AMOSI 5 - BIBILLYA Mareiyo Meele a Iruva

Uvaango lwa Ikuria

¹ Aranyiny, yeni Vaisraeli, kiimbo eki kya kiiyo:

² Mwana wa kyeny Israeli antuulwa, nalakikwiipo-se Mmbo atuulwa karewa-u. Kuleefo nndu amwiipo-u.

³ Mashika Nndumi Iruva mmbo aamba indi, “Muri wa Israeli wasomuta itorito kyiku, mmbo vashesaaywa-u ni iyana yeni. Na muri wasomuta iyana ushesaaywa ni itorito ikumi-nsi.”

⁴ Nndumi Iruva mmbo avia Vaisraeli, “Shiwuiyeny naambo mukyie.

⁵ Muleende Beer-sheba indeinndya-fo. Mulashiruuye kulya Beteli mashika nkyimwi na ruu. Nta muleende Gilgali-fo. Mashika kulya valemmaa idengwa vakakamarwa ushingeny.”

⁶ Wuyeny kwa Nndumi Iruva mukae na muu. Mwanra muletana indo, Nndumi Iruva mmbo ashemumamitaa na muro nato ukore vandu va Beteli, kuleefo nndu ashidimaa yuurummya.

⁷ Yeni mwammisya, kimmba mwareveta usumanu mukalemba vandu vakatura filya fikee fyawo veni!

⁸ Ni Nndumi Iruva alevika-fo nyinyiri, Kilimia na Orioni Keedima yaalasha ireema kavika-u sa na nsanyiny ukava kio. Mmbo avaanga mura efo yeeveny, kasheuletya efo urukeny Nndumi Iruva llyo irina lyakwe.

⁹ Mmbo eende urumato kwa masiingo a vandu na firingisyo fyawo.

¹⁰ Mmbo musuuye nndu moose yeto arera kya usumanu baraseny, kiwo neeto akyeemya uravi.

¹¹ Mukafota vakiva neevasoka shoonga yaawo. Mukatana mmba shisha ta mawe, lyo muushekaa-fo-fo, nta ina mfinyo mulesongosya-fo.

¹² Mmbo shilollye uravi lwa ngyulyamari tany na uravi elo muletana. Mmbo mwawaa vandu va usumanu, mukawarya findo fya mbaka, mukeema vakiva valawoni usumanu efo baraseny. Mukakusara itana indo llo urango!

¹³ Kweekyo yeto atiri urango moose mmbo amalallya sau kyeeri sha yekyo mashika ni kyeeri kyiravi.

¹⁴ Langeny itana mesha, mure uravi, naambo mukye muu. Na dede llyo Nndumi Iruva muni matorito ashekaa neeni, shaasa mwaamba mukee nawe.

¹⁵ Sueny uravi, mukunde mesha, musalallye usumanu efo baraseny. Mukantana indo kulakooye Nndumi Iruva ashemulyillyaa yeni musaaye-u.

¹⁶ Naasa Nndumi Iruva muni matorito kaamba, “Mmbo kushekaafo yoongora na kiiyo na ting'wa efo miriny. Naakwa mmbaremi vavio vashekaba kiiyo ando amwi na yewo vavaangwa vatawo weesi lwa ikaba kiiyo.

¹⁷ Efo mareminy misabibu koose kuve-fo kiiyo. Efi fyoose fiutike mashika elyi nshemukabaa.” Ni Nndumi Iruva aamba indo.

¹⁸ Mmbo kishevaa kyuumu deny kwa yewo vavereye nkonu yeto wa Nndumi Iruva ushe! Nkonu yeto mmbushemuviiya mbusha-ki? Mmbo ushemuviiya nkonu wa ireema, nta mmbushevaa sa-fo.

¹⁹ Mmbo ushevakaa elyi nndu arisha miiso kakwaanannya na ngare! Ao sha nndu eemurisa woko lwakwe yoo isimambeny, kamaarwa nshoka!

²⁰ Nkonu yeto wa Nndumi Iruva mmbo usheviyaa vandu ireema, nshi sa-fo! Mmbo ushevaa nkonu urandavi ifishi, kulaiyo sa nta shinnywa.

²¹ “Mmbo shisuuye, shamina sukukuu tany, nta nshifuriswaa mmakwaanu any-fo.

²² Kyeeri mwashuutya firaso fyemamita na muro na fya nswa, nshifiwaryaa-fo. Nta findo efyo fivanri musheengyee nshifiwaryaa-fo.

²³ Reny kyoorongye kya fiimbo fyany. Nshisennywa yaarannya finanda fyany-fo.

²⁴ Lyo taniny efyo fya dede na usumanu lweeke sha mura, sha mura nniini ulashuumyaa.

²⁵ “Vandu va Israeli, nshilemuvia mushuutye firaso myaaka ilya makumi aana muleraa-raa kulya kasa-fo.

²⁶ Lyo ulaalu kimmba mukeindya maruva a Sakuti, mangyi akee sha iruva, na Kaiwani nyinyiri ikee iruva mulesongosya muveni.

²⁷ Kyeeri nshemurwaa ushingeny kwakulya ya Dameski,” llyo mushemanyaa irina lyakwa ni Nndumi Iruva muni matorito.