2 SAMUELI 7 - BIBILLYA Mareiyo Meele a Iruva

Nrumi ya Natan Kwa Davidi

¹ Naasa Mangyi Davidi kakukaya ando afoo sau efo mmba yakwe ya kimangyi, Nndumi Iruva kansimba ufoo nalashaatarwaa ni vakiduva vakwe nta taari imwi.

² Naasa mangyi kavia Natan ulya nnabii, “Lolate ulaalu yeny mmbo shakaa mmba shisha ya mieresi, lyo isanduku lya Nndumi Iruva mmbo lyikee efo yemeny.”

³ Natan kavia mangyi, “Lola kumuni efo nriminywafo shaasa kukundye itana, mashika ni Nndumi Iruva akuteteraa,”

⁴ Nalyo kio ekyo kyeni irero lya Nndumi Iruva lyikasheya Natan lyikammbia,

⁵ “Sora nsero wakwa Davidi, kumbie, ‘A yewe mmbo kushitannyaa inda mmba ishimaa ikaafo?

⁶ Mashika yeny nshikaa mmba uka elyo na llya shileuta vana va Israeli kulya Misri, fika inu-fo, ando shikaa ni efo yeemeny na ikwaanuny yeele.

⁷ A ndesa wo ando shileenda na vana va Israeli, shilemaamba kindo kyoose shavia nndu mmbe nnang'ani ya Valeti yewo va Israeli, shambavasya kya Israeli shaamba, Nkyikyi elyi kulare nsero yeto wakwa Davidi anshitanya mmba ya mieresi?’

⁸ “Nndumi Iruva muni matorito aamba indi, ‘Ni efo mfiriny wa moonri shilekuuta, kwiishisaa moonri, kushesalallya vandu vakwa, mmbo Israeli.

⁹ Neeny mmbo shilekaa neewe wo ando kuleira, na vakiduva vafo shavanyanyata kwiilollye, neeny mmbo nshekung'anisaa sha vamangyi va kunu ulaniny,

¹⁰ Na vandu vakwa va Israeli shavaniinga ando eekaa, shavavika-fo, ando awo veni, valekiukaau, nta vakiduva vawo valavasaveesaa sheelyo mbee.

¹¹ Shaasa shilevavasya Valeti vasalallye vandu vakwa va Israeli, niindo neeny nshekuningaa ufoo vakiduva vafo valollye.” Na lyingyi Nndumi Iruva kaamba, “Ni Nndumi Iruva ashekutannyaa mmba yewe

¹² Neelyi kushookaa yaa ulaniny kundelala na vandoo, mmbo nsheipoo mwana wafo muni, na umangyi lwakwe shilung'anise,

¹³ Yeto mmbwe ashetanaa mmba yakwa, na kitima kyakwe kya umangyi nshikivika finya fika llung'anu.

¹⁴ Shive ndeye nawe nave mwana wakwa, kashilyamarya shinkape shaasa vana vakapwaa.

¹⁵ Nta nshimwimaa isarya lyakwa shaasa shileima Sauli yeto shilekuvika ando akwe-fo.

¹⁶ Neewe mmbo kushelollyaa shaasa nshekaarisaa umangyi lwafo na ufyari lwafo. Na umangyi lwafo lushekumbuwa llung'anu.’”

¹⁷ Niindo Natan alerera na Davidi neemoora efyo fyoose.

Kiterewo kya Davidi Kyeeningya Kiraso

¹⁸ Naasa mangyi Davidi kaanga na ando kweele narere na Nndumi Iruva kaamba, “A yeny nkyoki Nndumi Iruva, na vandu vakwa nawo Nndumi Iruva, kutani kwasenda mmba yakwa, yeny nsero wafo, ikeeu myaaka miingyi, kwavia nndu wa vandu woi Nndumi Iruva.

¹⁹ Indi yeki kyekee kyindo kyinnywa misony afo, woi Nndumi Iruva, Iruva wakwa; mmbo kwaamba kya mmba ya ishinga lyafo kya kyeeri kyaasa kyikeesha na kwanshoora ngyeeri tishaa woi Nndumi Iruva, Iruva wakwa.

²⁰ A yeny Davidi shikuvie-se kyi, neewe kwammaa yiirikya nsero wafo, woi Nndumi Iruva?

²¹ Kimaruma kya irero lyafo nshaasa kulekunda yewe kumuni, kwatana fya wende indo koora nsero wafo namanyi.

²² Naasany, muni usuri ni yewe woi Nndumi Iruva, mashika nkwiifo akuvakye yewe-fo, nta Iruva ungyi nnyeefo kuuta yewe-fo, shaasa luleita na maarwi eru luveni.

²³ A ni vandu va isanga lyingalyi vvakye vandu vafo va Israeli, yewo Iruva alevawouwa muni, irina lyakwe lyimanyike, navetana na mashora maniini, aeresye urukeny, na vandu vafo kulevawouwa kulya Misri vakalollya, sheelyi nshi indo masanga engyi akai-fo.

²⁴ Neewe mmbo kulevangisa vandu vafo va Israeli vave vafo llung'anu neewe kuve Iruva waawo, neewe Nndumi Iruva, kulewa Iruva waawo.

²⁵ “Naasany irero llya kuleamba kya nsero wafo na mmba yakwe sheelyi kushembangisyaau llung'anu woi mbee kwiinutyeny shaasa kuleamba.

²⁶ Na irina lyafo lyiitikiswa llung'anu, indi, ‘Nndumi Iruva muni matorito Iruva wa Israeli, nayo mmba ya nsero wafo Davidi ishevangiswa kimaruma kyafo.’

²⁷ “Mashika yewe Nndumi Iruva wa matorito kukee Iruva wa Israeli mmbo kuleshirambuya kwashivia, ‘Ni yeny shikutannyaa mmba.’ Nkyo kimaruma yeny nsero wafo shasenyo ikutereva indi.

²⁸ Na yewe Nndumi Iruva mmbo kukee Iruva na irero lyafo lyikava dede, kwavikya nsero wafo kyaasa ekyi kisha.

²⁹ Na ulaalu nkyeirikyany ivikya mmba ya nsero wafo mbora, ikeeny fyeeri fyoose, mashika niindo kuleamba woi Iruva Nndumi, Naasany na mmba ya nsero wafo ivikyo mbora llung'anu.”