbo fyawo mmbo fishevaa kiiyo na kyoorongye. Minying'a ishekwaalalaa koose, wo nndu namalallye sau.”

Ngapo ya Vana va Israeli

⁴ Aranyiny, yeni mwavavara yewo valatiri kindo, neemamita vakiva kunu urukeny.

⁵ Mukaamba, “Llushidimaa isisirya kutani nkonu yeto mweele weera lundekumbany findo fyeru-fo. Ni indii Sabato ishiraa naambo lupooke yeenda singireny? Naambo lulembe efo wuuruny, lwivikaa-u mawe nalasumani efo meseny ya yeesya findo.

⁶ Lukumbe na nganu shiporu na wuuru uniini. Na nndu nkiva nalashidimaa itaa sye yakwe, nta yuura fyaaru fya yaaiya, lunkumbe ushingeny.”

⁷ Nndumi Iruva, wa Israeli mmbo aamba, kya dede, “Nshirekywaa uravi elu lwawo-fo.”

⁸ Uruka mmbo lushereremaa, wo nndu naangare, Uruka loose mmbo lurwaa na iwa sha mura wa Naili.

⁹ Fyeeri fiifo fishaa elyi nkyeere usheangaa nsanyiny, neerema lyishe nsanyiny. Ni yeny Nndumi Iruva wa matorito shaamba indo.

¹⁰ Mmbo nshealashaa ifura lya sukukuu tany lyive kiiyo kyeerika, na fiimbo fyany fya nsia five kiiyo kya ting'wa. Muute mirwe neraa makunnya, muvake vafee vaiyaa mwana waawo umwi-nsi. Mmbo ushevaa nkonu wa ting'wa dede deny.

¹¹ Wiifo ushaa nkonu yeto nshendee shaa urukeny. Vandu mmbo vashetirwaa nshaa, nshi yeetura shoonga-fo. Vatirwa nnyura, lyo nshi yeetura kyeena-fo. Mmbo vasheturaa Irero lya Nndumi Iruva. Ni yeny Nndumi Iruva muni matorito shaamba indi.

¹² Vandu mmbo vasheerevee vauka yeeve lya ndoo veende ya sinde. Varuuye Irero lya Iruva lyo valakilyikooyaa.

¹³ Nkonu yeto vandu vakoo vatiri finya, womi na vaka mmbo vasheumaa kimaruma kya nyura.

¹⁴ Yewo veinndya maruva a Samaria, yewo vashambaa “sswa iruva wa Dani, ao sswa iruva wa Beerseba, yewo mmbo vashewaa valakikwipoo lyingyi.”