2 VAMANGYI 2 - BIBILLYA Mareiyo Meele a Iruva

Elia aroswa uwe iruveeu

¹ Llyo Elia evesha aryani na Elisha wooka Gilgali, Nndumi Iruva kakunda isaamisa Elia iruveeu na uraato lwa kitita-si

² Elia kavia Elisha, Shakutereva, kaa yaandi, mashika Nndumi Iruva anshiruma shifike Betheli.

³ Elisha kaamba, yeny na muu wakwa, na Nndumi Iruva eefo na muu, nshikulekeiyaa-fo. Nawo vakeenda fika Betheli. Naasa vana va vakisuku valya vekee kulya Betheli akalatya Elisha, vakammbia, A ndesa! Kwiishi sheelyi Nndumi Iruva akunndye yuutau Nndumi wafo inu? Kaamba, yee, shiishi; malallyeny.

⁴ Elia kammbia, shakutereva, kaa yaandi, Elisha, mashika Nndumi Iruva ashiruma shifike Yeriko. Elisha kaamba, yeny na muu wakwa na Nndumi Iruva eefo na muu, nshikulekeiyaa-fo. Nawe vakafika Yeriko.

⁵ Naasa vana va vakisuku, valya vekee kulya Yeriko, vakalatya Elisha, vakammbia, A ndesa! Kwiishi sheelyi Nndumi Iruva akunndye yuutau nndumi wafo inu? Karouwa, yee, shiishi malallyeny.

⁶ Elia kammbia, Shekutereva kaa yaandi; mashika Nndumi Iruva anshiruma shifike Yordan. Elisha karouwa kaamba, yeny na muu wakwa, na Nndumi Iruva eefo na muu nshikulekeiyaa-fo. Vakeengera kyaaro na mbee woose vekee vavii.

⁷ Naasa vandu makumi araanu va vana valya vavakisuku vakeenda isalala kwaasha kinnywa nawo vekee vavii vakasalala kufii na Yordan.

⁸ Elia kautafo soori yakwe ya yeerya, kailema kavii kakapa nayo mura, ukakwaava kunu na kunu.

⁹ Nawo vakimaa ikillya mura, Elia kavia Elisha, Tereva kindo kukunndye kyoose na yeny nshekuniinga, Kulaore shamoondowa kwaf. Elisha kaamba, shakutereva, shiniinga fyenga fivii fya nrima wafo five ni ding'u yakwa.

¹⁰ Kaamba, kwatereva kindo kyuumu; indilyo, kwashilollya elyi shisheipowaa kwafo, kushewonisaa; lyo nkwashilollya, nkushewonisaa-fo.

¹¹ Nalyo vekee kyaarony, vereraa indo, pari-pari kukasha-u ikari lya muro na frasi ya muro likavarauwa wo vavii; uraato lwa kitita-si lukasaamisa Elia iruveeu

¹² Nawe Elisha kalollya kafua, Nde-yakwa, Nde-yakwa, ikari lya Israeli na vesaama frasi vakwe! Alaidimi ilollya lyingyi, karandwa soori takwe fyenga fivii.

¹³ Nalyo keepo soori ilya ya Elia ilemmboya, kavuya, kandealala alya mbai ya mura wa Yordan.

¹⁴ Keepo soori ilya ya Elia ilemmboya, kakapa nayo mura, kaamba, Nkwi Nndumi Iruva akai, Iruva wa Elia? Nawe ekikapa mura ukwaava kunu na kunu, Elisha kakillya.

¹⁵ Nawo vana va vavakisuku valya vekee kulya Yeriko vakalollya vakaamba, Mumuyo wa Elia mmbo ukee nnang'ani ya Elisha. Vakasha ikwanannya nawe, vakakulema kifulufulu mbee yakwe.

¹⁶ Vakammbia, Lola, yaa lukai kwiiyo mashinga afo vandu vatoki makumi araanu, lwakutereva vaende vanderuuya nndumi wafo, kulakooye ndesa ni Mumuyo wa Nndumi Iruva wamwiipo ukandemweera uwe ya ifumbuu ao waangyee-u. Kavavia, Mulavarumi-fo.

¹⁷ Vakaengera imwiitikya kutani alollya usutu; kaamba kyasia! Varuminy. Naasa vakavaruma vandu makumi araanu, vakaruuya mikonu iraru valalollye.

¹⁸ Vakammbuiya, llya alekyeeyo kulya Yeriko; kavavia, shilemuvia-se mulasheyeenda?

Ngyende ta Elisha

¹⁹ Vandu va muriny vakavia Elisha, Lwakutereva andu yaa lukai ni muri nsha indi-lyo mura wa vayo ni nkasha na uruka ni uporu.

²⁰ Kaamba; Sheengyeny kia kiiya muvike-fo shumbi musheengye

²¹ kakwiipo kafika usokeny lwa mura, keera-fo shumbi ilya, kaamba Nndumi Iruva aamba indi shammeeremuta mura yeu, nkukyikaa kuuke-fo lyingyi kindo kifu nta iwonika-fo kiporu-fo.

²² Nato mura ulya ukaeremuka fika inu ndesa Elisha alerera.

²³ Ooka kulya kasaama kafika Betheli, nawe eshendaa indo kakwaanannya na vana vakoo wooka muriny, vakankapya ngula, vakammbia Saama yewe meewoya! Saama yewe meewoya!

²⁴ Kalola numa kavalollya, kavadenga kwa irina lya Nndumi Iruva Ngare ivii ta kyika tikafuma efo ngoroshony tikavarattwa, vana vakoo makumi aana na vavii nnang'ani yaawo.

²⁵ Kakwiipo kulya kafika ifumbuu lya Karmeli, na yuuka kulya kawuya kafika Samaria.