2 Vakorinto 10 - BIBILLYA Mareiyo Meele a Iruva

Paulo akapannya urundi lwakwe

¹ Kyasia, yeny Paulo shimuni shamutereva na ufoo na waarya lwa Kristo; yeny shikunyiisye indo shikee neeni, kyaindi shilaiyo mmbo shitiri ukaari uniini;

² yee, mmbo shikundye kwakooya shiiyo, shilave na ukaari kwa yewo valulollye sheelyi yese mmbo lukeesora findo fya mwiili.

³ Mashika na kyikava lukee na mwiili, lyo fira yeeru nshi ya mwiili-fo.

⁴ Mashika fisha fya fira yeeru nshi fya mwiili-fo, mmbo fitiri wiidimi lwa Iruva kutani fyaidima iwunndwa turuve.

⁵ Lukavika makusaro si na wo kindo kikurosye, kikurosaa uwe ya urango lwa Iruva; neese lukammiidima iwara wo ikusaro naambo lyiindye Kristo.

⁶ Neese lukankunda isisya maravi moose, wiindi lwany lushaawukyaa.

⁷ Loleny efyo fikee yoo mbee ya miso any. Nndu kankuvika nsia we muni sheelyi mmbo akee nndu wa Kristo, navekusara indi we muni, sheelyi shaasa we akee wa Kristo, neese-da ni kiwo.

⁸ Mashika naakwa shakurumisha shimuni mmwasi kinnywa, kimaruma kya wiidimi shikeeniinge ni Nndumi, naambo shiidimi imuvangisa, nta nshi imutuula-fo, naakwa ni indo nshikuryaa-fo.

⁹ Kilasheeva sheelyi mmbo shikundye imumatwa na barrwa takwa.

¹⁰ Mashika mmbo mukee yaamba, barrwa takwe nshiroo, nshikaari, llyo eiyo we muni ni mfwafwa, na marero akwe nshi kindo-fo.

¹¹ Nndu sha yeto nakusare indi, shaasa lulollywa efo barrweny lulaiyoo, niindo da luvekai efo mitanyiny yeeru kyeeri lwiiyo.

¹² Mashika llukaryaa isanga ando amwi neewo vekurosa wo veni-fo, nta ikwiinanisa nawo-fo, kyaindi wo veni vakankulolalola shaasa vakai, neekwiinanisa wo veni na veni, naasa mmbo vakooya mmbatiri urango-fo.

¹³ Lyo yese llukurumishaa kiilanyi mwiina weru-fo lukeveesye ni Iruva-fo, nkyo kyeeso kyeefika kwany.

¹⁴ Mashika nta llushidimaa ikurosa luveni ngota elyi lukai-fo, kive sheelyi lulafye sheeni-fo, mashika lulesongwa ifikaa kwany na Nrumi ya Nsia ya Kristo.

¹⁵ Nta llukurumishaa kiilanyi mwiina weru-fo, yee, efo ngatareny ta vandu vengyi, kyaindi lwivikye nsia sheelyi elyi kyikusiryo kyany king'anaa, mmbo lung'aniswaa efo kwany shaasa kilusumanyi, na yeengerya-u;

¹⁶ kutani lushaambaa Nrumi ya Nsia fika ngyurukeny yeto tiirye efo kwany, lulasheekurumisha na kyeeso kya nndu ungyi kya findo filya fisongosie.

¹⁷ Lyo mwikurumisha nakurumishe ekee na Nndumi.

¹⁸ Mashika lyo nndu mwiriikyo nshi yeto akurumisha-fo, kuuta ni yeto arumishwa ni Nndumi muni.