AMOSI 4 - BIBILLYA Mareiyo Meele a Iruva

¹ Aranyiny irero elyi yeni muvakye ng'umbe ta Bashani, mukee Samaria, mukavanda kimaruma kyeesoka vakiva, mukalammya mwishambaa, endeny endeny luni.

² Nndumi Iruva eefo na muu, nawe mmbo aamba, “Kwiifo kwiishaa nkonu elyi vashemuutaa-fo na ngorori ya minya. Wo umwi waany nave sha ikunga lyereiyo.

³ Murufuwa-fo mweero efo poo.”

Ilemwo ikulosha lya Israeli

⁴ Nndumi Iruva amuvia yeni vandu va Israeli, “Endeny kulya Beteli mundelyamara! Endeny na Gilgal mundelyamara deny. Engereny yeende findo fyany firaso fyeemamita na muro, ngama na nkwaany, muveende na firaso lfya kyenga kya ikumi wo nkonu wa kararu.

⁵ Niingyeny firaso fya mikate kyaanu kwa Iruva, muvekurosa kimaruma kyavayo! Mashika mmbo musenywa nnu itana indo.

⁶ Ni yeny shileengye miri yaany myoose shaa, lyo nta mmulekunda ishiwuiya-fo.

⁷ Sheema mmbwa ilashe kyeeri kya fimu fya mareminy. Shooka-fo sheende mmbwa miri maata. Irema lyimwi lyikawonisa mmbwa, lyingi lyikatura, lyikauma.

⁸ Kyeeri vandu va Misri mive valetura mura vakava vafwafwa mmbo valeengya muri ungyi utiri mura lyo mura ulavamae. Kive indo nta mmuleshiwuiya-fo.

⁹ Shooka-fo sharika uraato luvivitaa naambo luumise findo fya mareminy. Nrie tikalya fimu fyany na misabibu, na mikuu na miri ya mafura.” Nta mulashiwuiye.

¹⁰ Shamurikya ndwari shikasha sha tilya shilerika kulya Misri. Mmbo shilewaa vasoro vany fireny na frasi tany tikakamarwa Mukawona kiraa kya minying'a yeyo ilewa efo ulaleny lwany. Lyo nta muleshiwuiya-fo.

¹¹ “Shishemamita vengyi vany shaasa shilemamita kulya Sodoma na Gomora. Yewo vany valekia-fo vakava sha fimwii filekirwa fyuutwa rukony.” Nta mulashiwuiye.

¹² “Kweekyo vandu vakwa va Israeli nkuti shimukabe. Nkyo kudeesyeny kimmba nshetanaa indo.”

¹³ Ni Iruva alevika mafumbu, kavika-fo na ngyuraato. Koora vandu kilya akundye, keende kio na nsanyiny. Keera uwe ya findo fyoose yaa ulaniny. Elyi llyo irina lyakwe, Nndumi Iruva, muni matorito.