AMOSI 7 - BIBILLYA Mareiyo Meele a Iruva

Ukisuku lwa Nrie

¹ Nndumi Iruva muni kashisheya kashoora indi: Mmbo alevika ironda iniini lya nrie, kyeeri mare a ng'umbe ta mangyi emmaa imanywa, nang'u mmbo empooka yoora lyingyi.

² Shaasa shileorwa nrie yeto tikalya wo ire lyekee urukeny. Naasa shaamba. “Woi Nndum Iruva wa matorito, fwaaya vandu vafo! A mmbo valla na kwi. Vammba ya Yakobo ni vafwafwa vakannya deny!”

³ Nawe Nndumi Iruva kaalasha kilya eerye itana kaamba, “Kyasia, ekyo kwalollya nkikitanyikaa-fo.”

Ukisuku lwa Muro

⁴ Naasa shoorwa kindo kingyi ni Nndumi Iruva muni Mmbo endeesya ikaba vandu vakwe na muro. Muro mmbo wesha ukakora yeeve shoose ulaniny, wikimaa ukapooka ikora na uruka uumu.

⁵ Naasa shaamba, “Woi Nndumi Iruva wa matirito kulatani indo-dwa-fo, Mmbo vallaa na kwi? Vammba vafwafwa vakannya deny!”

⁶ Naasa Nndumi Iruva kaalasha lyingyi kilya eerye itana, kaamba, “Nta ekyi nshishekitanaa-fo.”

Ukisuku lwa Kobiro

⁷ Naasa shoorwa kingyi. Mmbo shelollya Nndumi Iruva eesalelyi yoo isimamba lyikee lyitani na kobiro.

⁸ Nndumi Iruva kashivesa, “Amosi, nkyoki kulollye?” Sharouwa, “Shilollye Kobiro.” Naasa Nndumi Iruva kaamba, “Mmbo nshevikaa kobiro yoo nnang'ani ya vandu va Israeli vamanyi mmbo vammba sha isimamba lyootokye. Nshishealashaa-se kilya shekunndye ivakaba-fo.

⁹ Alya vana va Isaki vekeiindya Iruva mmbo kushelyamarwaa, Na ando kweele kwa vana va Israeli kurewa kwikee nrapu. Nalo umangyi lwa Mangyi Yeroboamu mmbo lushemandaa.”

Amosi na Amasia

¹⁰ Naasa Amasia, ulya ekee nkohani wa Beteli karumya mangyi Yeroboamu rumi kammbia, “Amosi mmbo akeekuriingya kunu vanduny vafo. Marero akwe nkuti nalyamare uruka.

¹¹ Mmbo akee yaamba indi, “Yeroboamu mmbo ashefiyyaa fireny, na vandu va Israeli vakamarwa ushingeny.”

¹² Naasa Amazia kavia Amosi, “Naasa kifye, yewe sama yaa, endewuya kulya Yuda kundererya-fo, vandekutaa weesi lwafo.

¹³ Kulakirere lyingyi kunu Beteli-fo. Yaa ni ando kwa mangyi kwa iindya Iruva, nnyo mmba ya iterevya vandu woose.”

¹⁴ Amosi karouwa kaamba, “Yeny mmbo shikee mwiisa findo na mwiirema misabibu.

¹⁵ Indi Nndumi kashivaanga shooka kulya ishoreny lyakwa lyeiisa findo kashaallwa mwiiyauya fisuku kwa vandu vakwe Israeli.

¹⁶ Kweekyo ulaalu arannya kindo Nndumi akeekuvia. Ulaalu mmbo kukeshivia shilauye lyingyi ukisuku nta ikangaya vandu va Israeli.

¹⁷ Ulaalu yewe Amasia, Nndumi mmbo aamba, ‘Nka wafo nnyavaa nka wa shia, na vana vafo vashewaiywa fireny. Uruka lwafo lusheawa fyenga luniingywa vandu vengyi, neewe kumuni kushefiyya urukeny kundo kulaishiwa. Nawo vandu va Israeli ni kuti vashekamarwa wooka urukeny lwawo vanderawa ushingeny.’”