2 SAMUELI 6 - BIBILLYA Mareiyo Meele a Iruva

Davidi Isanduku llya lya Mavavaso lyeendewa Yerusalemu

¹ Naasa Davidi kasauwa vasikari fyiku makumi araru va Israeli,

² keenda nawo fika Baala ya Yuda, naambo nandeutyafo isanduku llya lya Iruva, lyitiri irina lya Nndumi Iruva muni matorito yeto akee uwe ya vaserafi woose.

³ Vakaende ikari iiya vakavika-u isanduku llya valyuuta kulya mmba kwa Aminadabu yeekee kiduru-u, nawo Uza na Ahio wo vana va Aminadabu vakatetera ikari llya.

⁴ Ahio mmbwe aleera mbee ya isanduku.

⁵ Davidi na Israeli woose vakeemba na finya neefina veefuraa na Nndumi Iruva vakakapa fivale na finananda, na ngoma na fingyi fyoose fitiri unyanga.

⁶ Kyeeri valefika alya muunguny kwa Nfakony, ng'umbe tilya teeshoomwa ikari llya tikalema yeenda, nawe Uza katira isanduku llya.

⁷ Nawe Nndumi Iruva karooyo ni unyafi kakaba Uza elyi aletana indo, kafiiya-u kweni.

⁸ Naasa Davidi kaawukwa nnu kimmba Nndumi Iruva akaba Uza, kavaanga ando alya Pere-uza fika inu.

⁹ Davidi keeryaa nnu Nndumi Iruva nkonu ulya, kaamba, “A sharwaany nakwi isanduku elyo?”

¹⁰ Nalyo Davidi keeryaa yeende isanduku llya lya Nndumi Iruva na kulya muriny wa Davidi, kandelyirwaa kyeny kwa Obed-edomu nndu wa Gat,

¹¹ lyikakaafo ando a miiri iraru. Nawe Nndumi Iruva kavikya Obed-edomu mbora ando amwi na va kyeny kwakwe.

¹² Naasa mangyi Davidi kashevio Nndumi Iruva mmbo alevikya mmba ya Obed-edomu mbora ando amwi na findo fyakwe fyoose kimaruma kya elyi isanduku llya lya Nndumi Iruva lyilekaa kwakwe. Davidi keenda koota isanduku llya kulya kwa Obed-edomu eekapaa ukoru, kandelyifita kulya muriny wa Davidi (Yerusalamu).

¹³ Vandu yewo veerye isanduku elyo kyeeri valeenda marende arindaru nsi Davidi kavairikisa kootya mbele Nndumi Iruva kiraso kya shau shivanri.

¹⁴ Davidi kafina nnu mbee ya Nndumi Iruva eetirwa ni nsia nniini eeree soori shimamiri yoo mbafuny.

¹⁵ Ni indo Davidi na Israeli woose valeende isanduku llya lya Nndumi Iruva veekabaa ukoru na maranda.

¹⁶ Kyeeri isanduku llya lya Nndumi Iruva lyileendwa kulya muriny wa Davidi, Mikali mfu wa Sauli kaimaiya na idirisheny, kalollya mangyi Davidi eekilya-kilyaa neefinya Nndumi Iruva na nsia nnu, evo nriminy wakwe kammina.

¹⁷ Vakaata isanduku lya Nndumi Iruva kulya mmba vakalyirwaa ando a vayo alya Davidien-deesya yoo nnang'ani ya yeema llya yeele, naasa Davidi koota firaso fyeekora na muro ando amwi na firaso fya unapwe mbee ya Nndumi Iruva.

¹⁸ Davidi ekimaa yuuta firaso fyeekora na muro na firaso fya unaapwe, kavikya vandu mbora na irina lya Nndumi Iruva muni matorito.

¹⁹ Kaavya vandu woose va Israeli wo nndu nndumi na nndu nka kiparwe kya nkate na nteera, na nkate wa nsabibu. Llyo vandu woose vakeenda wo nndu kyeny kwakwe.

²⁰ Naasa Davidi kawuya na kyeny naambo nandevikya va kyeny kwakwe mbora. Nawe Mikali mfu wa Sauli keenda indemmbwarya, kaamba, “Inu mangyi ya Israeli ammbonisa itumbe deny elyi akufwala kakusukwa mbee ya fishinga fya varundi vakwe, kava sha nndu itondo nalasarye, niindo itondo lyitanaa mbee ya vandu lyilasukaa nta!”

²¹ Nawe Davidi kavia Mikali, “Yeny mmbo shafina mbee ya Nndumi Iruva yeto aleshisauwa yeny ando a ndoo na ando a mmba yakwe, kashivika shiwe mangyi ya vandu va Nndumi Iruva mmbo Israeli. Nkyo mmbo kishikooye ikyesa mbee ya Nndumi Iruva.

²² Kwakwa yeny shimuni mmbo shikee mfwafwa, sheengere na iva nnana misony akwa shimuni, lyo misony a fishinga efyo kwafyaamba mmbo shitiri nnduma.”

²³ Kyasiany, Mikali mfu wa Sauli nnyaletira mwana fika ifwa lyakwe-fo.