2 Vakorinto 4 - BIBILLYA Mareiyo Meele a Iruva

Simbo ta Mumuyo fiyyeny fya uteeri

¹ Naasany, kimmba lutiri urundi elu, shaasa lulelyimywa isaryo, llusheelelekaa-fo.

² Mashika findo efyo fya sony fya kirika mmbo lulefilema, nta llukaa na ntambo-fo, nta isasanda irero lya Iruva na wongo-fo. Mashika lukammora ekyo kyikee kya dede paa, mmbo loora shaasa lukee va usumanu, mirima ya vandu iiluvikyaa ukureekyi mbee ya Iruva.

³ Lyo kwankooya Nrumi ya Nsia yei yeeru yansurumwa, mmbo yasurumwa kwa yewo vakeereka;

⁴ yewo iruva lya ulana yelu lyilesingira makusaro awo, kimmba valairikkye, na sa ya nrumi ya nsia ya Kristo yeto akee kyaaso kya Iruva ikara ilavafumya.

⁵ Mashika yese llukeekuvambisya luveni-fo, kuuta ni Kristo Yesu sheelyi ni Nndumi, neese sheelyi mmbo lukee varundi vany kimaruma kya Yesu.

⁶ Mashika kimmba Iruva aleamba, “Sa imike ireeminy” mmbwe yeto alemika kunu miriminy yeeru, naambo naluniinge sa ya urango lwemanya Iruva lwiilolaa Yesu Kristo.

⁷ Lyo mmbo lutiri umasi yelu fiiyeny fya uteeri naambo usuri yelo uniini luve lwa Iruva, lulaukye kweru.

⁸ Mmbo luringityo nngatara, lyo lulafotwa, lukatirwa nnyinyira, lyo lulaute pa.

⁹ Lukasutwa lyo llukeerewa-fo, lukafwalywa si, llyo llukeemamitwa-fo.

¹⁰ Wo nkonu mmbo lurye iwaawa lya Kristo kunu miiliny yeeru, na muu wa Yesu ushelollyo paa miiliny yeeru.

¹¹ Mashika yese lukee na muu wo nkonu mmbo lukeerawa lundefwa kimaruma kya Yesu, naambo na muu wa Yesu ulollyo paa miiliny yei yeeru iraiye ufu.

¹² Naasany yoo nng'u ufu lwakoora nnang'ani yeru, na muu nnang'ani yaany.

¹³ Kyaindi kimmba lutiri mumuyo ulya mweni wa kyikusiryo, shaasa kyikee kyireiye, “Mmbo shilekusirya-u, nakyo kimaruma shilerera, yese mmbo lukusirye-u, na kyeendwa nkyo lukarera.

¹⁴ Lwiishi sheelyi yeto aleruta Nndumi Yesu, mmbo ashelurutaa neese ando amwi na Yesu, na ilusanda ando amwi neeni.

¹⁵ Mashika findo fyoose nkimaruma kyany, naambo elyi isarya elyo lyisheengerwaa nnu kwa yewo veengyi kyaanu king'ani na Iruva nawoni iitikiswa.”

Ikaa kikusiryony

¹⁶ Kweekyoony llusheelelekaa-fo, na kyikava unndu lweru lwa kyipoo lukeekwa. Lyo unndu lweru yelo lwa efo nnang'ani mmbo lukevikwa wiiya nkonu simu.

¹⁷ Mashika ngatara yeeru nshaang'u ikaveva ya kirambo kyaangu-da, nayo mmbo yalweengye itumbe llya lya llung'anu lyiilannyi nnu.

¹⁸ Naambo lure lulalole nnu yefi filollyo ulaalu, llulle efyo filalollyo. Mashika efi filollyo ulaalu mfya kirambo-da, lyo yefyo filalollyo mfya llung'anu.