2 VAMANGYI 21 - BIBILLYA Mareiyo Meele a Iruva

Mangyi Manse wa Yuda

¹ Manase etiri myaaka ikumi na ivii kyeeri alepooka ishillya; kashillya Yerusalemu myaaka makumi araanu na iraanu; na irina lya maye evaangwa Hefziba.

² Katana makasha usanguny lwa Nndumi Iruva; fikavaka makasha a vandu va masanga valya Nndumi Iruva alevaumbuta mbee ya vana va Israeli.

³ Mashika mmbo alesongosya-se ando kwa uwe kulya Esekia we ndeye ellya mara; katannya Baali kitara kyeerasya kasongosya Ashera sha ilya alesongosya Ahabu mangyi ya Israeli, kasheindya mimuuyo mikasha myoose ya iruveeu, na iifurukannya.

⁴ Nalyo kashesongosya kitara kyeerasya yefo mmba ya Nndumi Iruva, kilya Nndumi Iruva emaamba, “Kunu Yerusalemu nsheselesaa-fo irina lyakwa.”

⁵ Nalyo kashesongosya-fo kitara kyeerasya maruva yefo mmba ya Nndumi Iruva.

⁶ Naasa kaniingya mwana wakwe kiraso kya imamita, kimaruma kya usavi na ilafya, katana makasha meengyi a unyafi usanguny lwa Nndumi Iruva.

⁷ Naasa ifwanu llya lya Ashera esongosya kashelyivika kulya mmba ilya Nndumi Iruva evia Davidi na Solomon mwana wakwe, “Kunu mmba yei na kunu Yerusalemu, mmbo shilemma isauwa nnang'ani a ngyufyari toose ta Israeli, nng'u ando shisheindywaa llung'anu;

⁸ mmbashekikupoo kunu Israeli nta ira-raa kwaasha na uruka yelu shilemma iniinga vandeye vawo-fo, kwakooya vakwiisa na yiindya mavavaso akwa na alya a ishinga lyakwa Mose.”

⁹ Indi-lyo mmbalekunda yaarannya-fo nawe Manase keengera-se ivateere vakatana makasha akailannya alya etanwa mmbandu va masanga alya Nndumi Iruva evamamita usangun lwa vana va Israeli.

¹⁰ Naasa Nndumi Iruva karera kwa varundi vakwe vakisuku, kaamba,

¹¹ “Kimmba Manase mangyi ya Yuda allyamara, katana makasha kailannya alya moose vetana Vaamori valya vekee kunu kwambee yakwe, nawe kateere vayuda na mafwanu akwe;

¹² Kweekyo Nndumi Iruva aamba indi, we Iruva wa Israeli, Lola shikeyeendengapo uwe ya Yerusalemu na uwe ya Yuda, mkasha avavisaa, na wo nndu yeto ashiita maarwi akwe mmbo ashesuruvaa.

¹³ Shimweengye ngapo nnang'ani ya Yerusalemu na Samaria, shindesandya-fo na mmba ya Ahabu; shindengata Yerusalamu sha nndu ashaangataa kideeva kakifulutya-si.

¹⁴ Na veni ding'u valya vasaa-fo shishevaanta-fo, shivaniingye maakony a vakiduva vawo, vashekamarwaa nrapu na mashinga yefo kwa vakiduva vawo,

¹⁵ kimaruma kya itana makasha mbee ya usangu lwakwa, sharooywa nngo, kufike nkonu ulya sheuta vandeye kulya misri kufike nkonu wa inu.”

¹⁶ Kilanya ya fyoose Manase mmbo apusuye samu ya vandu veengyi valatiri mbese na nndu, kutani yawala-wala urukeny koose kupookya Yerusalemu; kyeendwa mmbwe Kateere Vayuda vakatana ulyamari mbee ya usangu lwa Nndumi Iruva.

¹⁷ Ulaalu, findo Manase atannyi yefyo fisaaye-fo, na filya fyoose aletana, na ngyulyamari atannyi mmbo filakee fireiye yefo fitabuny fya mikonu ya Vamangyi va Yuda?

¹⁸ Naasa Manase kafwa, kimwi sha vandeye, kaarwa kulya kyaambeny kya mmba yakwe kulya kyaambeny kya Ussa; na Amon nsero wakwe kashillya ando akwe.

Mangyi Amoni wa Yuda

¹⁹ Amon etiri myaaka makumi avii na ivii kyeeri epoka ishillya, nawe kashillya Yerusalemu myaaka ivii. Irina lya maye ni Meshullemeth mfu wa Harus wa Yothbah.

²⁰ Nawe kava mwiitana makasha mbee ya usangu lwa Nndumi Iruva, kimwi sha Manase we ndeye.

²¹ Meengye yakwe myoose ikavaka meengye ya ndeye, nawe kava mwiifurukannya mafwanu na iayiindya.

²² Kafuluta Nndumi Iruva, Iruva yeto wa vandeye nta nalakunde ilatya shia ya usumanu ya Nndumi Iruva.

²³ Nawo varundi va Amon vakandevika kyama kya uriingi uwe ya mangyi kutani vandemmbwaiya yefo mmba yakwe muni

²⁴ Indi-lyo vandu va uruka lulya vakarumata vandu valya woose vevika kyama kya iwaa mangyi Amon, na andu akwe vakavika-u Yosiah nsero wakwe nave mangyi andu akwe.

²⁵ Naasan, mashora yoo moose Amon atannyi na yoo alesaa-fo, mmbo alakee mareiye yefo kyitabuny kya mikonu ya vamangyi va Yuda?

²⁶ Karikwa kifun kyakwe kulya nnden wa Ussa, na mwana wakwe Yosia kashillya andu akwe.