2 VAMANGYI 11 - BIBILLYA Mareiyo Meele a Iruva

Malikia Athalia wa Yuda

¹ Na kyeeri Athalia we maaye wa Ahasia alelollya nsero wakwe amfwa, mmbo aleamba mmba shoose ya kimangyi irumato.

² Indilyo Yehosheba, mfu wa mangyi Yoram, mfwamaye wa Ahasia, kepoo Yoash nsero wa Ahasia, kamwiiva nnang'ani a vasero va mangyi valya vekee vandewaawa kandensuruma yefo mmba kireny kya nnang'ani amwi na mwiiri wakwe. Mmbo etana indo kammbika kwaasha, naambo Athalia nalashee-mbwaa;

³ kakaa nawe myaaka irindaru, kansuruma yefo mmba ya Nndumi Iruva, kyeeri Athalia akeshillya uruka.

⁴ Indilyo kwikee mwaaka wa mfungare Yehoyada kasangirya vasikari woose valya veeshilya matorito andu amwi yefo mmba ya Nndumi Iruva, kavavika rembo eevekimba vakalya mma yefo mmba ya Nndumi Iruva, nawe kawoora nsero ulya wa mangyi. Naasa kaveekimba eevavia,

⁵ “Findo mushekoya itana mfyo yefi: kyenga kimwi kya kararu mmbo musheringaa mmba ya mangyi;

⁶ (kyenga kyingyi kimwi kya kararu vashekaa alya mbengyen ya soori na kyenga kya kararu vasheringa kulya kisafu); niindo musheringaa poo kwa mangyi;

⁷ na fyenga fivii nnang'ana yaany, ewo vatiri ikamba nkonu wa iimuya mmbo vasheringaa poo ya Nndumi Iruva;

⁸ veshingillye mangyi, wo nndu etiri fisha yefo wokony lwakwe; na kwakooya kwiifo nndu moose aserikya kufii nawe nawaawa. Keeny kufii na mangyi kyeeri kyoose eshaanga na isomuka.”

⁹ Nniini wa itorito nawe katana ndesa alevio ni Yehoyada we nkohani, na wo umwi kaumbya vandu vakwe, valya vekee mashoreny na valya vetirikiimuyo nkonu wa sabato vashekwanannya na Yehoyada we nkohani.,

¹⁰ Na nkohani kasheniingya nniini wa matorito, mafumu na ngao ta mangyi Davidi, tilya tekee kulya mmba ya Nndumi Iruva,

¹¹ veeringa woose, vakatira wo nndu kikama kyakwe wokony, taari shoose taari ya sinde na taari ya ndoo vakaringitya mmba shoose ya mangyi.

¹² Naasa vakasomuta nsero ulya wa mangyi vakammbika ureto uwe yakwe vakamwamba mafura, vakamwallwa mangyi; vakafina mbasa, “vakankunndya muu mwaasha.”

¹³ Athalia ekiita kyoorongye kya varingyi na kya vandu kalatya na kulya mmba ya Nndumi Iruva ikai;

¹⁴ ekifika-fo kalollya mangyi eeselelyi na ngo ndesa ikee miishivire vaniini va matorito amwi na veekaba mbembe veeringitye mangyi andu amwi na vandu woose veefura na ikaba mbembe. Na Athalia karandwa soori takwe kaffwa, “Uringyi! Uringyi!” “Nawaawa! Nawaawa!”

¹⁵ Naasa Yehoyada we nkohani kaveetika veesalallya matorito kaamba, “Muuteny yefo nnang'ani ya safu, na nndu moose yeto allatya numa narumbuwa na usu.” Nkohani mmbo aleamba indi, “Loleny, nalashewaiywa kunu mmba ya Nndumi Iruva.”

¹⁶ Nelyo vakamwiita na shia ya frasi yeyo ishaanga na yefo mmba kwa mangyi, vakandembwaiya-fo.

Yehoyaada aalashika

¹⁷ Naasa Yehoyada kallya mma nnang'ani yakwe na Nndumi Iruva, na mangyi na vandu, sheelyi mmbo vashevaa vandu va Nndumi Iruva, na lyingyi nnang'ani ya mangyi na vandu.

¹⁸ Naasa vandu woose va uruka vakeenda na kulya mmba ya Baali vakaiwunnduya si; na mafwanu akwe moose akafishwa-fishwa amwi na fitara fyerasya, na Matani ulya nkohani wa Baali vakambwaiya alya kitareny kyeerasya. Na kulya mmba ya Nndumi Iruva, nkohani kavika-fo vandu veeringa.

¹⁹ Nalyo kaumbya vandu na vaniini va matorito, na vandu va uruka woose, nawo vakandekamara uka kulya mmba ya Nndumi Iruva velatya shia ilya ya mengye na mmba ya mangyi. Naasa kawarya na ikaya kiri kya vamangyi.

²⁰ Na vandu va uruka woose vakafura, na muri ukava na ufoo Athalia ekimaa iwaiyo kulya mmba ya mangyi.

²¹ Nawe Yoashi mmbo etiri myaaka mfungare kyeeri epooka ishillya.