2 VAMANGYI 12 - BIBILLYA Mareiyo Meele a Iruva

Mangyi Yeoashi wa Yuda

¹ Mwaaka wa mfungare kyeeri kya ushilyi lwa Yehu, llyo Yehoashi epooka ishillya, nalyo kashillya Yerusalemu myaaka makumi aana Irina lya maaye evangwa Sibia wa Beer-sheba.

² Na Yehoashi katana fya usumanu mbee ya usangu lwa Nndumi Iruva fyeeri fyoose fya mikonu yakwe mashika ni indo evavaswa ni Yehoyada we nkohani.

³ Indi-lyo kitara kya uwe alya andu kweyuutya firaso nkuleutwau-fo, mmbo valeengera irasa na ikorya-u firaso.

⁴ Yehoashi kavia vakohani, “Fesa shoose ya findo fyeele, yeto tishendwaa na kunu mmba ya Nndumi Iruva; fesa ndesa ntikundikye, wo nndu ndesa aniingyo yeekyena lyakwe na yeto shoose tishendwaa, ndesa wo nndu akunda yefo nrimin wakwe yeende fesa yeto yefo kyen kwa Nndumi Iruva,

⁵ nawo vakohani vaniingye wo nndu yeto amanyikye, nandesongosya nato mmba yefo kyen, wo andu kulollywa kuwundukye.”

⁶ Indi kwiifikaa mwaaka wa makumi avii na kararu wa mangyi Yoashi, vakohani mmbesongosya mmba ilya kundo kulya iwundukye-fo:

⁷ Llyo mangyi Yoashi evaanga nkohani Yehoyaada na vakohani vengyi, kavavesa, “kimaruma nkyokyi mulakunndye isongosya mmba yei yammbunduka?”

⁸ Naasa vakohani vakarummbwa shila sheelyi mmbakiwarya-se fesa tuuka kwa vandu-fo, nta mmbakisongosyaa mmba ilya iwundukye-fo.

⁹ Naasa Yehoyaada nkohani, karuuya ikopo, kadosha kifiniko kya vayo, kalyivika kulya mbee masabahun taari ya woko usha na wo nndu ashaanga yefo mmba ya Nndumi Iruva; na nkohani mwilola yeto akee mmbike-fo kasangirya fesa shoose katiolota kulya ikopon llya yeto teendwa na yefo mmba ya Nndumi Iruva.

¹⁰ Neelyi valollya sheelyi kulya ikopon-llya kwammbikwa-fo fesa shiingyi, ngari wa mangyi amwi na nkohani nniini vakeepo fesa tilya vakateekyena neefingya mbolokony tilya shoose tekee yefo mmba ya Nndumi Iruva.

¹¹ Naasa vakaniingya fesa kwa vandu valya valesalallya na irundya mmba ilya ya Nndumi Iruva; vakaniingya vandu valya valepasha na itana mmba ya Nndumi Iruva;

¹² na valya va mawe naveepasha mawe andu amwi na yuura mbau na mawe fyeesongosya kulya mmba ya Nndumi Iruva yeewundukye.

¹³ Indi fesa tilya tileendwa yefo mmba ya Nndumi Iruva ntilesongosya fikombe fya fesa-so, nta makasi, nta mabakuri, nta iranda nta findo fya ngata imwi ya saabu-fo;

¹⁴ fesa tilya mmbo tileniingyo varundi valya vekesongosya mmba ya Nndumi Iruva.

¹⁵ Indi-lyo fesa tilya veekeniingyaa vandu valya mbalereiyana andu koose-fo, mashika mmbo vekeniingya na usumanu deny kuleefo ntambo.

¹⁶ Indi fesa ta makymfi, na fesa ta mbony ta utefusu, ntileendwa kulya mmba ya Nndumi Iruva-fo; yeto mmbo tekee ta vakohani veni.

¹⁷ Hasaeli mangyi ya Shamu kakwiipo kakapa Gathi, keengera isaama naambo nafike Yerusalemu

¹⁸ Yoashi mangyi ya Yuda kaniingya findo fyoose filya Yehoshafati enfivika wakfu, na Yehoramu, na Ahasia, vandeye vakwe, vamangyi va Yuda, na filya fingyi fyoose venfivika wakfu wo veni, na saabu shoose tilya tikee kulya mmba ya Nndumi Iruva, na ilya yekee yefo mmba ya mangyi, keengye Hasaeli mangyi ya Shamu, naasa Hasaeli kakwiipo Yerusalemu keenda kyakwe.

¹⁹ Ulaalu mbony shoose ta Yoashi tilya tilesaa-fo na tilya shoose aletana, ndesa mmbo tilakeeshireye yefo kyitabuny kya Mikonu ya Vamangyi va Yuda?

²⁰ Nawo varundi vakwe vakavika shila ya uriingyi kandewaiywa kulya mmba ya Milo, alya shia ishoolokaa na Sila.

²¹ Vandu venkapa kafwa ni Yosakari mwana wa Shimeathi, na Yehosabadi mwana wa Shomori na varundi vakwe mmbo venkapa kutani afwa, vakanrika amwi na vande vakwe kulya muriny wa Davidi. Na Amasia mwana wakwe kashillya ando akwe.