2 VAMANGYI 5 - BIBILLYA Mareiyo Meele a Iruva

Naaman ashiiswa

¹ Naasa Naamani nniini wa itorito lya mangyi ya Shamu, eke nndu nniini usanguny lwa nndumi wakwe, eke nndu ashindywa kimaruma kya wiidimi Nndumi Iruva eniingye Vaashami ivinga, na mmbo ekee nndu nsha wa fira avikywa nsia; indi mmbo etirwa ni ivave.

² Indi kweifo mwana umwi wa kyeny eendwa mfira ooka Israeli, nawe kashevikwa nndundi wa efo kyeny kwa Naamani, kava mwifurukannya nka wa Naamani.

³ Kavia kyekuye, kyeva ngoma yakwe kukooye eishivana na nkisuku ulya kulya Samaria we mmbwe eshiidimaa inshiisa.

⁴ Nndu umwi keenda kandevia nndumi wakwe, kaamba Mwana ulya wa kyeny aleendwa kunu ooka Israeli mmbo aleamba uve na uve.

⁵ Mangyi wa Shamu kaamba, ni kisha, shiruma nrumi kwa mangyi ya Israeli. Naasa keenda akurikye talanta ikumi ta fesa, na fyenga fya saabu fiku firyindaru, na mikorori ikumi.

⁶ Nawe karwaaya mangyi ya Israeli nrumi ilya, ishaamba elyi kuwarya nrumi yei, shakutereva ni yeny sharuma nndundi yeu wakwa Naamani kwafo, naambo kunshiise ivave lyakwe.

⁷ Naasa mangyi ilya ya Israeli imaa isoma barrwa ilya, kakunyaffwa karanndwa soori takwe, kaamba, A Yeny mmbwe Iruva, wa iwaa na ikyira, kutani nndu yeu ashirikye nndu shinshiise ukoma lwakwe? Shamutereva mumanyi sheelyi nndu yeu mmbo akunndye ikabana na yeny.

⁸ Elisha nndu ulya wa Iruva kaita sheelyi mangyi ya Israeli anranndwa soori takwe. Naasa karuma kwakwe, kammbia, Nkyiki elyi kwaranndwa soori tafo? Ulaalu ashe kwakwa Yeny llyo amanyaa sheelyi kunu Israeli kwiifo nkisuku.

⁹ Naasa we Naamani na frasi na mitika akwe kasha kandesalala yoo mwaangony wa mmba ya Elisha.

¹⁰ Nawe Elisha kanrumya nndu, kammbia, Enda kundekusangya kulya Yordan, kooloke-fo ka-mfungare, na yewe kushevaa nsha na mwiili wafo ushemamya deny.

¹¹ Indi Naamani kakunyaffwa, kaamba, mmbo sheevikye nsia sheelyi mmbo ashaa kwakwa nashipaani na ishiterevya kwa irina lya Nndumi Iruva wakwe nashiishiise ndwari yakwa yeyi ishitiri.

¹² Mira ya Demaski, Abana na Farpari nshi misha kilaanya ngota mira myoose ya Israeli. A mmbo shelemwa yooloka na ikusanngya-fo shiile peru? Kakutuka kawuya etirwa nngoo.

¹³ Mashinga valya vakwe vakamooshora vakammbia, Nde-yakwa, kukooye nkisuku ulya akuvia itana kindo kiniini mmwasi mmbo kwelemaa ndesa? Nshi kyasenya mmwasi, elyi akuvia enda kusangye na yewe kushie?

¹⁴ Llyo olooka-fo ka-mfungare ndesa evyo ni nndu ulya wa Iruva, na nyama ta mwiili wakwe tikamamya tikavaka nyama ta mwiili wa mwana n-du, kashia deny.

¹⁵ Kawuuya nndu ulya wa Iruva na valya eryani nawo woose. Kashesalala mbee yakwe, kaamba, ulaalu shammanya nkwiifo Iruva ulaniny koose kuuta Israeli-fo; ulaalu shakutereva kuwarye kindo kinnywa kyuuka kwa ishinga lyafo.

¹⁶ Naasa kammbia, Nndumi Iruva eefo na muu, yeto shikenndundya, nshiwarya kindo-fo. Kamwiitikya nawarye, indi-we kalema.

¹⁷ Naamani kaamba, kimmba kwalema iwarya, mmbo kushiniinga uteri lwa fiko ivii, mashika yeny ishinga lyafo nshikaa shiniingye lyingyi kiraso kyemamitwa nta sabihu kwa maruva a wongo-fo kuuta Nndumi Iruvansi.

¹⁸ Nndumi Iruva na shifwaaye kya mbony yei, elyi nndumi wakwa ashendaa mmba ya Rimoni indeniingya-fo kiraso, na yeny sheende shiryani nawe ashekwiinyikya maakony akwe na yeny shishekwiinyika efo mmba ya Rimoni shakutereva yeny ishinga lyafo kumanyi kya mbony yeyo.

¹⁹ Elisha kavia Naamani, Kweengye na ufoo.

Naasa Naamani ekilakana nawe kirambu kyaangu

²⁰ Gehasi, ishinga lya Elisha nndu wa Iruva, kaamba, Lolate nndumi yeu wakwa mmbo alekeya Naamani Mshami, nalawarye-fo nta kindo kimwi filya amweengye, ni dede Nndumi Iruva eefo na muu, nshinlekeyaa-fo nkuti shimuute kindo.

²¹ Naasa Gehasi kalatya Naamani numa. Nawe Naamani, ekilollya kwiifo nndu numa yakwe akeesha eerishaa, kooloka ikariny naambo nambwarye, kaamba! Nnamafoo?

²² Karouwa, mmafoo deny. Nndumi wakwa mmbo ashiruma kaamba ni ulaalu-da asheyo mmbakisuku vavii va vana va vakisuku wooka ifumbuny lya Efraimu, mmbo akutereva kuniinge talanta ya fesa na soori ivii.

²³ Naamani kammbia kwiite ufoo ipoo talanta ivii, Kamwiitikya talanta ivii ta fesa na soori tilya kammbikya mbolokony ivii kaniingya mashinga akwe avii akansongoya mbee.

²⁴ Naasa ekifika kidoorony, kawarya mikusha ilya, kandevika mmba kwakwe. Vakalakana wo nndu keenda kyakwe.

²⁵ Indi Gehasi kaanga mmba kandekwaanannya na nndumi, Elisha, kammbesa, Gehasi nkwi kwekai? Kaamba, Ishinga lyafo llyaleenda ando-fo!

²⁶ Kammbia, nrima wakwa mmbweenda uryani na yewe, llya nndu ulya wa ikari aleenduka naambo akwaambye? A ndesa ekyi kyo kyeeri kya iwarya fesa, na soori, na marema a mafura a miseituni, na moonri, na ng'umbe, na mashinga na varundi?

²⁷ Naasany, ivave lya Naamani mmbo lyikutira yewe na ngeeri yafo kufike llung'anu. Nawe kakwiipo mbee yakwe etirwa ni ivave.