2 SAMUELI 8 - BIBILLYA Mareiyo Meele a Iruva

Matorito a Davidi Avinga

¹ Naasa numa yavayo Davidi kandekapana na Vafilisti, kavavinga, katira muri wao Gati na fyuungo fya vayo kasoka Vafilisti.

² Nalyo kandekapa Moabu kavavinga, kavaara si, wo vandu vararu kawaau vavii neekirau umwi nsi. Vamoabu vakava mashinga a Davidi, vakamwengye findo fya pya.

³ Numa kandevinga mangyi ya Siria wa kulya Soba, na Hadadeza we mwana wa Rehobu mashika mmbwe yeto eshitiraa ushilyi lwa mureny wa Efrata.

⁴ Davidi kaidima insoka vasikari va farasi kiku na mayana mfungare, na vasikari va marende fikumakumi avii. Davidi kafirisa farasi toose, kuuta iyanalyimwi tupu.

⁵ Nawo vandu va Siria ya Dameski kyeeri valeruma vasikari vasheekya mangyi Hadadeza wa soba, Davidi kavawaa, nawo veefikye vasikari makumi avii na vavii.

⁶ Davidi kavika turuve kulya Dameski ukee muri wa Siria, na vandu va vayo vakava mashinga a Davidi vakamweengye findo fya pya. Na wo ando Davidi aleenda Nndumi Iruva kanninga-fo uvingyi.

⁷ Nawe Davidi kaipoo ngawo ta saabu yeto ta vandu va Hadadezeri kateende na Yerusalemu.

⁸ Na tingi aletira kulya Tebhati na Berotai nayo mmiri ya Hedadezeri, Davidi kawonisa-fo minya ya arera shiingi nnu.

⁹ Na llya mangyi ya Toa wa kulya Hamati aleeta sheelyi Davidi annyanyata vasikari va Hedadezeri woose,

¹⁰ karuma mwana ulya wakwe Hadoramu nandemwidikira neembya neesha elyi alevinga Hadadezeri, mashika elyi na Hadadezeri enkabana na Tou. Kasha anriye fiiya fya minya na fya saabu na fya fesa.

¹¹ Nawe Davidi kandefirwaa kwa Nndumi Iruva

¹² ando amwi na filya fileuka Edomu na Moabu, na kulya Amoni na Vafilisti, na fya Vaameleki na filya fileutwa fireny ya Hadadezeri wa Rehobu we mangyi ya Soka.

¹³ Davidi kaona nnduma nniini kyeeri alooka ikabana na Vaedomu kulya imungony lya Shumbi, kundo alewaa vandu fiku ikumi na nyanya

¹⁴ Kulya Edomu kavikafo vasikari veeringa turuve ilya, na Veedomu woose vakava mashinga a Davidi. Nawe Nndumi Iruva kaniinga Davidi uvingi wo ando aleenda ikabana.

¹⁵ Davidi kashillya Israeli koose, na vandu vakwe woose vakatannyo fya mesha na fya usumanu.

¹⁶ We Yoabu mwana wa Seruya mmbo ekee nniini wa Vasikari, na Yosefati wa Ahiludi, kava mmbwe mwiireiya wo kindo kyatanyika na nkonu wa vayo,

¹⁷ na Sadoki mwana wa Ahitubu, na Ahimeleki mwana wa Abiatari vakava vakohani, na shausha kava mwiireiya.

¹⁸ Benaya mwana wa Yehoyada kava mwiisalallya vakereti na Vapeti. Nawo vana va Davidi vakava makohani.