2 VAMANGYI 13 - BIBILLYA Mareiyo Meele a Iruva

Mangyi Yehoasi wa Israeli

¹ Yehohasi, mwana wa Yehu. Kwikee mwaaka wa makumi avii na kararu wa Yoashi mwana wa Ahasia, mangyi ya Yuda, Yehohasi mwana wa Yehu llyo apooka ishillya Israei kulya Samaria; kashillya myaaka ikumi na mfungare.

² Katana makasha usangun lwa Nndumi Iruva, kalatya makasha a Yeroboamu mwana wa Nebati, yoo aleengye vana va Israeli vakateere.

³ Nndumi Iruva karooywa ni ngoo uwe ya Israeli, kavavika maakony a Hasaeli mangyi ya Shamu, na Ben-hadadi mwana wa Hasaeli mikonu myoose.

⁴ Nawe Yehoahasi kafuuya Nndumi Iruva; Nndumi Iruva kamwaaranya, mashika enlollya mangyi ya Shamu ngata enlyisa vana va Israeli ukiva.

⁵ (Nndumi Iruva kaniinga vana va Israeli mwiikira yeto aleshewoota yefo ushilyiny lwa Vaashami; vana va Israeli vakashekaa kyeny kwawo sha kasha.

⁶ Indi-lyo mmbalelakana na makasha a vana va mmba ya Yeroboamu, alya aleteere vana va Israeli-fo, indi vakaengera ikaa shallya vekai; nayo Ashera ilya ikakaa indo kulya Samaria).

⁷ Mashika Yehoahasi nnyalereeya vandu-fo kuuta vesaama frasi makumi araanu, na mitika ikumi, na fiku ikumi fya vasikari vashendaa na marende, mashika mangyi ya Shamu emmbavavara kavalyamaradeny vakava sha kiluulyi.

⁸ Naasan mirundye myoose ilya Yehoahasi aleidima itana, kwa wiidimi lwakwe, na ilya ilesaa-fo ndesa mmba kulare ikee mireiye yefo kyitabun kya fyeeri fya Vamangyi va Israeli?

⁹ Yehoahasi kafwa sha vandeye; vakamwaara kulya Samaria. Na Yehoashi mwana wakwe kashilya andu akwe.

Maangyi Yehoashi wa Israeli

¹⁰ Kwikee mwaka wa makumi araru na mfungare wa ushilyi lwa Yoashi mangyi ya Yuda, llyo Yehoashi mwana wa Yehoahashi epooka ishillya Israeli kulya Samaria, andu a myaaka ikumi na irindaru.

¹¹ Keengera itana makasha mbee ya usangu lwa Nndumi Iruva, makasha a Yeroboamu mwana wa Nebati, alya aleteere vana va Israeli; nta nalakunde ilakana nang'u.

¹² Naasan mirundye myoose ya Yehoashi ilesaau na ilya myoose aleidima itana kyeeri ekapanaa na Amasia mangyi ya Yuda, ndesa mmbo ilakee mireiye yefo kyitabun kya fyeeri fya vamangyi va Israeli?

¹³ Yehoashi kafwa sha vandeye; nawe Yeroboamu kakaya kiri kyakwe kya ushilyi, nawe Yehoashi karikwa kulya Samaria andu amwi na vamangyi va Israeli.

Ufu lwa Elisha

¹⁴ Naasan Elisha entirwa nndwari yakwe ilya ileshemmbwaa; nawe Yehoashi mangyi ya Israeli keenda indensaiya, kayiiya mbee yakwe kaamba; Nde yakwa! Nde yakwa! Ikari lya Israeli na vesaama frasi vakwe!

¹⁵ Elisha kammbia, “Ipoo ura mife;” nalyo keepo ura na mife.

¹⁶ Naasa kavia mangyi ya Israeli, “Tira ura lwafo wokon;” nawe kavika woko lwakwe uwe yakwe Elisha kavika maako akwe uwe ya maako a mangyi.

¹⁷ Kaamba, “Rua itirisha elyo lya taari lya ngama;” kanyirua. Naasa kaamba, “Ura lwa Nndumi Iruva lwammbinga ee, ura lutiri finya lwammbinga Shamu, mashika mmbo Vaashami vakapwaa efo Afeki kutani vamamikaa.”

¹⁸ Naasa kaamba, “Ipoo mife.” Nawe keepo. Naasa kavia mangyi ya Israeli, “Kaba nayo uruka,” kakaba uruka kararu, kamalallya.

¹⁹ Nawe nndu wa Iruva karooyo ni ngoo kimaruma kyakwe, kaamba, Mmbo kyeekwaani kukabe ka matorito a raanu ao arindaru; llyo kwekapaany Shamu kararu yeni.

²⁰ Elisha kafwa nawo vakanrika. Naasa ironda lya vasikari va Vamoabi vakaanga kulya urukeny lulya mapokyon a wo mwaaka.

²¹ Ate, nndu eefo arikwaa, pari-pari, valollya vasikari; vakallekeiya yefo ki funy kya Elisha; nelyo nnying'a ulya wikipaana mafua a Elisha karuka kasalala na marende akwe.

Fira ya Israeli na Vaaramu

²² Nawe Hasaeli mangyi ya Shamu kasisya Vaisraeli mikonu myoose fya Yehoahashi.

²³ Indi Nndumi Iruva kavalillya, na itingwa, kyawo kimaruma kya kyaasa kyakwe na Abrahamu, na Isaka, na Yakobo, nta nnyalekunda ivamamita nta ivantya kwaasha na usangu lwakwe-fo.

²⁴ Hasaeli mangyi ya Shamu ekifwa, mwana wakwe Ben-hadadi kashillya uruka andu akwe.

²⁵ Nawe Yehoashi; mwana wa Yehoahashi kasoka Ben-hadadi miri ilya myoose Hasaeli ensoka Yehoahasi we ndeye kyeeri kya fira. Ka matorito araru Yehoashi kammbinga na itauwa miri ya Israeli.