2 VAMANGYI 7 - BIBILLYA Mareiyo Meele a Iruva

¹ Elisha kaamba, Aranyiny irero lya Nndumi Iruva, Nndumi Iruva aamba indi; Ndesi fyeeri sha efyi, kyeeso kya nswa nsha mmbo kyikumbwa kwa wuuru lwa shekeli, na fyeeso fivii fya nswa wa nganu fishekumbwa kwa wuuru lwa shekeli alya mwaangony wa Samaria.

² Naasa nshilyi ulya, mangyi emmbikye nnu nsia karouwa nndu ulya wa Iruva, kaamba, llate kukooye Nndumi Iruva aledosha madirisha yefo iruveeu, ndesa mbony yei yeshiidimikaa? Karouwa kammbia, Lola yewe mmbo kulollya na miso afo, indilyo nkulyaa-fo.

Itorito lya Vaaramu lyasama

³ Nalyo kweifo vandu vaana yoo mbengyen ya muri vatirwa ni ivave, vakaviana wo veni kwa veni, Mmbo lukekaa yaa kutani lwafiiya-u?

⁴ Lukaamba lwaange neefo muruny, muriny kwiifo shaa, neese lufwaa-da. Kyasia, ndifo lulatye itorito lya Vashami; vakuluwarya lushekyaa, vakaluwaa, mmbo lufwaa.

⁵ Naasa vakakwiipo ngama shuru naambo vafike kulya kitesheny kya Vaashami, nawo vekifika alya ipookyony a kiteshe kya Vaashami ate nkweifo nndu-fo.

⁶ Mashika Nndumi eniinga Vaashami ntiri wa myeengye a mitika, na ntiri wa frasi, uvakye ntiri wa itorito iniini lya fira; Vakaviana, Lolaany mangyi ya Israeli ansanga andu amwi na vamangyi va Vahiti na vamangyi va Misri vashelukapa.

⁷ Naasa vakakwiipo kulya vakarisha kwiifo na ivishi-vishi, vakaisityo-fo meema awo, frasi tawo, mishungu na wo kindo vetiri vakarisha kya ikira muu wawo.

⁸ Naasa vandu valya vetirwa ni ivave vekifika kulya, vakaanga yeemeny lyimwi, vakalya na ina, vakakurika fesa na saabu, amwi na soori vakandesuruma kwaasha, vakavuya-se, vakaanga yeemeny lya kavii, nafo vakakurika-fo findo fingyi vakandesuruma sha filya.

⁹ Llyo verera vakaamba, mbony eti lwiifo lurundaa kunu nshi mbony shisha-fo; na yese lukavereya kutani kwakya mmbo lushewonisa-fo nsindara, ni kyeni lweende lundevia vandu va mmba ya mangyi.

¹⁰ Naasa vakeenda vakandevia valya veeringa mbengye ya muri, vakavavia llya lulefika kulya kitesheny kya Vaashami, llulekooya-fo nndu nta umwi-fo nta nndu akapaa-fo saru-fo; kuuta-fo frasi na mishungu ikee mifinge, na meema awo eke sha llya valea-u.

¹¹ Na veeringa mbengye valya vakavia vandu va mmba ya mangyi.

¹² Naasa mangyi kakwiipo kio kavia mashinga akwe ulaalu shimoora ngata Vaashami valutannya. Veeshi deny, sheelyi yese mmbo lukee vandu vatirwa nshaa, kweekyo mmbo vakwiipo kunu kitesheny vakandekusuruma kyaandeny, neelyi vashesomukya muriny mmbo kushevatira veifo na muu; na mafurumyon vaange muriny.

¹³ Umwi wa varundi vakwe karouwa kaamba, veende vandu maata veerye frasi eti isaanu tisei-u, lundemanya kwakooya valya veefo na muu vafye sha nsemu ulya ulerumaka efo Israeli;

¹⁴ Naasa mangyi karuma vesaami frasi vavii, veende vandelola itorito lya Vaashami.

¹⁵ Nawo vakavalatya vakafika mureny wa Yordan apaakitimu, ate shia shoose mmbo yekemika mika soori amwi na fia filya fya poo valeerya-efo veenshaa. Nalyo nrumi ulya kawuya kandevia mangyi.

¹⁶ Naasa vandu vakasomuka vakavatira mifungwa amwi na masaa awo veerye, Nalyo kyeeso kimwi kya nswa nsha kikakumbwa shekeli, na fyeeso fivii fya shayiri fikakumbwa shekeli, na marero a Nndumi Iruva akainukya.

¹⁷ Nawe mangyi kashevika nshilyi ulya emmbikye nsia kava mwiisalallya vandu alya mwaangony, nawo vandu vakammbavara kafiiya alya mwaangony, kikainukya ndesa kyaambawa ni nndu ulya wa Iruva.

¹⁸ Kyikatanyika ndesa llya nndu ulya wa Iruva emmivya mangyi, eshaamba, fibaba fivii fya nswa wa nganu fishekumbwaa shekeli imwi, na kibaba kya nswa mmamiri kishekumbwaa shekeli imwi, ni indo kishetanyikaa ndesi kyeeri sha ekyi alya mwaangony wa Samaria.

¹⁹ Nshilyi ulya karouwa nndu wa Iruva kaamba, ulaalu lolaany kukooye Iruva aledosha madirisha kulya iruveeu, mbony yei yeshiidimika ndesa? Kaamba, lolaa, ewe mmbo kulollya na miso afo lyo nkulyaa-fo.

²⁰ Kikatanyika indo-indo, mashika vandu mmbo vemmbavara kafiiya alya mwaangony.