2 VAMANGYI 18 - BIBILLYA Mareiyo Meele a Iruva

Mangyi Esekia wa Yuda

¹ Kwikee mwaka wa kararu wa Hoshea mwana wa Ela, mangyi ya Israeli, Esekia mwana wa Ahasi, mangyi ya Yuda, kapooka ishillya.

² Etiri myaaka makumi avii na iraanu kyeeri epooka ishillya, kashillya Yerusalemu myaaka makumi avii na kyeenda. Irina lya maye evangwa Abiya mfu wa sekaria.

³ Katana fya usumanu mbee ya usangu lwa Nndumi Iruva, ngata ilya sheni mangyi etana we ndeye.

⁴ Kalyamara ando alya a uwe kawunndwa ngo ya Ashera ilya karumbwa shoka ilya ya arera yesongosywa Musa kaifishafisha fyenga mashika fika mikonu yeyo mmbo vana va Israeli vekefumbira ufumba, nawe kaifishya irina lya vayo ni Nehushtani.

⁵ Kakusirya Nndumi Iruva, Iruva wa Israeli nta nkulelollywa-fo ngata yakwe yefo vamangyi woose va Yuda-fo naakwa ni valya vakwambee yakwe.

⁶ Mashika ekutiri na Nndumi Iruva kalatya shia takwe katira mavavaso a Nndumi Iruva alya evavasywa ni Mose.

⁷ Nawe Nndumi Iruva kava kimwi nawe; wo andu aleenda, kavesywa. Kalakana deny na mangyi ya Ashuru

⁸ Kakapa Vafilisti fika Gaza na minyanuny yakwe, kupookya nnara wa veeringa kio kufike muriny nnini.

⁹ Kwikee mwaka wa kaana wa mangyi Esekia, nto wekee mwaka wa mfungare wa Hoshea mwana wa Ela, mangyi ya Israeli, Shalmanesa, mangyi ya Ashuru kakwiipo kakapana na Samaria kantira.

¹⁰ Vakashillya andu a myaaka iraru, nkyo kwikee mwaka wa karindaru wa Esekia, wekee mwaaka wa kyeenda wa Hosshea mangyi ya Israeli, llyo Samaria yelotorwa.

¹¹ Mangyi ya Ashuru kasamia Israeli fika Ashuru, kavavika kulya Hala, na kulya Habori, kufii na mureny wa gosani, na miriny ya vaamedi,

¹² mashika mmbelekunda yiindya unyanga lwa Nndumi Iruva, Iruva waawo-fo mmbo valemina mavavaso, moose Mose nndundi wa Nndumi Iruva alevavasya, mmbalekunda iyaarannya nta yaatana-fo.

Vaashuru veerese Yerusalemu

¹³ Kwikee mwaka wa ikumi na kaana wa ushillyi lwa mangyi Esekia Sekenaribu mangyi ya ashuru kakapa na itira miri miniini myoose ya Yuda.

¹⁴ Nawe Esekia mangyi ya Yuda karuma vandu vafike Lakishi kwa mangyi ya ashuru, vaambe, “Shilekulyamarya shireeya-u kuwuye kwafo wokindo kusheshivesaa mmbo nshiirikyaa.” Mangyi ya Ashuru kavia Esekia mangyi ya Yuda naniinge talanta ta fesa mayana araru na talanta ta saabu makumi araru.

¹⁵ Esekia kaniingya fesa shoose tilelollywa kulya mmba ya Nndumi Iruva, na umasi lwa efo mmba ya Nndumi Iruva, na umasi lwa efo mmba ya mangyi.

¹⁶ Kyeeri yekyo Esekia kaammbwa-fo saabu yekee uwe ya myaango ya mmba ya Nndumi Iruva na uwe ya ngo tilya Esekia mangyi ya Yuda ativikye-fo saabu kaniingya mangyi ya Ashuru.

¹⁷ Mangyi ya Ashuru karuma masiingo a vandu vakwe na vaniini vakwe va fira wooka Lakishi kwa mangyi Esekia kulya Yerusalemu amwi na itorito lya fira iniini. Nawo vakasaama vakafika Yerusalemu vakifika kulya vakasha isalala kufii na mfongo wa iruva irwa lya uwe llya lyikee kulya shia shiniini ya yeenda imungony lya Dobi.

¹⁸ Naasa vekimaa ivaanga mangyi Kasomuka-fo Eliakimu mwana wa Hilkia ulya mwiisalallya mmba ya mangyi na Shebna mwireiya mbony ta firembo na Yoa mwana wa Asafu ulya mwiireiya mbony ta wo nkonu.

¹⁹ Nniini wa fira kammbia naasa endevien Esekia mwaambe Mangyi ang'ani mangyi ya Ashuru mmbo akuvesa ni Vovi yeto kummbikye nsia?

²⁰ Yewe mbony yeto kukeyaamba mmarero alatiri shia nta finya ya fira. Ni vovi yeto kummbikye nsia kutani kwashimina yeny?

²¹ Laalu lolaan ni ikongye yelyo yoondore llyo kulyivikye nsia yo Misri yelyo lyishiidima idosha nndu woko elyi akutira nalyo, Ni indo Farao mangyi ya Misri akai kwa valya woose vammbikye nsia.

²² Indi kwakooya, mushiryaa, “Nndumi Iruva weeru,” mmbwe lummbikye nisia nshi we yeto Esekia aleutau andu kwakwe kweerasya kavia vandu va Yuda na Yerusalemu andu kwany kweerasya ni yaandi Yerusalemu?

²³ Naasa ulaalu, ruuya kindo kyeerekya nndumi wakwa mangyi ya Ashuru; Neeny nshekuningaa frasi fiku fivii kwakooya kutiri vandu valoshe.

²⁴ Mmbo kushiidima indaany iviira numa umwi wa varundi va nndumi wakwa, yeto akee n-du ya woose na kwa Misri?

²⁵ A ndesa yen mmbo shilesha ikaba fira kunu na ilyamara kundo kunu kuleefo irero lya Nndumi Iruva? Nndumi Iruva mmbwe aleshivia, “Kwiipo kwandekaba na ilyamara uruka yelu.”

²⁶ Llyo Eliakimu mwana wa Hilkia na Shebna, na Yoa, vakavia ishinga llya, “Lwakutereva kurere na varundi yeva vafo kiashuri mashika lukiishi nta kulashererya kishomu kya Kiyuda mashika vandu yewo vakee yoo isimambany vashiita.”

²⁷ Ishinga llya lyikammbia, “Ndesa, nndumi wakwa mmbo aleshiruma kwa nndumi wafo na yewa shaambe marero yaa? Nshi mmbo aleshiruma kwa vandu yeva vakee kunu isimambany naambo valye maafi awo veni na ina mamaamu awo andu amwi neeni?”

²⁸ Naasa ishinga llya lyikasalala lyikafua kwa unyanga uniini kiyahudi, kaamba, “Aranyiny irero lya mangyi ang'ani, mangyi ya Ashuru!

²⁹ Mangyi aamba indi; Esekia alasheemulemba-fo mashika nnyashiidima imuuta wookony lwakwe-fo.

³⁰ Nta Esekia nalamuvike nsia kwa Nndumi Iruva Ashaambaa, Kya dede Nndumi Iruva alukiraa, nta muri yeu mmbuniingywaa maakony a mangyi ya Ashuru-fo.

³¹ Mulaaranyi Esekia-fo; mashika mangyi ya ashuru: aamba indi, Songosyen mbony yeti neeny; tisye muuke-o mushilatye mushelya wo nndu ndunda ta nsabibu akwe, na ndunda ta mafwa akwe, mushera wo nndu mura wa birika yakwe muni;

³² kutani shamukamara shindemufita urukeny luwakye uruka yelu lwany muweni, uruka lutiri fyeelya na fyeena, uruka lwa shoonga na marema a misabibu, uruka lwa mafura a miseituni, na ukyi, naambo mukkye mulashefwa nta mulasheyaarannya Esekia kyeeri kya emulemba eshaambaa, Nndumi Iruva alukiraa.

³³ A ndesa eefo mangyi ya masanga umwi alenkira vandu vakwe kyeeri kyooe efo wokony lwa mangyi ya Ashuru?

³⁴ Nkwi akai maruva va Hamati na Arpadi? Nkwi akai maruva va sefarvaimu na Hena na a iva? A ndesa alenkira Samaria uka wokony lwakwa?

³⁵ Nnang'ani a maruva a ngyuruka yeti toose ni maruva angaa alenkira uruka lwawo na woko lwakwa kutani Nndumi Iruva akira Yerusalemu na woko lwakwa?”

³⁶ Indi vandu yewo vakasyado sau kulore valendouwa nta irero lyimwi, mashika ivavaso lya mangyi lyekee indi “Mularouwe irero.”

³⁷ Llyo Elikiamu mwana wa Hilkia, ulya eke mwiisalallya mmba ya mangyi, Shebna mwiireiya, na Yoa mwana wa Asafu, ulya mwireiya mikonu, vakeenda kwa Esekia na Soori tikeeshiranndwe, vakammbia mbony ta ishinga llya Rabishakeh.