2 VAMANGYI 3 - BIBILLYA Mareiyo Meele a Iruva

Fira nnang'ani ya Israli na Moabu

¹ Naasa Yoramu mwana wa Ahabu kapooka ishillya Israeli kulya Samaria kwikee mwaaka wa ikumi na nyaya wa Yehoshafati mangyi ya Yuda, kashillya myaaka ikumi na ivii.

² Karunda mitannyi mikasha usanguny lwa Nndumi Iruva, indilyo nshi sha ndeye na maye-fo; mashika eutau ngo ilya ya baali yemmbakyo-u nndeye.

³ Kimwi nafyo katana ngyulyamari ta Yeroboamu mwana wa Nebati, ngyulyamari kulare eindima ilakana nato kutani ateere nato vana va Israeli.

⁴ Naasa Mesha mangyi ya Moabu, eke mwiisa mashoonri, kava mwitaa mangyi ya Israeli sufu ya mashoonri fiku iyana, na suva fiku iyana.

⁵ Indi Ahabu ekifwa mangyi ya Moabu kasakya na mangyi ya Israeli.

⁶ Kyeeri kilya kyeni mangyi Yoramu kulya Samaria kaekyena vandu va Israeli woose.

⁷ Karuuya Yehoshafati mangyi ya Yuda nrumi kaamba, Mangyi ya Moabu alensakya na yeny; a ndesa kusheekulungaa na yeny lukapani na Moabu? Kaamba, Nshendaa; yeny mmbwe yeve, vandu vakwa mmbo vandu vafo, fraasi takwa ni frasi tafo.

⁸ Kavesa, A ni shia ingai lushiraa? Kammbia ni shia ya Kasa ka Edomu.

⁹ Naasa mangyi ya Israeli ya Israeli kaenda, na mangyi ya Yuda, na mangyi ya Edomu. Vakepoo kyaaro mikonu mfungare, kulaifo mura weena wa vasikari nta wa findo filya veryani.

¹⁰ Mangyi ya Israeli kaamba, Oshi lweru! Mmbo Nndumi Iruva alekwaanisya vamangyi eva vararu nandeveera maakony a vamoabu.

¹¹ Indi Yehoshefati kaamba, yaa kwiiyo-se Nkisuku wa Nndumi Iruva, alweekye ivesa mbony eti efo kwa Nndumi Iruva? Ishinga lyimwi wa mangyi ya Israeli; karouwa kaamba, Kwiifo Elisha mwana wa Shafati, ulya mwiiletya Elia mura maakony akwe.

¹² Yehoshafati kaamba, eto mmbwe atiri irero lya Nndumi Iruva. Naasa mangyi ya Israeli, na Yehoshafati na mangyi ya Edomu, vakallatya.

¹³ Elisha kavia mangyi ya Israeli, Nkyokyi kyafo shitiri neewe? Enda kwa vakisuku vandeye-afo, na vakisuku vamaye-afo. Mangyi ya Israeli, kammbia Oode, nshi indo-fo, mashika Nndumi Iruva mmbo akwaanisya vamangyi eva vararu naambo avavike maakony a Vamoabu.

¹⁴ Elisha kaamba, Nndumi iruva wa matorito eefo na muu, yeto shilemmba ishinga lyakwe, nshekulolaa na miso, nta ikwaanannya na yewe, kulaore ni kimaruma kya Yehoshafati, mangyi ya Yuda-fo.

¹⁵ Indi, ulaalu sheengye mwiikapa kinanda. Naasa mwikapa kinanda ekiwonika, Nndumi Iruva kanniinga finya.

¹⁶ Naasa kaamba Nndumi Iruva aamba, Suminy-fo mindeshe kunu kyaandeny ekyi,

¹⁷ Mashika Nndumi Iruva aamba indi, Mmulollya uraato nta mmbwa-fo indi efo kyaandeny ekyo mmbo kushiishwafo mura wany weena, na ng'umbe tany na findo fyany fya mmba fya ivikya.

¹⁸ Na mbony yei ni kindo kyaangu deny efo misony a Nndumi Iruva; na Vamoabu muvatire mifungwa maakony any.

¹⁹ Mushekaba wo muri utiri ulale, na wo muri ukee nsauwe, na imanya wo nri nsha, na ifisha ngyusoka shoose ta mura, na ipapara na mawe wo andu kusha koose.

²⁰ Elyi lya ngama kyeeri kyeniingya kiraso kya nswa, ukasha mura wuuka taari ya Edomu ukaishura uruka loose.

²¹ Naasa Vamoabu vekiita sheelyi vamangyi woose vakuumbya andu amwi ikabana nawo, valya vatiri finya ya iraa fisha, na valya vatiri myaaka miingyi vakandekaa kulya mimyanuny.

²² Vakakwipoo ngama shuru, na mwi ukamika-mika uwe ya mura, na Vamoabu vekilola mura ulya efo mbee yaawo ukavaka samu,

²³ Vakaamba ee yei ni samu, vamangyi valya vankumaa veni na veni, ulaalu yeni Vamoabu kamareny mifungwa!

²⁴ Naasa vekifika alya ulaleny lwa Israeli, Vaisraeli vakakwiipo vakakaba Vamoabu kutani varisha, vakaengera itana indo kutani vafika minyanuny kwawo.

²⁵ Vakawundwa miri yaawo, wo nndu na iive lyakwe vakaanyanyata kundo koose kakaishwa-fo shapu, vakafisha ngyusoka toose ta mura, vakamamanya miri misha myoose, ni mawe a Kir-haresethi nsi esaau; indi valya vesaaye na mawe, vakaushingillya vakaukaba.

²⁶ Mangyi wa Moabu ekilollya ammbingwa fira keepo-se lyingyi vandu mayana mfungare vatiri finya naambo varorove usumanu na mangyi ya Edomu nta nalaidimi.

²⁷ Naasa ekilollya indo, kaniingya mwana wakwe mmbee, yeto esheshillya andu akwe, kanningya nave kiraso kyeemamitwa uwe ya isimamba. Mbony yei ikeende-fo usuvanu uniini uwe ya Israeli, naasa vakasama kwakwe, vakawuya urukeny lwawo weni.