3 Yohane 1 - BIBILLYA Mareiyo Meele a Iruva

¹ Ni yeny Mmiku, shakureiya yewe Gayo nkunde wakwa, shinkundye kya dede.

² Nkunde, mmbo shatereva naambo kukooye ivesywa mfindo fyafo fyoose na itira finya ya mwiili, kive shaasa na nrima wafo ukeevesywa.

³ Mashika mmbo shilefura nnu llya vanavama veru valesha na ikureekya dede yafo, shaasa kukeenda efo dedeny yeyo.

⁴ Nshilollyaa ifura iniini ngota elyi-fo, iita sheelyi vana vakwa vakeeteterwa ni dede yeyo.

Usha lwa Gayo

⁵ Vakunde vakwa, ishora elyo ni lya usaari elyo kukeetannya vanavama veru vakee veny,

⁶ nawo mbee ya siri vakakukureekya ikunda lyafo; mmbo kyeesenyaa deny kuvalole kutani vawuya nisha kwa Iruva.

⁷ Mashika kyeendwa ni irina elyo, nkyo kimaruma vakasha, valakunde iwarya kindo kyuuka kwa vandu va masanga.

⁸ Kyasiany, mmbo kilukooye yese iwarya vandu sha yewo, naambo luve veerunda na dede yeyo.

Diotrefe na Demetrio

⁹ Shilereiya siri irero lyimwi, lyo Deotrefe, ulya akundye ikwiita mbee ya woose, nnyalelwiirikya-fo.

¹⁰ Nkyo kwakooya shasha mmbo nshekumbwaa mashora akwe moose, shaasa akeerera fya urung'ani na ilwekerya marero maravi; nta ekyo kilamae, nta we muni nnyakee iwarya vanavama yewo-fo, na valya valangye ivawarya kaveema, na iwaumbuta efo mmba ya Iruva.

¹¹ Nkunde wakwa, kulasore uravi-fo, sora usha. Yeto mwiitana mesha mmbo akee wa Iruva, kyaindi mwiitana maravi we nnyalelollya Iruva-fo.

¹² Demetrio mmbo alekureekywa ni vandu woose, na dede yeyo sheni ikavenkureekya. Neese-da lukavenkureekya, na yewe mmbo kuveishi sheelyi ukureekyi lweru llwa dede.

Fya ifurumya

¹³ Lyo mmbo sheetiri findo fiingyi fya ikureiya, lyo nshikikundye ikureiya na winu na kalamu-fo.

¹⁴ Mashika mmbo shivikye nsia shikulollye uviny, lusherera kana kwa kana.

¹⁵ Urilalyi lukae na yewe. Vambuya veru vakwiidikira. Idikira na vambuya yewo veru, wo nndu na irina lyakwe.