2 SAMUELI 9 - BIBILLYA Mareiyo Meele a Iruva

Davidi na Mefibosheti

¹ Naasa nkonu umwi Davidi kavesa, “A ndesa efo kwa Sauli kusaaye-fo nta nndu naambo shintanye mesha shiikumbwa mbuya yakwa Yonathan?”

² Nafo kukaafo nsero umwi wa poo kwa Sauli evaangwaa Seba, vakanrwaa kwa Davidi. Mangyi kambesa, “A ndesa ni yewe siba?” Nawe kaamba, “Yeny ishinga lyafo, mmbwe.”

³ Mangyi kammbia, “A ndesa efo kwa Sauli kwiifo nta nndu asaaye-fo, naambo shintanye fyellyillya? Shaasa shilevika kyaasa mbee ya Iruva?” Siba kavia mangyi, “Mwanawa Yonatan aiyo fika ulaalu, lyo afirikye marende.”

⁴ Mangyi kambesa, “A nkwi akai?” Siba kammbia, “Akee kulya kyeny kwa Makiri wa Amieli, kulya Lodebari.”

⁵ Mangyi karuma vanduvande muuta kulya kwa Makiri.

⁶ Naasa llyo Mefibosheti wa Yonatan wa Sauli aleendwa kwa Davidi, kawa si kifulufulu, kamfiirya ndi. Davidi kambaanga, “Mefibosheti!” Nawe kamwiirikya, “Yee mbee, akalyi ishinga lyafo.”

⁷ Davidi kammbia, “Kulairyae-fo, yeny nkuti shikutannye mesha kimaruma kya ndoo Yonatan, neeny nkuti shikutannye mesha kimaruma kya ndoo Yohatan, neeny mmbo nkuviiryaa marema moose alya a Sauli, neewe kuve mwiilya neeny shoonga kyeeri kyoose!”

⁸ Nawe kafiirya ndi kaamba, “A yeny ishinga lyafo shimaa ki, kutani kwa shikumbwa yeny shivakye kite kifiiye?”

⁹ Naasa mangyi kavaanga Siba ulya ekee ishinga lya Sauli, kammbia, “Masaa moose a Sauli na fya mmba yakwe mmbo fishevaa fya Mefibosheti.

¹⁰ Kunremyi yewe na vana vafo na mashinga afo, muvemwengye fimu fyavayo. Lyo Mefibosheti mmbo avaa mwiilya neeny meseny kwakwa. Nawe Siba mmbo eetiri vana ikumi na varaanu na mashinga makumi avii.”

¹¹ Nawe siba kavia mangyi, “Yeny ishinga lyafo, efyo mangyi avavasya fyoose mmbo nshefitanaa.” Na kya Mefibosheti mangyi kaamba, “Mmbo ashelyaa neeny, kyimwi sha vana va mangyi woose.”

¹² Nawe Mefibosheti mmbo eetiri mwana wakwe nndu evaangwa Mika. Vandu woose va kyeny kwa Siba vakava mashinga a Mefibosheti.

¹³ Mefibosheti kakaa kulya Yerusalemu, kava mwiilya na mangyi mikonu myoose we mmbo eefirikye marende moose ai avii.