2 Vakorinto 2 - BIBILLYA Mareiyo Meele a Iruva

¹ Kyaindi nriminy wakwa mmbo shekundye indi, shilashe kwany na ting'wa.

² Mashika kwakooya shamuniinga ting'wa ni vi yeto ashiningaa ifura yeny kuuta yeto akeeningwa ting'wa nnyeny?

³ Neeny mmbo shemureiya irero elyo yeni, naambo elyi nshaa shilashesua na valya kishisumanyi ifura nawo, shimuvikye nsia yeni moose sheelyi ifura lyakwa yeny llyo na lyany yeni.

⁴ Mashika kunu ukiveny lwakwa na ngatareny ta nrima wakwa mmbo shilemureiya na misoru miingyi, nshi naambo mukooye isua-fo, kyaindi naambo mukoye imanya ikunda elyo lyakwa kwany shaasa lying'ani.

Ifwaayana

⁵ Kyaindi kwakooya nndu anyarika nshi ashinyarisa yeny da-fo lyo kyenga (naambo shilasherovya nndu) mmbo amunyarisa neeni moose.

⁶ Mmbo kyeema nndu wa ngata yeyo nawoni ngapo yeyo aniingwa nnyewo vengyi;

⁷ na kilasha kya efyo, kyeni munsarye neembiirya muu, naambo nndu sheeto nalashemirwa ni unyaario lwiirye kyeeso.

⁸ Nkyo mmbo shamutereva mumoore ikunda lyany.

⁹ Mashika nkyo kimaruma shilereiya naambo nkooye imanya kwany kwakooya muleva veindya kya findo fyoose.

¹⁰ Kwakooya mwafwaaya nndu kya kindo kyoose neeny mmbo mmufwayaa, mashika naakwa ni yeny kwakooya shafwaaya nndu kindo kyoose, mmbo shamfwaaya kimaruma kyany mbee ya Kristo.

¹¹ Loleny, mmbishwa nalasheluvinga, mashika lwiishi ngata takwe.

Nyinyira ya Paulo muriny wa Troa

¹² Naasa lwikifika Troa kimaruma kya Nrumi ya Nsia ya Kristo, sharuywa mwaango kyeendwa ni Nndumi,

¹³ nriminy shilasenywa mashika nshilelollya mwana-ma Tito-fo, nkyo shavasama sheenda Makedonia.

Uvingyi lwa Kristo

¹⁴ Llyo Iruva naarafuma akee iluniinga ifura wo kyeeri lukee na Kristo neekaarisa nrungo eto wemmanya we ando koose kunu ishoreny lyeru.

¹⁵ Mashika yese mmbo lukee kifwaamu kya Kristo mbee ya Iruva, na kwa yewo vakeekirwa, na kwa yewo vakeereka;

¹⁶ kwa yewo vakeereka ni kyuuna kya ufu, lyo kwa valya vakekirwa nkifwaamu kishendee muu. A-ni vi yeto amaaye kya findo efyo?

¹⁷ Mashika yese llukee sha yewo vengyi vakekapya irero lya Iruva mbusha-fo kyaindi mmbo lukee vaa pyai miriminy sha vana vaukye kwa Iruva, niindo lwaamba lukee na Kristo.